《【傲嬌】李嘉誠退休其實無乜野值得講 》

李嘉誠退休。其實無乜野值得講：
　
細細個就已經聽屋企人話，如果好似李嘉誠咁有錢就好。果陣我都唔知道究竟李嘉誠究竟有幾多錢，有錢到一個點樣既地步。我相信甚至去到一個咁既金額，連佢自己都唔會知道自己某一秒有幾多錢，因為隨時下一秒，又已經多左幾十個億。。。。
　
我諗係好多香港人既眼中李嘉誠都係商人同成功既頂點。第一桶金咪又係靠元配呢個講法姑且劈去不論，但係佢的確睇準左當時香港既經濟政治生態，成為地產商去分經濟起飛同埋高地價既豐厚成果，而且佢既行業更加染指到各行各業，每一個人既生活所需，從自己住既地方，到超級市場買送，腳踏既水泥地，進出口既貨櫃碼頭，睇緊既電視節目上網寬頻接駁，甚至到港島區既電力供應，所有野都離不開李嘉誠既五指山。
　
我舊時成日都唔明白點解有Ｄ都唔係好賺錢既行業都要拎係手。但係後尾我先慢慢發現，李嘉誠既目光可能真係放得好遠，佢做果Ｄ深入民生所需既生意，或者想得到既，除左利潤之外，正正就係各種各樣既銷售數據。佢會從呢Ｄ數據，徹底了解到呢度既人口既需求同口味轉變，呢個可以令佢更清楚了解係地產項目入面，究竟應該買邊Ｄ地，發展邊個地方。如果我既估計無錯，李嘉誠可能早係二三十年已經玩緊依家講到上天既乜鬼人工智能，並且不斷去壯大佢既事業王國。
　
香港人對於李嘉誠既評論，係極之矛盾既，一如好多其他事情一樣。一方面欣賞佢既真知灼見，努力不懈，正正反映左甚麼上世紀獅子山精神白手興家香港故事之如此類；另一方面唾罵佢從商吸血，從政府身上拎著數，做地產商，起發水樓，畫奇則，賺盡香港人血汗錢，而且就算係各行各業都有佢（或佢既團隊）從商必奸既手影。其中幾家上市公司玩財技，砌靚數，更係層出不窮。
　
係貧富懸殊日益嚴重，有樓就天堂，無樓就地獄既情況下，仇富情緒日益高漲，李家誠係一種好似ＬＩＮＥ入面壓榨下屬衰老闆既象徵。曾經有人仔細研究究竟點樣先可以係香港生活但係完全割離同誠哥既所有關係，但後尾發覺係接近不可能既。除非係從此離開香港，否則誠哥都猶如係神一樣，係一個你永遠接觸唔到既高度，等你日日俾錢佢駛。
　
正因如此，打風返唔返到工，竟然都可以成為李氏力場既一種超自然象徵，從網上世界，講到現實生活，似層層講到天文台掛八號前真係要哀求誠哥閂左力場先有得掛一樣。但即使如是，香港人仍然係認命既。如果俾佢地做到誠哥，或者入到誠哥公司可以扶搖直上，大把人一樣仆住做。我相信大家都係認同誠哥既實力既。所以誠哥無論點係你個袋到搶錢都好，佢笑騎騎起黎個民望仍然會俾任何一位特首都要高。
　
９０歲退休。佢都可以話係守到個王國然後成功交接叫做做得好圓滿。你話佢開始撤出香港，佢亦一樣好少理。但誠哥真係從來都無寶不落既，有好多野既布局，日後咪會水落石出囉，講多都無謂既。我諗我最後只能夠講，搵到佢咁既名利地位，都仲可以日日話咩四點起身游水然後開始返工持續咁多年，然後見到咩ＡＬＰＨＡＧＯ捉棋仲有興趣去鑽研ＡＩ仲即刻諗點樣係呢方面買野既，佢都真係意志力好強勁既一個人黎既。話係屬於佢既成功方程式，亦不為過。
　
只不過，係香港，再有人咁努力，都絕不會有第二個李嘉誠。我諗呢樣野係可以１０００％肯定。如果話佢從１９９６年起足足用左２０幾年去佈署退休，我諗中間好多動作，都應該要重新拎出黎檢視，研究。對香港依家既情景，會多一番了解。。。