《港產片食用方法》

唔知大家有冇咁嘅經驗：你約人睇港產片，結果對方回應話：港產片有咩好睇？

我通常喺呢個時候都想答佢哋，港產片真係好好睇！

誠然，你以啲咩荷里活標準去睇，港產片十之八九都係爛片，甚至如果電影都有普世價值，港產片真係電影界嘅北韓都未定。

我哋都唔好講咩特效呀大製作，純以劇本嘅合理性、一致性同埋劇情嘅節奏、巧妙同心思，恐怕就連英美嘅電視劇都遠勝港產片。

但係，我覺得以西方標準評論港產片真係唔係咁公平。打個譬喻，好多人認為新詩係垃圾，係因為佢哋仲以古詩嘅標準去點評新詩，但事實上新詩係自成體系嘅，你應該以新詩嘅標準去讀新詩，否則自然會得出新詩都係鄺俊宇體嘅結論。

又例如如果你以傳統歌劇嘅標準去聽流行樂，咁陳奕迅都會係垃圾，而以一般流行樂嘅標準去睇rap，咁Eminem 都會係九流音樂人。

咁睇港產片要以咩標準去睇呢？要以爛片嘅標準去睇。咩為之以爛片嘅標準去睇？即係唔用腦，唔思考劇情，只要集中於當下嘅感受，甚至嘗試去欣賞佢嘅爛，咁佢帶畀嚟你嘅快樂絕對唔會遜於荷里活大片。

你要接受一句說話：「爛片都可以好好睇。」
然後你就可以嘗試跟足以下嘅步驟去欣賞一套港產片：

1）放空嘅你腦袋，唔好去思考，唔好去問劇情嘅因果。

2）要記住，你睇緊嘅係一套港產片，而唔係啲咩歌劇或者劇情片，所以唔好因爲誇張嘅演技同埋表達手法而感到尷尬，因為呢啲嘢正係你想要嘅。

3）喺劇情有唔合理嘅時候，你要嘗試以谷阿莫嘅心態去睇，咁你唔單只會覺得一切都變到可接受，你仲會覺得有少少幽默。

4）遇到低俗嘅笑點嘅時候，唔會懶清高，要放下身段，盡情去笑，盡情去感受歡樂嘅氣氛。

5）啲人成日話就算睇港產片都唔使去戲院睇，戲院係睇大場面嘅，科幻片，動作片先要去戲院睇，其實唔係，港產片先係最需要去戲院睇，仲要揀多人嘅場去睇，因為咁嘅話，你真係欣賞唔到劇情，都可以觀賞觀眾嘅反應，而且人多自然有弱智光環，當大家都笑嘅時候，你自然會收起腦入面嘅防火牆，畀位腦殘病毒入，對於港產片嘅各種缺點都一一免疫。

6）最後，如果你真係頂唔順，你就當魚樂無窮咁睇啦。

7）最後嘅最後，唔好以歧視嘅眼光睇港產片。好多人一聽港產片嘅名就避之則吉，好似自己係幾咁有美學水平，審美眼光獨到咁。但係其實，大家只係偏食一嚿屎，而拒絕食一嚿上一輩食開嘅屎（如果你覺得港產片係屎嘅話）。其實誇張到令人尷尬嘅表演手法，又或者疆屍咁嘅演技，乃至食完大麻嘅人先寫得出嘅劇本（又或者嗰啲令你開始覺得電影業為咗壓榨員工而開始將劇本外判畀庇護工場嘅劇情）喺好多大家鍾意睇嘅嘢入面都存在。無論係韓劇，定YouTube 片都充斥住呢啲垃圾元素，但係大家仍然可以樂在其中。

究竟，係大家對港產片嘅要求太高，定對佢嘅偏見太深呢？

如果大家當港產片就係加長咗嘅YouTube 短片，一定會有唔少驚喜，入面大把寶藏呀。