《分靈體悼念2017》

好喇好喇好喇，話咁快又差唔多黎到２０１７年既尾聲喇。你係咪又開始想感嘆緊自己一年又一事無成呢？咁岩晒大家咁話，唔怕徙多幾分鐘係度睇我９吹啦。
　
（當然今年做左好多野既恭喜你～更加要睇埋落去啦ＬＯＬ）
　
我相信好多人係今年，都會對於自己既將來或者香港既將來係感到無比咁灰心同絕望既，而呢兩樣野唔多唔少都會互為影響。例如本土派俾人夾粗打走晒，一地兩檢方法亦都係類同，種種現象係話俾你知唔熱烈投共係無咩其他出路既（詳情可以請教方老先）。當然世界亦都好混亂，北泡肥仔搞搞震，ＴＲＵＭＰ　ＴＲＵＭＰ原來只係識得係咁發ＴＷＥＥＴＳ，而英國脫歐就搞黎搞去都只會最後搞出一個大頭佛。係各家自掃門前雪好似愈黎愈明顯既情況下，當然更加無人理咩中東問題、氣候變化種種一直都係咁棘手既野。
　
無錯，其實成個世界都係充滿住失望。周圍都仲係有戰火呀種種隔離呀傳染病恐怖襲擊等等，好多人都好想快Ｄ世界末日，但係又無發生，所以只好夾硬繼續生活。當然我唔會講果Ｄ「其實香港相對起其他國家已經好幸福」呢種廢話，因為香港既樓價同租金仍然係全世界最高既，你要用成副身家去買一百呎，實在好難會覺得幸福。只不過，大家可以有時窮遊下，返老家日本抖下氣，雖然因為自己衰又好社會衰又好，最後又一事無成左三百六十五日，但係你總算都仲有Ｄ方法去逃避現實，都總好過突然成條街爆炸你就咁一命嗚呼呀。
　
市儈Ｄ講，留住條命仔（同埋攬住幾個臭＄）都係幾緊要既。就等於某Ｄ戰略遊戲打到去最後一兵一卒，你已經俾人搶晒Ｄ地，死晒所有兵，然後無晒金銀銅鐵錫，但你往往都係想留番最後一口氣，想復辟，想東山再起。雖然遊戲同人生似乎無辦法直接去比較，但你有時諗下，依家有Ｄ野甚至比ＧＡＭＥ　ＳＥＴＴＩＮＧ更加兒嬉。你又何苦迫自己一定要做悲壯既英雄？做狗雄，甚至 #戀熊，有時或者係一條新出路黎。
　
當然去到某些時間係咪要殺身成仁，係 #選擇 同 #意義 問題。退一萬步黎講我都想大家記住要審慎地（樂）悲觀，最好努力地係新一年嘗試下唔好咁頹廢，真係認真咁樣裝備下自己，雖然依家睇落係無路可走，咁唯有只能等既係下一個機會。有定無完全係唔知，但鑽研下自己既興趣呀，諗下點樣可以令到自己伴侶開心Ｄ呀，孝順Ｄ唔仆街既父母呀，呢Ｄ如果係力之所及既野，做到出黎有成果，咪可以自己都高興下囉。我成日都係果句，大局控制唔到，就玩小局；小局都搞唔到，咪就咁做好一樣小事囉。
　
今年都比上年係度寫少左好多文喇。而且又成日都唔係香港，人又懶左，ＦＢ又唔俾我Ｄ文曝光（當然ＭＥＤＩＵＭ開左我連舊文都無時間理）。當然，我知道大家都已經好習慣我唔係一日四五篇文去轟炸你既生活架喇。希望大家新一年可以平平安安啦～ＹＯＤＡ　ＦＩＲＥ～（意思係新年快樂咁解，好似係）