《【純文字系列】忍》

我想由今日起寫一個新既純文字系列。
　
系列名未諗。題材唔定，出文期亦不定，字數唔想太長，因為網上碌黎碌去，大家慣左無耐性，五百字都話ＴＬＤＲ。但最重要係：一定用番粵文做媒介。
　
話說在前頭，希望大家可以多Ｄ俾讚同分享之餘，自己都嘗試寫下粵文啦。行動就係最實際，進攻有時真係最佳防守。
　
開鋪第一篇我想扮正經講下個「忍」字。
　
根據我粗淺既估計忍係個形聲字。但係睇落去其實都幾會意味濃。一把刀架係個心上面，要幾痛苦先做得到呢個心如刀割既行為。忍，就係明明見到係違心之論，都想盡辦法若無其事，頂硬上，就係開講都有話：Good一聲吞左佢囉。表面睇落去個人無咩野，其實內裡不知花緊幾大既力氣，先可以咬實牙關渡過一日。
　
呢種做法明明係違反常性，但係普遍價值觀都對忍呢樣行為係歌功頌德，如果唔係都唔會話咩沉默是金，百忍可成金，小不忍則亂大謀，忍一時就風平浪靜，啦。舊時細個教育唔知你係咪都係，Ｄ老師一早就灌輸呢種變態既觀念：就算上堂急都盡量忍住唔好去，忍到落堂先去就最好喇。依家如果仲有咁教，俾人踢爆，一定告虐兒。但「懶人多屎尿」，我相信就算係依家都總會有人提掛。唔知點解去個廁所都要俾人打入十八層地獄。痴撚線。
　
香港人就係咩都忍，忍以為傲，忍既程度一早達火影級。當然，唔忍又可以點呢。一定有人反問。繼續死忍爛忍，返工忍，放工忍，俾人插隊賣黃牛忍，俾人話廣東話係母語又忍，一於忍忍忍忍忍。
　
係涵養，定係早已喪失人性？忍。