《反對TSA嗰班家長， 唔係反對操練，而係反對「唔計分嘅操練」啫》

【反對TSA嗰班家長，唔係反對操練，而係反對「唔計分嘅操練」啫。】

呢一段時間，我望住啲香港家長，好似望住一直認識嘅好朋友變咗另一個人咁，變得好陌生，同以前嘅印象完全唔同。香港家長一下子由「迫仔女學樂器學運動嘅怪獸家長」跳升至「想仔女無功課可以有時間打下機嘅慈母」，我真係接受唔到突然之間咁大變化。

喺呢個咁痴線咁變態嘅香港教育制度，家長明明一直都係幫兇。

家長想仔女入名校->名校多人報->提高入校門㰖->家長迫仔女背A for Astronaut

家長一返到屋企，如果見到個仔打緊機，第一句一定問：
.
.
.
.
.
.
.
.
.
.
.
「做哂功課啦﹖」

根本啲家長就係驚學校唔比功課，我聽過不同嘅家長話：
「點解升咗中學好似無乜功課﹖」
「呢間學校教啲嘢好似太簡單。」
「個仔成日打機，好似唔洗溫書咁。」

爭取零功課﹖快樂童年﹖收皮啦。我敢保證，就算取消TSA，啲細路都係咁慘。啲家長問心，係咪真係睇住仔女考得唔好，都可以放心先﹖

我屋企有個活生生例子。我細佬讀書唔好，repeat緊，佢根本唔鐘意讀書。家母又想佢讀書成績好啲，又想佢開心。我話，你無得咁㗎wor，佢根本唔鐘意讀，點讀都唔會開心，唔可以咁貪心又要佢開心又要佢讀書，你只能二選一。佢回應，唔係想迫佢讀書，只係唔想佢喺學習搵到挫敗感，想佢喺成績有滿足感。Sorry講句我覺得根本係bullshit。一個人係唔鐘意讀書就唔鐘意，就要發掘另一種潛能㗎啦。就好似你要我學韓文咁，我係唔鐘意就唔會學得好，你迫我學我就係會唔開心，掉返轉我學日文就好開心，咁解咋嘛。每一個長短處都唔同，有啲人就係唔啱讀書。

講遠咗。我想講，香港嘅家長幾乎無一個係可以放心仔女唔讀書，去發展另一種潛能。就算你鐘意踢波，都唔該讀好啲書先。讀書係first priority，其他嘢你要讀好書先好講。當然，唔係咁諗嘅家長都有嘅，不過我真係未遇過啦，至少我家兩老已經唔係。我永遠都會記得會考拎2x分順利升原校有突個晚，我屋企人同我講「如果你打少啲機會考得仲好」。香港嘅家長就係咁，就算考得好，都要考得更好，唔可以比佢見到你有一刻係打緊機。呀仲有，個句「點解人地做到你做唔到」，我呢世都會記得。

我唔係話憎我嘅父母，只係想講我父母係大多數，咁樣嘅家長係好正常好common。所以我先話，個啲走出來話「零功課」嘅家長⋯⋯可能現實真係存在嘅，我真係未見過啦。

其實政府要解決TSA爭議，只要將TSA計入學生嘅成績就得啦，最好計埋入升大學JUPAS嘅得分，咁啲家長即刻收哂聲，聽日開始買定啲補充同啲細路操到入大學呀 (姆指)

（有啲point可能係之前睇過，但搵唔返邊個post，如有撞idea，可加返credit。）