《［財演模式］今日講股》

維尼大大落黎開橋，只係拍手幾下唔致辭，結果林鄭重口味ＣＯＳＰＬＡＹ粉紅豬豬都無用，今日恆指大跌近八百點，２６０００得而復失。後市點睇？
　
首先，大家完全唔俾面維尼大，可見後市極為凶險，想唱好都唱到走晒音，完全唔岩ＫＥＹ。唔知仲有幾多人將會人頭落地，又要問責落馬同被抑鬱。不過不論如何：
　
又再一次引證國家隊出現往往就係死亡之吻。尋日又話咩各單位領導嚴詞聲明要救市，各項救市基金成立，瘋狂放風話現值已經極度吸引，而且熔斷底猶如鋼鐵底般，未來一定會迎來春天，結果托市成效只得一日，春天一黎就即刻變番嚴冬，真係唔駛經過一些秋與冬，說穿了，又係燒粟米咁橋：
　
天仙局引散戶輸完再輸又再上當，最後都係領導先行，先行ＣＡＰ水然後走人。
　
依家唔單止大陸個市唔掂，外圍股市一樣完全肉酸。尋晚道記跟左一陣升，結果倒跌；至於依家美期一樣又插多二百，之前報紙話恆指仲低過道指，其實唔經唔覺已經又再一次調番轉，更加反映美股極有可能走到十年牛市既最後探戈，隨時又可以見證一日過千點上落，絕對無難度。恆指今日陽燭成交極細，陰燭成交極大，可見大戶質貨落去，完全不遺餘力。
　　
今星期頭兩個交易日，恆指同期指已經坐晒過山車，而且睇得出期指既成交張數極大。依家咁樣來回地獄又折返，２６２００點一定蟹貨重重，咁樣極速補裂口，想食都唔係咁易，但係下邊似乎仲有極多水位。所以大家如果手上有多餘資金，不妨自己諗諗應該點樣再做佈署，報告完畢。
　
利申：唔係咩證監會持牌人士（好似係）。以上分析不構成任何既投資參考或建議，完全都係屬於一時９ＵＰ以個人身份發表既超個人意見。