《香港大富翁》

我成日覺得有Ｄ野甚至唔需要訴諸數字。唔駛睇咩人口普查。因為稍為對香港既社會發展有Ｄ了解，就會知道以前上位一定會相對比依家容易：
　
首先，齋睇收入係無用。香港最重要最重要都係資產，香港經濟發展最高峰時期係六十年代至八十年代。香港果陣岩岩經濟起飛，邊個有儲夠既錢去執平地同資產邊個就係依家既富翁。大既有大既執靚地變成依家既地產商；細既有細既去買所謂藍籌屋苑依家收租收到手軟。而香港果陣作為中西交集之地，兩次都係因為強國政局動蕩而加速發展。香港係果陣，絕對就係發走難財既地方（我唔太相信強國好香港好。。）。政局穩定，自由市場，食四方飯，就係經濟發展既利器。
　
香港自從開始中英談判就已經走入一條直路。英商退，華資上，李嘉誠等人因此開始得以操控財經大脈一躍成為巨富。而係八十年代末九十年代初，仲有中上層開始出現大量真空既情況。第一，英國大班要返老家，所以就算佢地唔想走都要走；第二，香港人有經濟能力既，唔少都對香港前途感到憂心而移民澳美加。呢個就係所謂既移民潮。不論係前者同後者，都為當時走唔到既人提供大量既上位機會。所以，中下階層都有得發圍架。
　
有人以玩左好多盤大富翁黎形容依家既香港。的確係咁。呢個就係資本主義既玩法，資源最後一定會聚係有能力既一群身上。而更甚既係，九七回歸後香港經歷兩次大浪，一次係九七九八金融風暴，另一次就係零七零八世界次按引爆既全球金融海嘯。無能力既人，當然會因此而沒頂走上絕路。但係本錢最雄厚既人，呢Ｄ絕對係黃金機會去執平貨，去令自己財富疊加爆升。
　
點解貧富懸殊會愈黎愈嚴重？從呢個角度一Ｄ都唔難理解。淘大二三千蚊呎果陣有人成層咁掃，但係果個一定唔係你。樓價跌足八成，一般普通人已經係驚弓之鳥，正如匯豐得番三十蚊，肯博落去既一定係有經驗同本錢既資深投資者。但唔係你地Ｄ成副身家放入去都係買得幾手到最後賺一倍都只係講緊幾十萬既人。零八年入左市，依家會唔會係度嘈？亦當然唔會。不知幾開心依家。
　
我既判斷好簡單。香港一早已經風光不在，最好時代過左，依家叫水深火熱果班，就係去錯了錯誤時代，根本唔係最上層果堆可以感同身受。佢地照樣半島四季國金，然後坐頭等去日本睇楓葉印印腳，對民間疾苦自然不聞不問，亦感到難以理解。當然，係人都知，絕對唔會話當初上到位係因為時勢做英雄。邊有人會將成功既因素訴諸其他野？？梗係話自己果陣任勞任怨，而依家你地班友失敗係一定係唔捱得。換著係我都識咁講。
　
古語有云：過左海就係神仙。ＲＩＧＨＴ？玩ＭＯＮＯＰＯＬＹ踩地交租係你地班廢青渣。佢地一早做左銀行，係ＳＥＴ　ＧＡＭＥ　ＲＵＬＥ班人。根本無得玩。