《你想唔想X自己？》

（其實係放閃我啲朋友有幾錫我）

「你想唔想屌自己？」呢個係我成日問人嘅問題，攞塊鏡出嚟，望住自己，問「你想唔想屌自己」。
其實即係問自己「你愛唔愛你自己」「鍾唔鍾意自己」。
超過9成嘅時間，講真，我屌唔落。 我覺得自己好差，好唔值得屌，unworthy。
嗰種冇價值既感覺，驅使我好努力去「儲印花」 — 讀書、做運動、化妝、襯衫… 自我增值咁樣，因為有咗呢啲嘢就會有人鍾意我、欣賞我。如果我冇左呢啲嘢，底裡嘅我、本來嘅我一啲都唔好。
如果我唔係叻女唔聰明，無人會鍾意我，無人想同我做朋友，因為我冇用。 如果我唔係滑鼠娘娘，無人會覺得我好，因為我什麼也不是。（其實滑鼠娘娘都唔係啲乜。）如果我唔係DSE考得好，入到港大，無人會鍾意我，因為我唔夠好。如果我唔係努力改進自己努力去諗personal growth，無人會鍾意我，因為我本來就好差…
好似填氹咁，我不斷追求自己要變得好啲，要變得更加成功。亦都因為好多我仲未有勇氣寫出嚟嘅原因，我被教導咁樣先會响人同人之間生存到。
「鄺頌晴本來無價值，唔努力就冇人會想理佢。」好多年嚟都纏繞住我。
一直都唔係好承認呢樣嘢存在，從來都只係我去話俾人知要鍾意自己，問人「你想唔想屌自己」。（如果你打算咁樣問朋友，真心要好肯定你哋友情好穩固，同埋你要有能力處理到會即刻爆喊嘅朋友，個人經驗真係唔好亂嚟）
然後今日我最好最好嘅朋友問我「你愛唔愛自己」，「唔愛，都幾嫌棄自己」。
「嫌棄自己啲乜」「我都唔知，其實我知我好好，但我都唔鍾意、唔接受自己」
如果我身邊有一個好似我咁嘅朋友，我真係會覺得佢好好，但偏偏我就覺得冇價值，差到一個點係響個世界唔會有容身之所。
如果我唔係而家呢個package，我同呢位朋友未必會係Best Friend，係因為我XXX嘅quality同經驗，所以我同佢一拍即合。結論：我本來唔夠好。
然後朋友就話「我喜歡你，係因為你嘅質地，而唔係印花」，「無論你有冇嗰啲印花，你都係一個講義氣重感情、對世界大是大非好有原則、好勇敢好敢言嘅人。而呢啲特質係你有咩成就都唔會變」。
我啲所謂「成就」「印花」其實真係唔係啲咩獨特嘅事。車～公開試考得好過我嘅人大有人在，社運嘅真娘娘大有人在、讀書讀得好過我嘅人大有人在、拍條片多view過你嘅人大有人在。反而我咁努力去儲印花，無令我安然咗，而係令我更加大壓力，更加加深咗本來嘅我冇價值嘅不安。 追求成就解沒完沒了嘅事，我永遠都唔會跳得出個loop。
我要學識嘅係，冇咗呢啲「成就」我都要識得欣賞我自己、欣賞呢個朋友响我身上見到嘅特質。
咁即係點… 咁即係要點做？
朋友溫柔而不失霸氣地話「你首先要收返你頭先嘅諗法。如果你再出現呢啲嘅諗法，我係真係會嬲。我都要你明白，我欣賞你喜歡你，絕對唔係因為呢啲印花、唔係因為你嘅技能，係因為我感受到你嘅心。」
「你話我知，個世界有無可能有多一個100%你咁嘅性格、價值觀完全一樣嘅人呀？」
完全係醍醐灌頂一般嘅說話。早排我先同另一個朋友講，「單單係你嘅存在對我來講就已經足夠，你咩都唔洗做。」
單單存在就足夠。對於真係愛我錫我嘅人嚟講，其實我有幾勁一啲都唔重要，重要嘅係我作為鄺頌晴嘅存在。睇書見過一段說話，大概係講如果有一日，你重視嘅人撞車重傷昏迷，瞓响醫院入面。佢單單仲「存在」，即使佢依家瞓咗响度，毫無作為，對你嚟講已經足夠。何況係都算幾有作為嘅我，好似係。
心唔安然，原來係我一直以來都唔識點樣去看待自己。
一直覺得自己不足，其實無錯的；努力改進，都係好應該的。 但唔係我不足、無進步，我就唔好。
想個人多啲知識、自律啲、腹肌線明顯啲、啲頭髮靚啲、揚名立萬、受歡迎，當然係對自己有要求想自己好錫自己嘅表現。
但撇除咗嗰啲嘢，我係一個多愁善感、敏感、細膽、粗心大意、生活白癡、重感情、好在乎朋友、有好重嘅是非觀念嘅人。而咁樣，無論對自己定係對身邊嘅人來講，應該就足夠。（覺得咁樣唔足夠嘅人唔該自己離開我嘅生命，我唔想再見到你）
講好簡單囉。我都係好不安，覺得自己好似唔係咁好。
同埋，都係屌唔落自己。
延伸self-help閱讀： 停止證明自己很棒，也值得被愛