《香港人口味係咩？肥佬黎用行動話你知》

話說之前有篇文指出蘋果日報行訂閱制係大錯特錯既一步棋，而且講到台灣方面蘋粉數字係計劃推出後狂跌去證明其立論。拿，台灣方面唔熟我唔敢講。但係如果講香港的話，蘋果係咪一定死晒，我一直有所懷疑。
　
的確，蘋果既報章平時既內容大部份都無辦法同咩紐約時報經濟學人去比。但係如果理解多一層，蘋果日報由一九九六年（記錯唔好話我）立報以黎，從來都無打算走咩高質文章報紙，至少，呢樣野唔係主打。其主打其實就係肥佬黎一直計算得好精準既香港人口味。香港人口味係咩？
　
快餐式，圖文共茂，加鹽加醋。正文為次，娛樂副刊先係主打。狗仔隊係肥佬黎整出黎。俾人屌到仆街同時，咪又係不知幾鍾意睇？講私隱？去到呢啲關節，公眾知情權大晒呀。
　
今日香港爆左一單比巴黎聖母院被燒通頂更爆既一單新聞。其重要性應該遠超咩鬼引渡條例，支援雨傘義士，甚至咩央行放水恆指夾升四百幾點等等。我甚至懷疑，呢個係睇中訂閱制執行先爆既獨家新聞。肥佬黎知道香港人只係識得鬧，但係身體很誠實，只要一有夠ＪＵＩＣＹ既新聞，佢地一樣全部都要係果一刻好似泛民咁樣即刻跪低，係，係即刻，乖乖訂閱。
　
今日我既ＷＨＡＴＳＡＰＰ，就已經有老豆老母急聞究竟點樣先睇到蘋果動新聞，因為佢地要睇究竟保心安點樣巢法，架車有無去到咩地方就地正法之類。然後睇ＦＢ碌左近一分鐘，除左都係蘋果日報條ＬＩＮＫ之外，其餘全部都係講緊自己已經因為呢單新聞落坑開ＡＣＣＯＵＮＴ。係果一刻，我就已經知道，肥佬黎成功左無一步，都有半步。
　
如果進一步嘗試用八奇思考領域思考，當初蘋果日報開波，都係驚喜一浪接一浪。依家今次係佢既杯水車薪之作，ＮＴＨ　ＴＯ　ＬＯＳＥ，恐怕更爆既新聞，仲會接踵而來。大家唔好唔記得蘋果爆親醜聞，一向都係玩擠牙膏式－－
　
係，已經有人開始問ＰＯＲＮＨＵＢ有無片了。有時啲野，識玩真係好好玩。學紐約時報？咪玩啦。你有無見地鐵入面香港人有人渣住四書五經定莎士比亞係度睇呀？真荒謬睇得自己咁高。捉得緊香港人既弱點，蘋果起碼仲可以玩多一頭半載呀。藝人政客真係祝你好運，唔知蘋果手牌仲有咩係手。