(beta 公測版本)
< 返回

《香港粵文精粹:賭仔術語》

日期:2019年2月21日

正所謂「四五揸起手震,博有啤好抆」…

== 前言 ==

呢個世界,阿爸阿媽教落,十賭九騙,所有博彩成份既野,唔係非法既偷呃拐騙,就係合法既所謂「資訊不對稱」,即Information Asymmetry 是也。賭往往都牽涉到金錢既交易(當然有人甚至會賭命添),但或者我地唔好剩係講錢咁市儈,不妨講下其他野。例如我地依家成日都跟 阿擇 (Chaaak)咁講要捍衛粵語文化,但除左生仔救港,自己寫多啲粵文,或者多啲將 史兄教人講屌你老母既精華文 Share 出去,一傳十,十傳百,之外,仲可以做咩?

塔塔係呢度擺多條路俾你揀,答案就係:

學賭--既術語

好多賭博術語,都係傳神既廣東話,而且變成日常口語流傳,只係因為博奕之術未能一代傳一代,結果反而只係齋講,又或者去左首歌入面,可能最後連意思都變埋,唔明原來出處點解。拋磚引玉,求其講番幾樣:
「拎冧六,長衫六,高腳七,仲有一隻大頭六」

以上並非咩密碼,而係出自超舊廣東歌「賭仔自歎」既第一句歌詞。全篇以廣東口語填詞,傳神之極。呢排因為某電視劇,尹光又再一度受人注目。其實佢除左「少你阿爸」、「荷里活有間大酒店」之外,唱「賭仔自歎」都一樣唱得極有感情架!至於啲歌詞點解呢,唉,你有所不知喇啦我講你聽啦:

牌九有三十二隻,簡單講,以兩粒骰既組合砌成,拎冧六係(1+5=6),長衫六(3+3=6),高腳七(1+6=7),大頭六則係(2+4=6)。其中大頭六又叫大雞。同(1+2=3)細雞/么雞成對。全部細牌,打咩都無用。所以歌詞,後一句就係「輸到我服」。賭仔最後,都係貪字得個貧,就係歌詞真意。你估真係大賭變誠哥?呃你渣傻仔!

仲有好多架,呢次求求其其拎幾個黎講下:

(1)「單天保至尊」
「單天保至尊」亦係天九術語。岩岩講既大雞同細雞組合就係至尊。如果有得出,則屬最大,其餘幾家必須即時墊牌,同時結束呢一回合。但係如果人地出先,你至尊係不能當雜牌起孖去打,呢個就係竅妙之處,不能先出,「至尊」亦變「垃圾」。所以要有最大牌「單天」,搶先搶到出牌權,再打「至尊」,先至有用。依家解以一人之力,力挽狂瀾,亦屬貼切。

(2)「一棟都無」
「今次真係一棟都無!」既「一棟都無」,形容人輸得一乾二淨。其實一棟(or 戙?)亦係天九玩法根本。輪流出牌,贏一次拎一棟牌,得四棟者和,空棟則輸五,而空棟者,無法最後一 Round 出牌「結」,即無條件勝出一局,任你揸最大牌都無用。所以「一棟都無」係悲涼情況。至於話俾人「過一棟」,即係俾人跣一鑊、陷害,呢個我無咁肯定,但係打麻雀亦有過棟當Cut牌之說。其中有老千擅於暗地裡過棟,又稱「洗牌疊」,所以俾人千左,叫「過一棟」,不無道理。

(3) 「食夾棍」、「格食格」
多指俾人作程咬金,中途殺出,將自己身上既肥肉搶去,或者兩邊通殺既意思。係賭檯場上,例如十三張,擺牌任何一島,如果莊閒完全一樣,則唔係計花色(諗起Katarina Prestor (方麗娜)篇文 ),係直接當莊贏(相反,閒有先開牌報到之權利)。

至於「格食格」,就係花樣唔同,岩岩一物治一物,十三張入面同樣有此說,指自己手持牌唔太靚,但都可以完全取得勝利。例如「啤桃花」食「無頭一啤蛇」、「啤三蛇」食「無花無順,焗踩三輪」等等。

喂原來無頭一啤蛇都係一首歌黎。又係尹光唱既。大家有興趣可以聽下。
(補註:十三張中,一對,Pair,又叫一啤,又叫一個轆,車輪也。所以三輪車,即係頭二尾只有各一啤,可憐!)

(4)「磨爛蓆」
同「借艇割禾」/「割禾青」岩岩相反。前者係賭極都唔願走,結果連坐緊張凳塊皮都磨到爛,後引伸人有鍥而不捨精神。後者當然係識得贏少少都趁機全身以退啦。但賭得性起,有人想割禾青,必然俾人押番低。想走,無咁易!依家係指有人識得睇風頭火勢先行獲利而退。

(5) 「起尾注」
「起尾注」幾乎已經代表要人地一下子輸到一窮二白為止。等同「佈天仙局」,先引誘水魚落場,贏番少少,然後誘使對方注碼加大,至一下子露出本性,將佢既錢連本帶利一鋪過贏番晒。換句話說之前既局完全不計,最後一局先係生死局。俗語亦有云:「放長線,釣大魚」!

呢啲話題講落去,寫之不盡!

打麻雀亦都有好多呢啲 Terms 架,視乎反應,留番下次再講。LOL

(待續?)

>> 覺得文章不錯請多多支持/分享
>> 到 Profile Page Follow 我 [ https://medium.com/@ellanou ]
>> 去我 Facebook Page 交流 [ https://www.facebook.com/Ellan.Ou/ ]

全文 1329 字 (唔計英文、空格、標點)