(beta 公測版本)
< 返回

《做廢老其實唔難》

日期:2018年7月7日

岩岩雷教授 Simon Lui 講下年金計劃幾有趣。
 
一早明言,自己唔識數學,但五十後殘廢都好快退休,本身就已經無乜錢,所以呢D野好值得關心下。雖然驟眼單純從年金計劃黎睇回報的確唔係太高,好唔吸引,但係我覺得有一個好重要既因素無考慮:
 
就係政府可以直接俾你既長者生活津貼,即係長生津。
 
查一查,高額長生津既每月總入息唔可以超過$7,820,而資產總值唔可以超過$146,000。但正如羅局長一早已經係自己個網誌唱通街[註],駛左年金化既錢,就唔當係資產。換句話說,如果我本身有100萬,係拎唔到長生津既,但係如果我用左呢筆錢黎年金化的話,我就可以每個月有$5,800蚊年金收入之餘,而同時符合拎長者生活津貼既資格(好似係)!
 
雷教授岩岩指出左根據佢最基本既計算,$5,800回本期長,而且低於通脹既回報率,理論上應該要將年金起碼提升到七千幾數先夠有著數,而正好,高額長生津可以填補呢個缺口。依家長生津高額係有$3,485,幾乎係一百萬年金化既月入既60%,而長生津有個最好既因素,就係佢一定會同通脹類似既物價指標掛勾,一定唔會長年跑輸物價,咁樣兩個相加,一個月就已經有接近一皮野,回報率即刻拉高好多。
 
唔好唔記得長生津入面,「逆按揭計劃下每月所獲得款項不包括在內」,「家庭成員或親友金錢援助」亦都唔計資產。換句話說你想做廢老,其中配搭可以有無限可能,每個月有免費錢洗晒佢,其實可能真係唔難,政府有法津罅比你走,點解唔走。然後一定要排埋公屋,極速上埋樓。到時成皮幾個月咁你都咪話香港特區政府唔關顧你老人家呀!哈哈哈。
 
以上唔係精密科學計算,只供參考。錯左唔好話我。LOL
 
補註:<<長者生活津貼—細說由來及與公共年金的配合>>
局長網誌。2018年5月6日。//另一位65歲的男士在退休時有60萬元,則其資產已超過長者生活津貼的限額,但如將其中的50萬元加入「公共年金」,每月可領取約2,900元年金;而由於他手上只餘下10萬元,則會符合資格領取6月1日起實施、每月3,485元的高額長者生活津貼6。換言之,他在兩項安排下每月共可獲6,385元。//

全文 697 字 (唔計英文、空格、標點)