《小丸子又有心事》

經典漫畫小丸子原作者櫻桃子於本月離世， 終年53。
　
提起小丸子，你會先諗到小玉，小丸子媽媽，爺爺，花輪，但唔止係咁，好快你會諗起埋閃電傳真機，諗起叮噹，諗起藤子 F 不二雄，諗起林保全，諗起娟姐。。。
　
每個人都有佢既童年，有啲比較平淡乏味，有啲比較多姿多采。但你同我既童年，都一定會係一整個 package ，可能或多或少有以上佢地既影像係腦海同心頭掠過，有啲比較重要，有啲已經唔記得左。而你同我既童年亦都一樣，黎到今時今日，早已永遠地一去不回。正如以上既人與事一樣，不可能成為永恆。
　
故事入面小丸子性格麻煩，多管閒事，諸事八卦，甚至貪小便宜，好吃懶做，為左掩飾錯誤甚至會講大話，推卸責任。但係點解大家都係鍾意睇住佢？
　
因為童真，千金不換。
　
小朋友一時做錯，只需要知錯能改，講句對唔住，斷唔會俾人聯想到佢會多年後成為梁六八九咁既賤精，死不認錯仲要狂發律師信告人。
　
天真，貴在無邪。
　　
小丸子可愛而不造作，所有小朋友其實都有佢既倒影。有邊個細個試問唔會偶爾百厭搗蛋？等於大雄最懶，一樣得到眾人包括叮噹既原諒。抄功課自己唔駛做，睇在眼裡，自己都做過，自然會會心微笑。共鳴就係咁黎。小丸子做咁耐都係 2D，但係同家姐嗌交，偷食，詐病，扭爺爺錫作威作福，個個橋段都描寫得好入肉。ＩＮＮＯＣＥＮＴ呢個字，只應該係小朋友獨享既產物。
　
依家咁多年後，我地一個個咁，進入職場深似海。為左年終花紅，要生要死，OT 當食飯，老屈當揼骨；最終結婚，生仔，慢慢老去，我的青春小鳥一去不回來。負擔一件比一件沉重，已經連笑既閒暇都無，遑論再去睇一集卡通片。我地由一枝鋼筆，到成套西裝依家都要講係咪名牌全外國手造進口，遠遠已經唔記得過往如獲至寶既，只係史路比鉛筆，叮噹筆袋，又或者就係小丸子既貼紙同拍子簿。
　
小丸子又有心事，呆望雨。今晚這場雨，大概會繼續落一晚吧。