《懷念「勁老」林尚義》

我地成日依家都屌關愛座廢老。但另一面，其實都有Ｄ勁老。可惜佢地就真係老，所以死左，結果往事只能回味。
　
每四年世界盃都會懷念阿叔林尚義。無人真係好仔細去解釋過點解阿叔講波會特別好聽。我諗有幾個原因，第一，佢自己係香港足球球壇曾經處於高峰期既球員。自己真係落場踢，又係好波之人，甚至有重炮手之稱，佢講波本身就係自然之極，亦有權威係入面，唔係咁易受到挑戰。
　
第二，阿叔唔係只係識得踢波，有受過高等教育，讀過中大經濟系，更重要既係佢教過書，學郭家明話齋，唔係一般波牛，而係有文化人，對學生有解說能力，講波睇比賽解釋進度，阿叔更加可以照本宣科，駕輕就熟。第三，阿叔完全無保留話俾人知點先可以講到一場好波，就係要保持中立，然後唔好講呢度好，呢度射得差就算。而係點解好點解差，甚至如果佢自己落場，或者佢係教練，佢會點做。
　
阿叔熱愛講波，佢考個教練牌，並唔係打算去教波，而係親口承認話想自己講波講得好Ｄ。呢Ｄ咪真係叫專業精神囉。所以阿叔唔係會就咁ＤＥＳＣＲＩＰＴＩＶＥ話依家邊個邊個傳球，邊個射波，就咁就算，而係會嘗試推斷，之後個場會有人點踢，點走位，甚至係教練係落後／領先果陣，會點樣改變戰術。而就係咁樣講，成場波先會變得更生動有趣，有時真係俾佢講中，呢Ｄ就係講波既價值。
　
其實好多野都係一樣。例如股票樓市日日都有財經新聞不論係記者同財演都會講Ｄ升升跌跌，但呢Ｄ絕對唔係分析。真正既分析，唔係阿豬阿狗都識講，而係真係有ＩＮＳＩＧＨＴ係入面。如果唔係，好快機械人都可以自動ＧＥＮ埋把聲去講啦。好可惜阿叔走左，真係後繼無人。一來香港足球沒落，二來入行門檻極窄，三來亦無人會重視，講得好唔好根本無人關心。
　
要真係追求質素，我成日都同Ｍ群講，不如睇鬼佬台算。就算今年ＶＩＵＴＶ講，我一樣唔覺得特別比ＴＶＢ專業左，只不過係無左堆廢水咁解。ＡＮＹ肥，我地睇下巴西點出局喇。