《粵文工廠開啟十分鐘》
粵文工廠開啟十分鐘
有咩野想寫速速留言講低
（１）「在巴黎聖母院偷食引致火災」
巴黎聖母院火災呢單野，暫時官方口徑都只係話因為復修期間，唔覺意燒著野，結果搞出左個大頭佛。但有網友就居然反問：
係巴黎聖母院偷食，會唔會有機會成為肇事原因？
塔塔就無讀過生物化學，所以呢個問題咁艱深，應該就俾唔到一個好確實好有科學根據既講法過你聽。不過，講番偷食既相，係架的士入面，你堂堂男子漢大丈夫，咁樣俾個唔算太樣衰而且有身材既人胸壓，又攬又啜，居然唔即刻推開人地大聲叫唔好既，咁即係享受啦ＲＩＧＨＴ？咁除非個男人真係有階段性功能阻礙症唶，否則真係慾火焚身，燒到周圍既物件，都唔係咁出奇既事。唔好話巴黎聖母院啦，隨時連萬里長城巨龍都燒燬埋。唔係講笑。
拿依家就話七點鐘會開記招。外圍既盤路就已經滿天飛，但暫時就未有女事主＃ＭＥＴＯＯ反告男事主呢個盤口。其實置於死地而後生，未嘗唔係一個解決辦法黎，呢個冷盤一賠一萬既我覺得值博率都幾高下。有興趣者不妨冷敲下。
（２） 「塔嫂世界第一」
塔嫂係咪世界第一？係我心目中，絕對係。
而正正因為咁，我好少講佢既野，甚至係一般係度日常放閃既都好少有。就算有時唔覺意放左，其實（好大程度上）都係言者無心聽者有意唶。兩個人一齊生活，又唔係咩公眾人物，真係無咩好講呀。就算我真係用全職寫作作為事業，我都唔會搵佢黎做我既日常主要寫作素材。好似市場化左自己個伴咁，感覺上真係唔係咁良好。ＬＯＬ
再講，一來真係覺得無咩好寫。二來我都真係唔多鍾意刻意放閃呢樣野。自己過得幸福同開心，自己知道就得，我又唔係太想同其他人分享呢啲野，因為分享左有時硬係就覺得會分薄左。身在福中不知福，有時真係會係咁架，每一個人都有佢自己既盲點。日又講，夜又講，反而門面功夫無足，但最後唔識自己珍惜，咁咪仲大鑊。
我係「本來一開始」呢個故仔入面，其實就係講緊呢樣野。男主角唔愛佢老婆咩？唔係。咁佢有無好好表達呢？無。佢有無話俾佢老婆聽其實佢好愛佢呢。無。到到人地離家出走先後悔，先識追，係女人既角度，已經太遲。
千祈唔好去到後悔莫及呢個ＳＴＡＧＥ。每一日去擁抱塔嫂就係我既份內事。完。
（３） 偷食食到蟲點算
關於偷食偷到蟲呢樣野，我地可以去研究番最近消委會講速食壽司呢個報告。
叫人唔好食三文魚，唔係一朝一夕既事。傳聞就有講過四大才子之一蔡瀾話，三文魚入面有屎架，叫香港人千祈唔好食。佢自己去日本都唔會食。但係佢提出警告果陣，無意識到，香港人有時真係鍾意食屎。就算無屎食，俾佢聞下啲屁味，佢都會覺得心滿意足既。二十歲前既讀者見到我咁講，可能會覺得我胡說八道。但再老少少既，就必然會知道呢個係世界既真理。
好喇，依家講到有蟲卵有盛喇，我地係咪又真係要驚呢？其實報紙佬都好好唔係只係識得追偷食新聞架，都有訪問下大學既教授。大學教授就話，拿，食左都唔一定會有事架，因為可能蟲會凍死左架啦嘛。凍死左你都係食蟲屍，核突就核突啲，但唔會對身體構成負面影響架嘛。至於如果蟲卵真係食左落肚咁唔好彩，都唔一定會孵化架嘛。當然，記者無醒目到問到教授如果有碟壽司擺係佢面前佢會唔會即食示範一下啦。
所以，偷食偷到蟲，唔一定有事。偷食係咪一定斷正，都唔一定會斷正。而斷正，亦都唔一定代表需要切Ｊ求元配原諒。呢個世界都係講個博字。有時博一鋪，就係刺激，就係男人既浪漫嘛。記住愛就係選擇，犧牲就係意義其實都好ＢＡＹＥＳＩＡＮ架。
（４）試論住家排骨同野味柳枚既優劣
試論住家排骨同野味柳枚既優劣，我認為我無可能寫到三百字成到文，姑且試下。
其實大家舊時都會食下排骨。我唔知你會唔會拎排骨黎煲湯，但係屋企人就多數會用豉汁去蒸。但係可能窮啦，排骨質素唔係咁好，好多時候夾上手只係得骨，根本上無肉，或者只係得少少脂肪。蒸起上黎真係有好香既肉味，但係食落，好似完全唔係果回事喎。更加唔好講有時排骨肉韌，依家咬極都唔離骨既情況。食住家排骨，有時真係令人氣餒。
但係柳枚就唔同喇。我唔知呢個係咪正寫，但係我知道你想講乜。呢個特定部位，唔單止啖啖肉，而且食落非常軟滑多汁。買番黎多數已經無骨，可能拎黎同其他配料一齊炒，成為美味既佳餚。佢係咪野味我就唔知啦，因為野豬既柳枚，我真係未食過。不過記得倪匡既書曾經有寫過，野豬肉同家養豬質素完全不能比，係天下美味。
所以就咁單從食用角度黎講，似乎真係優劣立見。但係最後最後，食得野味多，會唔會真係等於尋花問柳一樣，搞著個ＳＡＲＳ大頭佛出黎呢。呢個就真係要細意再考量喇。
（５）的士裝後cam影車內狀況有否涉及私隱問題
有人問，喂，的士裝車ＣＡＭ有私隱問題喎！就算打野戰，都唔應該出街啦！
法律既野我真係唔熟。我只係知最近不誠實使用電腦已經唔再係一條可以任意砌人柳枚肉既一個罪。同埋，成日都覺得法律當去到一啲問題係，全世界都突然有一大部份人涉嫌犯法，而果個又唔係一種逆天既大罪（例如咩偷左恐龍頭骨，對新時代咩咩主義思想說三道四）的話，多數都無事。因為行政資源有限，俾著佢地都寧願向住幾個人窮追猛打算。成千上萬既人，一般黎講都隻眼開隻眼閉。
日日我都見大小車台討論區些／轉載ＣＡＭ片，入面好多牽涉到個人資料，例如路人既樣，或者係經過既車既車牌，都全部無處理。但係個個都無咁樣做，亦都無人去干涉。至於知識版權既問題就更加係講左無限咁多次。一條片，你抄我，我抄你，你加少少又上載一次，我打水印又轉多次，邊有人理？
我真心相信有私隱問題。但如果私隱專員唔出黎講幾句，我都代表唔到佢。其實個個都係花生友。大家一講到公眾知情權，王皇大帝都係要暫時行開一邊啦。
（６）聖母院會唔會遠眺到宇宙嘅黑洞？
聖母院會唔會遠眺到宇宙嘅黑洞？我真係唔知。點解啲題目愈黎愈難寫。
不過離記者招待會只係剩番十五分鐘。阿安哥依家都無地方可以去，就算佢想搵間教堂作最後懺悔，都唔會呢一個機會。我唔知佢有無曾經同佢至愛把臂同遊巴黎，去過聖母院留低點點既回憶，不過依家地方都燒埋，復修無期，真係只情可待成追憶架。
岔開一筆，記得終生美麗入面第一句歌詞入面就係『塔尖仍舊記得這擁抱極美好』。今朝起身一見到新聞，我個腦真係即刻諗起呢句歌詞，仲係度諗緊吖點解會突然間諗起佢既歌既時候，今日去到晏晝，佢又再成為主角了。有時啲野，套佢ＮＩＫＥ眉果時講一句，真係可以好邪。
宇宙既黑洞入面有啲乜，科學家會繼續搵答案，千年百年或許都唔會搵到答案。而正如我講，人心既黑洞究竟有幾深，我地亦都係唔知。依家去到呢一個時間，可能一切都已經太遲喇，物事皆非。建築物燒左就無左，感情已逝，一樣可以永遠唔再返轉頭。
「這叫幸福，不怕流逝，任他們多漂亮，未及你矜貴」，首歌去到最尾，真係好Positive，但係佢地係咪仲可以走到最後呢。上天既聖母應該都唔可以俾到答案我地喇。
（追加）瞥見黑洞中生活嘅生物
「叮噹，究竟黑洞入面有無生物？」大雄照樣無做到功課，但又要扮上進問。
「嗯，關於呢個問題。」叮噹本來就想拎啲法寶幫佢解答呢個問題既。但心念電轉之後發覺都係唔好：
「大雄，我覺得要答你呢個問題好簡單。但係要你體會呢個問題好困難。」
「點解呀，我唔明喎。」大雄既智商咁低，要佢理解呢句既意思，同馬國明點樣係日光日白睇緊波唔出街一樣，係好難明白既一回事。
「黑洞既野，就係會吸晒所有既野入去。一滴也不留。我覺得你暫時呢個年紀，未必會明白，再大個啲先啦。如果你他朝有一日都畢到業，到時你再搵到靜兒做老婆，我相信你會搵到答案。」
叮噹最後，用好短既手，意味深長咁樣，疊左大雄膊頭一下。
「咁究竟入面有無生物唶，叮噹呀～～～」
「入面有無生物，根本唔重要呀。」叮噹索性拎竹蜻蜓出黎，自己飛走算。因為佢知道依家七點鐘，有個好重要既記者招待會唔可以錯過。