《完全無睇過ＧＯＴ，評論ＧＯＴ》

話說網上評論ＧＯＴ最後一個ＳＥＡ，俾人屌到仆街。神劇幾乎變糞劇，問題係邊度？有人從劇透出發，有人從編劇角度出發，而我咁岩想廢ＵＰ，但又完全無睇過，咁可以點？唯有從人既弱點（即係廢ＵＰ）出發。
　
人既弱點其一，就係會自ＨＩＧＨ。自ＨＩＧＨ既結果，就係會產生不合理既期望。例如金融市場我地進行短線炒賣，往往都想捕捉突如其來消息底下既一Ｄ所謂ＭＡＲＫＥＴ　ＯＶＥＲＳＨＯＯＴ。投資者唔係個個都理性。又或者有操控能力既大戶，刻意去舞高弄低去製造煙幕引散戶上當。所以壞消息，可能會過度恐慌令到個市跌過龍，反之亦然。
　
以此在引申出去的另一點係，一樣野如果一直都好，我地總會覺得就算好多因素已經改變，仍然一廂情願會覺得佢會繼續好落去。例如金融海嘯時間既匯豐，１００蚊一樣有人入去將血肉代為長城。又例如一啲城市，明明成個主權都唔同左，當時移交既一刻，仍然有人相信明天會更好等等（就算依家都仲係，係比鬼上身都更加解釋既行為）。一定要到最後見血，傷深及骨，自己都仆埋一份街，親眼見到，先至肯認：
　
原來真係自己ＯＮ９左。
　
至於弱點第二，就係人既記憶力有限。除左過目不忘既超人或者ＩＱ高成個常態分布三個ＳＤ周圍係人地其他ＷＡＬＬ撩事鬥非既高智能生命體之外，好多人都好善忘。善忘既必然結果就係，就算一樣野係神作，如果你唔係死忠睇完又睇睇到所有野都熟晒，好多時候只要斷一段時間，前面個故仔已經唔記得八成。正因為咁，前情提要先顯得重要，唔ＲＥＣＡＰ，邊記得。更何況如果故仔有極其複雜同雄偉既結構，人物關係錯綜複雜，你殺我殺你，唔自己去睇ＷＩＫＩ慢慢刨，真係隨時開新番，結果俾黑人顏射左你一臉問號。錯不在你，錯在你個腦識得自我調整。
　
好喇，當一個季完左，幾乎要等成年幾兩年至有得睇，而又咁岩得咁橋係大結局，大家既期望值必然會去到ＩＦＣ咁高，以為一定會做到轟轟烈烈，就此編入電視史冊。其實劇組都應該真係好想，不過，當愈想做好，就愈會諗錯隔離；愈想成為神，就愈會到最後出現低級錯誤。幾多奧運選手，都係到最後幾秒先失去金牌，功敗垂成。
　
觀眾已經個個金睛火眼，幾乎講到首播果日，要齋戒七日七夜再禁欲，邊條女邊條仔唔肯就即刻飛埋佢，然後係屋企儲定好多午餐肉，就算依家殺豬殺雞，都唔會關佢事，自此足不出戶，你就知道有些少燶味出到黎。呢個亦都同公布業績明明賺錢，但就係差於所謂預期結果都係俾人狠狠沽爆，著實係同一個道理。預期好似時間一樣，係虛無飄渺得黎，但又好重要，好需要予以重視既一樣野黎。
　
舊時少年時代，大家都會為左提升自己而苦練各種技藝。但係到左老海鮮年代，更加明白，其實自己做得好唔好，並唔係最重要。係管理其他人既期望值，先至係最重要。甚至要時刻提醒自己：唔好做得咁好。千祈唔好。最好唔好等人地有咩期待，到最關鍵時刻，你先好出手。咁樣就算你之前一直俾屎人食都唔緊要，到最後你突然唔煮出屎，只係煮出炭，所有人都會對你起立鼓掌。期望管理去到極致，就算條友大部份時間表現平庸，唔知點解老細總係覺得佢交到功課。
　
好喇，廢話完畢。再強調多次，完全無睇過ＧＯＴ。如果你覺得以上既論點唔岩聽，希望唔好屌我。我都係花十分鐘時間講下人生大道理唶。ＳＯＳＡＤ。就算ＧＯＴ唔ＡＰＰＬＹ其他地方都總會ＡＰＰＬＹ（掛）。。。。