《貨幣和比特幣》
前言
呢排啲Bitcoin咁火 早知前排就買多啲啦
而家真係揼心口呀
另外又成日聴啲新聞話 乜嘢區塊鏈區塊鏈
到底咩鏈嘢呀？
啲報道通常都解釋得唔清唔楚
甚至乎只係話連大摩細摩徐志摩
都掟咗億億聲落去做研究呀
信者得救呀 有無咁神呀
老老實實到底Bitcoin係咪一個騙局
炒唔炒得過呀？
呢條片會清清楚楚解釋返Bitcoin同區塊鏈係咩嘢來
佢到底應該值幾錢
裏面保証唔係抽象嘅比喻
亦都無複雜嘅數學 又或者睇唔明嘅符號
因為我數學都好渣
第一部份 貨幣
喺揭曉Bitcoin值幾錢之前
我哋先講講到底—錢—係咩嘢來
唔知大家有無諗過
我哋生存除咗靠Wifi之外
就梗係食飯㗎啦
但係銀紙又唔食得
散銀食落肚 𡁬都𡁬死呀
到底點解錢可以買到嘢食㗎呢
糧食充當貨幣
其實唔係好耐之前
大概即係百幾二百年之前左右啦
又真係好流行用糧食來當錢使㗎喎
例如之前有用鹽做貨幣嘅食鹽專賣制度
開講都有話 不為五斗米而折腰呀
以前官員啲俸祿 除咗銀両之外
又真係有米呀 絹呀 炭呀 鹽呀
呢啲實際可以用嘅嘢㗎喎
始終食得用得最實際吖嘛
但係用食物做貨幣唔work㗎喎 點解呢
第一 唔方便攜帶
以物易物你拎住幾千斤米周街走咩
第二 容易私自提鍊
搞彎哂成個經濟市場呀
第三 難以標準化
你富士米同泰國米都唔一樣啦
所以隨住航海業嘅發展 國際交易嘅頻繁
就興起用稀有嘅金屬來做貨幣喇
宜家所講嘅一元一圓
喺一開始發明嘅時候又真係一個圓形嘅銀仔來㗎喎
稀有金屬點解會貴呢 就係因為佢稀有吖嘛
唔係隨便喺屋企地下一挖就挖到啲金呀銀呀之類㗎嘛
而且金屬又唔易爛 容易攜帶
純度仲好容易check添
再標準化埋啤哂做一個一個嘅銀仔
就更加方便流通啦
聽落係咪好perfect先
金/銀本位
噉當然係有問題先至有故仔繼續講啦
頭先講到貴金屬係要挖先至有
呢個亦都係佢最大嘅問題
退一步諗一諗貨幣嘅意義係咩先
例如 當你做咗一件工作 就會收返一蚊嘅人工
假設工資係噉樣先啦
遲下科技進步 有電腦幫手
你好快手就做完咗一百件工作
咪應該收返一百蚊嘅人工囉
但係全球挖礦嘅增速又點會跟得上科技發明嘅速度吖？
變咗你做到一百件嘢嗰陣時呢
可能亦都無一百蚊可以畀得到你
最多例如畀得到十蚊你㗎啫
另一個角度睇呀
即係以前一蚊買到一件嘢 而家十蚊就買到一百件嘢喇
噉我收埋啲錢 遲下先至用仲好啦
呢個現象有個名 叫做「通縮」
最後大家就收埋收埋啲錢唔會使
經濟循環就噉樣就會崩潰喇
簡單啲來講呢 貨幣供應係要同生產力匹配
先至會穩定㗎喎
但如果貨幣供應同挖礦速度係直接掛勾㗎話呢
政府都好難去因應時局去做任何嘅調控
貨幣供給 vs 生產力
我哋睇下有啲乜嘢係會影響挖礦嘅速度
又或者生產力會有好大嘅改變先
一 例如發現新嘅金礦 所以三藩市有另一個名叫舊金山囉
二 科技嘅改善
例如二十世紀發明咗電腦 生產力即刻爆發呀
三 唉…打仗呀 講個秘密你知吖
目前為止 所有世界大戰都係喺20世紀裏面發生
所以呢 只係用貴金屬來做貨幣嘅話就搞唔掂嘅
金融業界就諗咗兩招
一 部份準備金制度
二 用紙幣
部份準備金制度
Fractional Reserve Banking嘅意思係
當你掟100蚊入銀行嘅時候
銀行就梗係唔係收埋喺夾萬郁都唔郁啦
而係只會留X個%喺夾萬 例如10%噉講啦
即係話剩底嗰90蚊呢 其實係會拎出來再借俾其他人
借出來嘅錢 入到其他銀行
裏面嘅81蚊又可以再借過喎
最終碌下碌下 100蚊就發水變咗做1000蚊出來
中國大陸嘅準備金要求就係噉樣嘅
你見佢都成日都會郁呢個%去控制個貨幣供應㗎
而香港同美國呢 就係利用利率來控制多啲
不過呢個就係題外話喇
打仗 和 紙幣
20世紀初戰事頻繁 要用真金白銀去畀軍餉
有國共內戰啦、美國南北內戰啦、第一次世界大戰等等
但係唔出糧嘅話鬼會同你推磨咩
呢個時候呢政府就諗咗一招 就係紙幣
上面寫住「憑票即付」係政府畀你嘅一個承諾
隨時可以換得返做真金白銀嘅意思
但背後咪係真係有咁多金銀back住呢？
政府會話你信住先啦
但無論點都好 一般來講呢 政府都會認返自己發行嘅紙幣嘅
例如你可以用佢來支付欠政府嘅錢 即係好似交稅噉樣
但打仗始終要使好多錢 亦會損耗自己嘅GDP
最後最後會被擠提或者通貨過份膨脹
因為貨幣濫發 根本無足夠嘅生產力去支持呀
大家開始失去信心 紙幣就會大幅扁值
中國國民政府亦都喺1948年、49年
發行過一啲叫做金圓券、銀圓券嘅嘢
唔使一年就變哂廢紙喇
睇返世界其他地方吖 全世界都差唔多㗎喳
一打仗就要大幅篇值 通賬 去支付軍餉
一戰裏面打輸咗嘅德國就慘慘豬咯
馬克銀紙拎來當牆紙噉樣貼
當燃料燒咗佢來暖下個身仲平過用柴呀
一戰之後
1918年一戰結束之後其實都相安無事咗一排呀 舞照跑馬照跳
但一到1929年左右 就突然整個經濟大蕭條
當然啦 冰封三尺並非一日之寒
10月29號發生嘅 紐約(華爾街)股災 只係個結果喇
其中一個睇法係 當時美國政府無做赤字預算
喺呢一頭有擴大基建 但另一頭就加稅加到冚冚聲
另一個講法係 因為貨幣供應唔足夠
搞到流動性有問題 然後引發通縮
銀行擠提嘅擠提 執笠嘅執笠
失業率最高去到25%
點解貨幣供應唔夠？
因為金本位囉
啲人個個無哂信心 趕住兌返舊黃金揸手
仲點印銀紙呀
有啲國家就話 即刻放棄金本位 憑票即付
就好似八萬五政策噉樣 無㗎喇
換句話講 就好似宜家嘅QE 大開印鈔機
第一條黑色線就係美國嘅人均收入數據
喺1933年 小羅斯福上台
6月5號一放棄咗金本位 經濟即刻見到轉機
金融災難埋下的炸彈
好翻唔夠一年半載 到咗1939年
哈 又打仗呀 之後又通賬呀
時間關係我哋跳到1945年 當場仗就打完喇
嘩但係經濟立立亂點收科好呢
上次大蕭條陰魂都未散
呢一刻呢 美國就係最強嘅
隔住個海扔咗兩粒原子彈就收工
歐洲亞洲爛到一pat嘢噉樣呀
所以啲戰勝國
喺1944年7月喺美國嘅Bretton Woods度開咗個會
傾傾點樣搞 簽咗個協議
成立咗一個叫做布雷頓森林體系嘅嘢
結論就係 大家都信哂美金 就好似信黃金一樣
第一 美國聯儲局向大家保証隨時都可以兌返做黃金
第二 保証美金會提供足夠嘅流動性
避免金本位彈性唔足夠嘅問題
廿幾年後
相安無事咗廿幾年 之後…唉…咪到美國囉
阿寶都要出來講返句呀真係
越戰今次一打就打咗廿年
國力幾強都有個限度啦
外國開始信心不足
紛紛都向美國提出要兌返哂做黃金呀
噉美國又點回應呢？四面楚歌呀真係
時任美國總統尼克遜就喺1971年8月15號
星期日發表咗個電視講話
I would like to suspend temporarily
the convertibility of the dollar into gold or other reserve assets
突然之間就話唔再兌黃金呀
而且仲加進口稅 希望國民內部消費噉話呀
本來講就講係90日嘅臨時政策
但係根本就返唔到轉頭
呢下就叫做 Nixon Shock
所以喺一夜之間 全世界嘅貨幣都變咗做自由浮動
同金 同銀 都無哂關係
法幣時代
迎接我哋嘅就係法幣時代 Fiat Currency
法幣 法幣 個意思就係一個貨幣嘅意義
就只係喺法律裏面寫住嘅啫
講穿咗 唔食得㗎
但係至少大家都可以用來交下稅
噉大家都係法治社會
依法治國嘅 一定唔會有問題嘅
之後1987年香港股災
單日插水嘅跌幅仲多過經濟大蕭條嗰鑊呀
但係今次就醒喇 因為大家都係用法幣
即刻調整貨幣政策去做啲嘢
對民生嘅影響相對細好多
甚至乎日本之後仲風光咗好幾年添
即使而家話「失去嘅十幾廿年」
都無經濟大蕭條咁大鑊啦
大家都仲好鍾意去日本旅行吖
後面2000年嘅金融風暴 2008年次按危機
QE量化寬鬆 美國開印鈔機
呢啲大家都比較熟喇
因為就係用咗法幣
先至可以有咁多花臣 去對應唔同嘅時局需要
貨幣？
兜咗咁大個圈即係點呀？
講到尾其實就係唔食得
一個錢點解可以買到嘢食
純粹只係每個人嘅信心
又或者Econ 101學嘅 供求管理來㗎啫
同啲金 銀 糧食 無哂關係㗎喇
第二部份 比特幣
講咗噉多政治嘢 我哋返來Bitcoin啦
Bitcoin係世界第一隻Cryptocurrency 加密貨幣
由2009年1月3號開始運作
由一個叫做中本聡 (Nakamoto Shatoshi) 嘅仁兄所發明嘅
但係中本聡呢個只係網名 真人係乜水從來無人知呀
目前用過最細嘅交易單位係
百萬分之一個BTC 亦叫做一個satoshi
但係技術上其實可以做到更細㗎
總之交易嘅時候唔一定要一個一個bitcoin噉去做
比特幣價格
我哋再望一望Bitcoin嘅價格
喺2017年中 Bitcoin喺中國嘅成交額 佔全球交易一半以上
Okcoin係三大交易所之一
由2013年初400蚊人仔一個bitcoin
去到(2017)年中差唔多二萬蚊人仔一個
到底Bitcoin值咁多錢 呢個價格又係邊個定㗎啦
你買過股票就知㗎喇 未買過嘅話而家話你知
其實係買家同賣家各自出價
個價一交差到 啱嘅就會成交喇
最後嘅成交價就係所謂嘅定價喇
交易所只係方便大家喺一個地方上面叫價㗎啫
本身就唔参與定價嘅
而世界上除咗okcoin 亦都有好多其他交易所
提供加密貨幣同法幣之間嘅兌換服務
Bitcoin交易同時下流行嘅紙黃金ETF雖然都係電子嘢
但背後嘅意義就好唔一樣
紙黃金ETF始終只係類似部份準備金機制噉樣
由個發行商去跟貼個金價
你買一両ETF並唔係真係可以兌返一両實體黃金揸手
而Bitcoin交易目前都係實實在在噉去買賣
買完係可以提返出來
放入去自己控制嘅電子錢包裏面
比特幣價值
雖然Bitcoin就唔食得吖 亦唔可以用來交稅
但係據講十幾萬個商號係接受Bitcoin支付嘅
最少你仲可以用佢來交WannaCry嘅贖金吖
亦都有好多不法份子係用佢嘅私密性來做黑市交易貨幣
就好似荷里活電影裏面用啲碎鑽來做交易
貪佢匿名度夠高呀
有人話Bitcoin其實就好似1637年荷蘭鬱金香狂熱噉樣
亦都成日有人拎佢來同De Beers點樣
將成個鑽石行業吹出來一噉樣去做比較
一句到尾 Bitcoin嘅價值同法幣、黃金 差唔得好遠
信就有 唔信就無㗎喇
講咗咁多 Bitcoin到底有幾值錢大家都心裏有數呀
比特幣特性
跟住落來就講講
點解Bitcoin又或者區塊鏈 咁受Fintech所追捧㗎呢
佢後面嘅技術 到底又係咩嘢葫蘆 賣緊咩嘢藥呢
我首先講下Bitcoin有啲乜嘢特性
然後後面再解釋係點樣做得到嘅
Bitcoin係無人監管
亦都無一個人或者一個政府
可以隻手控制佢嘅發行量或者做假
發行量係固定而且仲可以預知嘅 唔會突然間有QE
賬目係公開嘅 所有交易全世界可以見得到
但係錢包係匿名嘅
即係大家會見到有幾多個bitcoin由A錢包轉到去B錢包
但係錢包屬於邊個㗎呢 無一個中央登記
甚至乎 其實每個人 隨時都可以開新嘅錢包
比特幣如何產生
既然無中央嘅控制 噉bitcoins又點樣產生㗎呢
其實就係要靠電腦去挖出來
平均每10分鐘就會有新嘅區塊被挖出
而挖到嗰一部電腦呢 就會得到bitcoins作為奬金㗎喇
呢個係bitcoins唯一嘅生產辦法
奬金一開始係定咗做50個bitcoins嘅
但喺每挖出210000個區塊
即係大概4年左右之後 就會減半
2017年嘅宜家每挖出一個區塊係會有12.5個bitcoins
而由於係對半遞減嘅規則
換言之已經有80%嘅bitcoins係挖咗出來㗎喇
仲有 每挖2016個區塊 (大概兩星期左右)
就會調整呢個挖礦嘅計算難度
即係無論有幾多部電腦一齊挖
都會維持大約係10分鐘挖出一個區塊
上面嘅規則都由中本聡設計
寫哂喺bitcoins嘅設計文檔裏面
嘞 噉點解係每10分鐘呀 每四年減半㗎呢
其實就好似玩包剪揼噉樣
點解包係贏揼 揼係贏剪呢 無得解㗎喎
成個問題重點應該係
點解Bitcoins呢啲咁奇怪嘅規則
都有人跟住一齊玩㗎呢
你呢條問題問得真係好
我都好樂意去解答
乜嘢係區塊 乜嘢係挖礦
其實首先要了解一下 乜嘢係Proof of work
工作量証明
我哋睇一睇屏幕上面嘅 二次元方程式
X到底係乜嘢呢
花少少時間 計一計就會得出
x其實係等於6 又或者等於9
但係如果有人一早話你知x=6或者9
要check下啱唔啱 一sub入去好易就知喇
而挖礦就係叫電腦做類似嘅嘢
當然啦你要電腦去解二次元方程式就未免太低B喇
Bitcoin要解嘅 係SHA256雜湊函數
所有嘅雜湊函數都差唔多
只需要將放入去嘅原文稍為改一改
計出來嘅結果就會變到阿媽都唔認得
而數學上亦都無可能從呢個雜湊結果
去推敲返原文係點嘅樣
Bitcoin要電腦去計嘅問題係
IT9 is awesome後面仲要加個乜嘢數字
先會令到佢SHA256嘅雜湊結果係由零開頭㗎呢
而呢樣嘢只能夠一個一個逐個撞 逐個試
如果由1開始撞起嘅話呢
就會發現去到11 就會撞出係零開頭㗎喇
我哋會話11係呢次需要嘅nonce
噉個問題只係問 要一個零開頭嘅話 就梗係易啦
但係如果改一改 問十個零開頭需要嘅nonce係乜嘢
即使係電腦 都需要一啲時間同運氣先撞得出來
宜家就可以講一講區塊係乜嘢來
區塊其實係一個好大嘅文件
裏面有好多筆交易資料
包括全世界想進行嘅轉賬交易
以及獎金入賬嘅呢一筆都係一個交易
仲有上一個嘅區塊ID
而所謂嘅挖礦 就係要喺呢一堆內容上面再搵一個nonce
令到佢得出來嘅雜湊值 要喺指定嘅難度範圍裏面
回帶講返個難度範圍 係由大家動態所協議出來嘅
務求令全世界平均十分鐘先挖得成一次
全世界要挖礦嘅電腦 就係講緊要搵出呢一個nonce
一搵到就會連個區塊內容廣播出去 公佈天下
而啲電腦收到之後
就會驗証一下個區塊係咪符合Bitcoin嘅規則
例如個nonce有無計錯 雜湊值係咪符合難度要求
確保交易資料都無問題 例如獎金啱唔啱數
有無一coin使兩次 等等
Check過哂個block都無問題嘅話
就可以加落個blockchain 即係區塊鏈上面喇
裏面所包含嘅交易數據就會永遠成為歷史嘅一部份
生得最高最長嗰條區塊鏈呢
就係當前公認嘅bitcoin交易狀態喇
如果一個人要改寫區塊鏈嘅歷史
就一定要快過哂全世界嘅電腦
計過哂啲nonce 但即使係噉
頂多都只可以將啲交易還原
而偷唔到人哋嘅coins㗎
所以Bitcoin講緊就正正係呢一套規則
就正如「包剪揼」就係「包剪揼」
如果突然間走咗去玩「包揼小出」
雖然都係用手玩
但呢個就係另一個遊戲來㗎喇
即使Bitcoin本身要升級
都要全世界超過一半嘅電腦跟住升級先至會生效㗎
中本聡嘅接棒人成立咗一個組織
去帶頭改進Bitcoin嘅技術
但係規則本身就係公開嘅
大家有自由去用 或者唔用組織所推薦嘅軟件
就好似上網噉樣吖 都有好多種瀏覽器可以揀
連官方組織都無辦法焗住你用佢嗰一套呀
2017年8月1號 Bitcoin就正正經歷咗一次規則嘅大升級
兩個版本計出來嘅區塊鏈內容唔再兼容
我哋叫呢種情況做Hard fork
生出來嗰一套 叫自己做Bitcoin Cash
最終宜家呢 各有一定數量嘅支持者
就變成咗兩套獨立 又有一定市場價值嘅 加密貨幣喇
區塊鏈呢個發明就令大家即使三五識七 各懷鬼胎
都可以得出一個共識嘅狀態 而且仲無辦法做假
交易唔再需要依賴一個中央嘅機構
唔使銀行 唔使政府 唔使Visa Master 支付宝
所以區塊鏈呢個概念 咁受大家所追捧
其他加密幣
全世界有Bitcoin Litecoin
乜coin 物coin不下幾百種加密貨幣
有啲只係抄Bitcoin嘅規則 但係改一改時間嘅參數
噉就變咗套新嘢㗎喇
有啲呢 會專登將個Proof of Work
設計成一啲好有趣嘅實際用途
例如 計算下質數噉樣吖
至於有無市場價值 可唔可以買飯食呢
其實就唔關區塊鏈事㗎喇
然後呢？
上面仲有一啲好重要嘅Bitcoin部份係無提到嘅
就係交易、錢包、Smart Contract係點樣運作
仲有點解挖礦嘅會有誘因
去將所有嘅交易數據都包哂落個區塊裏面呢
想知道嘅話 可以click一click右上角呢張咭
最後如果覺得呢條片係有趣嘅話呢
就記得Like同埋Subscribe我嘅Channel
仲有Follow埋我嘅it9gamelog Facebook Page呀