(beta 公測版本)
< 返回

《Please remember you are beautiful || 請別忘記你很美》

作者:Emilia Wong
日期:2019年4月6日

走在伊朗街上,好多人都向我地行注目禮,猶如喺香港黏咗幾粒飯上塊面咁,好多人仲向我地打招呼同問好。除咗因為我地係異族好特別之外,原來更加係因為我地好「靚」。 唔好誤會,呢個唔係一個自吹自擂嘅post。

標題中嘅說話,係今日一位25歲嘅女導遊法緹瑪,臨別前同我地講嘅。原來,佢細細個就因為鼻高而被欺凌,佢每日都會花時間,將頭髮整薄燙直。喺佢地嘅審美觀中,我地又白五官又扁,頭髮又直又薄,原來係好靚。佢甚至同我地講,伊朗女人會花好多錢整容,就係想整成我呢種鼻,而佢自己都想整矮個鼻,整到我咁就perfect。當我話香港人唔鍾意扁鼻,甚至有人會攻擊我係豬,好醜,而我地會花錢整高鼻,渴望擁有深邃嘅輪廓,佢都相當驚訝。佢仲講笑咁話,或許我地要交換地方生活。

追求美係人嘅天性,而對於全世界嘅女性,「美」更加係一個魔咒。但原來,「美」嘅定義可以係如此闊、甚至如此荒唐:基本上就係逼你成為別人、放棄自己。白人想曬出小麥色肌膚;黑人又想美白。輪廓深嘅想要扁面;扁面又羨慕人地...講到底,除咗「物以罕為貴」,美嘅建構更加係商人嘅盈利手法:只有逼你討厭自己、追求自己唔係嘅嘢,佢地先有利可圖。

伊朗街上,每一位女性都係絕頂美女,偶爾見到無包頭髮嘅小女孩,更加會發現佢地嘅秀髮好似瀑布咁靚。但喺佢地嘅群體當中,原來我地呢啲豬樣港女、禿頭薄髮先係美,佢地反而要羨慕我地。

除咗宗教原因外,有伊朗人亦會用保護女性為由,支持規定遮蓋女性身體頭髮嘅法例。當大家都睇唔到大家,當所有人嘅美都被遮蓋,咁就再沒有女性會因為美或不美而被傷害。有人甚至會認為,如此遮蔽全身,係一種對女性嘅解放,因為佢地從此可以覺得好自在好安全,可以喺街行不被注視騷擾。因此,喺伊朗街上,特別係比較保守嘅地區,都不難發現全身蒙黑布,只露出臉同手嘅女性。好奇特嗎?其實「進步」地區如香港(笑),都有好多人會以同樣邏輯規範女性,覺得唔暴露、平平凡凡,就無人會留意抨擊你外貌身材。而假如女性衣著或身材「不符合社會規範」,受到傷害或攻擊都是理所當然:裙短抵被偷拍/背心就係雞/露事業線抵被人閒話甚至強姦......其實,點解唔係無論如何,都要尊重不同女性嘅美與選擇呢?

伊朗人權律師Nasrin Sotoudeh 因為為當眾解除頭巾、抗議頭巾法例嘅示威者辯護,加上一直以來都替女權發聲,今年被伊朗政府判監38年,鞭刑148下。導遊法緹瑪知道呢件事,但詳細內容卻因為政府封鎖資訊而比我地知得更少。法緹瑪好多年輕朋友都未必認同頭巾嘅傳統價值同法例,佢地認為伊斯蘭同美唔係對立,同時都慨嘆伊朗要唔知幾多年後先會進步。

分別後,我地好快會返香港,佢都會繼續喺伊朗生活。臨別前,佢抱咗我地一下,不忘提醒我地一句:Please remember you are beautiful. 其實呢個世界真係好大,亦充滿住美麗嘅人同事物,只係太多利益、又太多人從中作梗而已。#emiliawyk_travels #kashan #isfahan #iran

全文 990 字 (唔計英文、空格、標點)