(beta 公測版本)
< 返回

《十五年。張國榮》

日期:2018年4月2日

哥哥咁樣一走,原來已經十五年。

哥哥好似象徵既正正就係舊香港一切美好既大集匯咁。佢就好似紅樓夢果塊用黎補青天既石頭咁,岩岩剩番最後一塊,成為通靈寶玉在留落凡間一樣。哥哥最紅既年代,係粵語歌曲最輝煌既年代,亦都係所謂港產片即香港電影最賣座既年代。哥哥一同果一代既天皇巨星如梅豔芳羅文等人一樣,有絕對支配舞台既能力,一踏台板就如同變成另一個人,一舉手一投足,不論跳舞,還是唱歌,全部唔係渣流灘,而係超一流既水準。

哥哥唱歌太多經典,唱到街知巷聞,今日就算一首風繼續吹,都可能仲有小朋友識得唱,但單係唱歌邊足以形容佢既全部?果度都只係佢演藝事業既一部份。佢去拍既戲,亦都係套套經典,無論係英雄本色,胭脂扣抑或係倩女幽魂,霸王別姬。。。能夠不論古代現代,係公子哥兒定係要反串花旦,造型都令人為之驚嘆,要玉樹臨風有玉樹臨風,要美麗動人有美麗動人,好似就算咩野角色,佢都可以駕馭得黎。有時上天或許就係不公平。不論係先天因素,同埋後天努力,後人根本無辦法可以追得上哥哥。

但係依家既香港,好多時候想法都仲係好封建既。而十幾年前香港,對於哥哥想係演藝事業中再突破再革新,都俾人鬧扮女人,係人妖,而且亦都對於哥哥既性取向評頭品足,甚至當時既傳媒都無放過佢,甚至話佢發老姣等等。哥哥自己亦都有諗唔通既地方,以至就算佢最後患上情緒病,就算有睇醫生,醫生都無辦法挽救到佢,佢最後幾經掙扎,一樣要選擇係復活節假/愚人節夜晚,係香港文華酒店一躍而下。哥哥係傳奇,毫無疑問,但咁樣成為傳奇既一刻,無疑教全世界既人為之心碎。

此玉只應天上有。好多美好既野,好多時候人都唔識得珍惜,往後先懂得係追憶,但呢種想法又有何用。最後補一筆:依家南韓韓風吹遍世界,但係朋友去親韓國都知,當地娛樂圈無不極度崇拜周潤發、張國榮,人人都有過著乾濕褸既一刻,扮過張國榮,希望以佢地為榜樣。依家香港仲剩番咩可以擺上世界舞台既角色,我真係唔係太清楚。但觀乎香港呢個圈子咁多年來既轉易,或者哥哥永遠活在我地心裡,留住最美麗既一刻,先至係最好既。

依家想必香港文華酒店又係一片花海吧。

全文 775 字 (唔計英文、空格、標點)