(beta 公測版本)
< 返回

《茶》

作者:滑鼠娘娘
日期:2019年2月24日

Coffee, Tea or Me? Tea as always.

常言道coffee, tea or me? 除咗me之外,咖啡同茶我都好鍾意。但咖啡同茶之間,我永遠都會選擇茶。屋企入面除咗書之外,最多應該就係茶葉同茶包。响去完倫敦之後,茶葉更加係以倍數增長。其實唔係好講得出鍾意茶嘅咩味道;茶嘅果種少少嘅苦澀味,同埋留响口腔嘅味道,真係令人好滿足。

細個嘅時候,已經成日見爸爸攞個茶海出嚟沖茶,有好多步驟。見到就成日貪得意話要飲,但係細路仔係唔識得欣賞茶個陣少少澀澀地嘅味道,飲咗一兩啖就放低,浪費晒啲好茶。之後一直都係對茶冇特別偏好,有時爸爸沖茶就會飲一杯,不過都係比較偏好飲果汁之類嘅嘢。

直至學英文嘅中心因為合夥人鬧交而執笠,我就變咗每個星期六去老師屋企上堂,先真正開始鍾意飲茶。老師係英國人,英國人嘅待客之道就係沖杯茶同畀啲餅乾你,久而久之就開始鍾意飲。每次老師都係沖Breakfast Tea畀我,但唔係每一次都係食餅乾。因為係朝早11點左右去到老師屋企,好多時都唔食早餐就出咗門口,老師知道就會預備埋早餐俾我,有時係Pancakes,有時係Scone,有時係牛角包。

老師屋企果陣有7隻狗2隻貓,每個星期我都好似响動物園食早餐咁樣,通常都係懷中有隻貓或者有隻狗,仲有一堆動物鄉腳邊轉來轉去咁食早餐。個陣學業壓力好大,生活又過得唔開心,每個星期六嘅呢個小小時光係我小小嘅慰藉。所有關於呢份早餐嘅嘢我都好鍾意,包括埋杯茶。

上到大學之後,自己住宿舍,房入面都係常備茶包,一日最少飲一杯。去到Year 3,抑鬱症開始越來越嚴重,身體好差,一飲咖啡就頭痛手震心悸,淨係可以飲茶汲取咖啡因,不過果陣都未去到真係熱愛沖茶飲茶。之後開始真係搞唔掂不能自理,畀人捉咗去睇醫生同見臨床心理學家。同Therapist討論點樣可以控制自己嘅衝動同一啲intensity好高嘅情緒,佢問我有咩做你會覺得好Soothing。我諗咗一陣,就答佢敷mask同埋睇住爸爸沖茶會令我覺得好放鬆。於是佢就建議我以後有咩事我覺得頂唔順就去敷mask同沖茶。

身為一個公認嘅 overachiever,啲嘢一係就唔做,一係就要做得好啲,我走咗去學沖茶哈哈哈。之後就開始真係愛上咗飲茶,其實係因為每次想跳制,就走去冲茶冷靜下個人,久而久之就培養咗呢個興趣。除咗會因為想飲就沖茶以外,而家有少少不在狀態,我就會去沖一壺茶,慢慢飲,自然會覺得好過啲。身邊好友全部都知道我好鍾意飲茶。同朋友去飲嘢嘅時候,因為唔飲得酒,我就會好似個阿婆咁雙手捧住杯Breakfast Tea响度飲。

每次收我到人送茶葉畀我都有少少唔知點嘅感覺。因為我真係鍾意上飲茶係因為要阻止自己跳制,收到茶葉嘅個一刻會忍唔住心入面偷笑「玩嘢呀而家」。之前意中人好好咁送咗Breakfast Tea畀我,但送俾我嘅時候啱啱經歷完啲Drama,我拎住盒茶放入廚房嘅時候真係忍唔住笑咗,一方面好滾動,另一方面心諗「而家即係點呀,畀多啲quota我去不在狀態沖茶啊」。果不其然,一個星期後果然又有事發生,我唔多唔少都係靠住佢盒茶先可以好冷靜咁反應。拎住盒茶真係有少少哭笑不得。

不過我都係好開心朋友送茶畀我架~好Grateful的哈哈哈。因為真係要了解我口味先會送。响飲茶飲咖啡方面我都係一個好悶嘅人,淨係鍾意飲最最最最悶同普通嘅味道。淨係鍾意大吉嶺紅茶、Breakfast Tea之類嘅味道,任何有多啲香味嘅嘢我都唔係特別偏好。廚房入面盒Earl Grey其實只係買嚟畀意中人人飲,我係幾乎掂都無掂過佢。不過近來買咗一隻我覺得聞落飲落都可以接受嘅Earl Grey,改變咗少少我對有香味嘅茶嘅睇法。

食食下pancake飲住茶做早餐突然諗起呢堆嘢,開開心心寫低咗。

全文 1209 字 (唔計英文、空格、標點)