《返工有感》

有時都會有朋友問我，點解係公司會上唔到位。但係我真係想坦白咁講俾大家知，呢個問題同：點解我無男女朋友一樣，根本係無辦法知道正確答案係邊。
　
而職場既情況可能更加複雜，因為牽涉既人更多，你作為公司既一粒棋子，往往都唔係一個老細既決定，而係好多老細一齊決定，甚至係大家係背後互相角力既結果。係公司做得好唔好，雖然有Ｄ職業會有Ｄ可以量化或者透明度高到可以人人都睇得到既指標（例如職業運動員咁打到世界級就係世界級，唔會話單憑關係一樣野就可以長做長有）。但係辦公室就唔會係咁，同埋有好多野就算可以量化，你細老細都可以遮住，又或者用番Ｄ主觀野黎ＡＳＳＥＳＳ你，輕易將你擊沉。
　
你可以話唔係電腦世界主宰既一日，呢Ｄ野都係死症黎，講既不外乎都係際遇同埋命數。ＴＥＡＭ入面有條友係交際手腕強勁既，隨時吹得一兩嘴樹上隻雀可以俾佢吹到落到黎，但可能佢老細咁岩係實幹型，唔鍾意Ｄ好似得個講字既人。要記住我既字眼，係『好似』，換句話說，果個人可能係既ＴＡＬＫ得，又做得既。但就係因為老細眼中覺得佢唔夠實務，甚至覺得佢輕浮，於是就樣樣野梗係都唔會睇得好順眼架啦。
　
咁換轉另一條ＴＥＡＭ有個直頭係博士學位，成績同履歷都係勁到爆晒炸既，但偏偏佢老細只係鍾意成日飲飲食食傾生意交際應酬，實務野咪搵我，佢最鍾意既就係不斷ＰＲＥＳＥＮＴ同ＰＲＥＳＥＮＴ係度做最佳推銷員。咁果位實幹既人咪又係永世不得超生囉。你或者會問，車，咁如果兩個可以咁岩調番轉，咪會好好囉。但呢個世界，往往都唔係咁樣操作。
　
有時口碑一開始做差左，就之後再幾好都係乘零點五。而人言可畏既野就係，一兩位老細講過一兩句負評，其他人就算唔係話完全信晒，但都會有戒心，會唔願意犯險，大ＰＲＯＪＥＣＴ一定唔會過俾佢地，咁邊有機會表現自己，邊有機會搶分，甚至上位拎ＢＯＮＵＳ？你話嘩咁都好兒嬉啫。咁呢個世界就係咁架啦。你睇ＤＯＮＡＬＤ　ＴＲＵＭＰ退出ＴＰＰ，好深思熟慮咩？道指波幅一二千點一兩晚，背後又有好多艱深理論咩？ＢＩＴＣＯＩＮ上到兩萬再跌到六七千，人類社會就係不嬲都係咁兒嬉。
　
講好聽Ｄ就係際遇，其實好多人上位都除左實力好多都係靠運。有能力既人比比皆是，但係辦公室政治明爭暗鬥，好多識避又好，唔識避或者避無可避都好，亡魂亦都不計其數。唯有都係睇開Ｄ真係當打份工算。工在人在，工亡人亡，做生意就有。如果唔係，你有貓咁九十九條命都唔夠死。如果唔係爭果一萬幾千開飯，倒不如睇開啲算。以上只係點點感想。完。