《魯迅嘅１８７４》

#認真文無人睇 見到友人寫到１８７４，諗起另外Ｄ野。
　
１８７４年後五十幾年既１９２７年，大概會係好多人都茫無頭緒既年份。只能講第一次世界大戰完左無耐，德國仍然受住殘酷既巴黎和約條款而經濟陷入崩潰，世界瀰漫住一種欲戰未戰既異樣和平氣氛，共產主義同埋法西斯主義係萌芽階段，中國七國咁亂，毛澤東開始嶄露頭角。大家都未知道兩年後華爾街就會爆發超級股災，然後進入全世界既經濟不景氣，然後二戰就又再開打既黑暗時代。
　
但就係呢個時候，有一個愛國既憤青、墨硯戰士黎左香港演講。
　
呢位憤青既作品相信大家都有睇過，而係果個年代下，佢地堪稱第一代見過世面既知識份子，當然係極度不齒外國勢力同埋殖民主義。所以佢認為振興中華，係要靠自己，唔能夠靠洋鬼子既。所以就算果陣有一個死鬼佬竟然學識廣東話，向住當時既香港鄉紳，大談要大家支持係香港大學成立華文系去學習中國文化，佢係相當反對既，覺得不過係治術，好仆街。而亦都係因為咁，當時既港英政府，亦都對呢位憤青既來訪，完全係不屑一顧。因為大家根本就不咬弦嘛。
　
呢位憤青，就係魯迅。而果位死鬼佬，就係依家大家都可能有印象既港督金文泰。
　
（題外話：金文泰對香港貢獻良多，據講佢係中國通，識廣東話，仲將「粵謳情歌」翻譯左做Cantonese Love Songs添。果然，翻查魯迅舊作，真係會搵到金文泰篇演講辭，而且仲係全廣東話寫法，要由魯迅註明番「呢＝這。而家＝而今。嘅＝的。系＝是。。。」大家有興趣真係應該倔出黎睇下。）　
　
ＡＮＹＷＡＹ，魯迅對幾時黎香港既印象唔好。其實同依家既環境俾佢既感覺差唔多，一就係英警無理啦喂會搜人身同搭人番差館，令佢覺得英警果陣都相當黑；二就係佢坐船果陣亦比海關無理一再翻查行李，搞到亂晒，原來一定要俾錢先可以了事，亦即係貪。佢係「再談香港」中有如此之歎：
　
「香港雖只一島，卻活畫著中國許多地方現在和將來的小照：中央幾位洋主子，手下是若干頌德的高等華人和一夥作倀的奴氣同胞。此外即全是默默吃苦的土人，能耐的死在洋場上，耐不住的逃入深山中。」魯迅既白話文雖然係艱澀難睇，但係超越一百年既時空，似乎只要將「洋」字一改，每句仍然岩駛，絲毫不差！大家都咁鍾意又請錢穆又唐君毅，我都唔執輸啦。如果魯迅依家翻生，佢一定，哼哼晒你地班友，愛國戀殖，一律亂棍打走呀。
　
講到咁遠，究竟魯迅關１８７４咩事？原來果陣魯迅黎香港，睇開既報紙，同埋金文泰既演辭，就係出自「循環日報」，當時好似幾出名，標榜係第一份華人資本、主理既報紙，以真正反映華人，唔係英國人既意見。創報人是誰？係王韜。王係另一個奇人，有機會再談。
　
（呢篇文已經經過簡單ＦＡＣＴＣＨＥＣＫ～～鳴謝 Fanwa Kaoka）

-----
如有興趣金文泰講左乜：
-----

列位先生，提高中文學業，周爵紳，賴太史，今日已經發揮盡致，毋庸我詳細再講咯，我對於呢件事，覺得有三種不能不辦嘅原因，而家想同列位談談。
　
（第一）係中國人要顧全自己祖國學問呀，香港地方，華人居民，最佔多數，香港大學學生，華人子弟，亦係至多，如果在呢間大學，徒然側重外國科學文字，對於中國歷代相傳嘅大道宏經，反轉當作等閑，視為無足輕重嘅學業，豈唔系一件大憾事嗎，所以為香港中國居民打算，為大學中國學生打算，呢一科實在不能不辦。
　
（第二）係中國人應該整理國故呀，中國事物文章，原本有極可寶貴嘅價值，不過因為文字過於艱深，所以除曉書香家子弟，同埋天分極高嘅人以外，能夠領略其中奧義嘅，實在很少，為呢個原故，近年中國學者，對於「整理國故」嘅聲調已經越唱越高，香港地方，同中國大陸相離，僅僅隔一衣帶水，如果今日所提倡嘅中國學科，能夠設立完全，將來集合一班大學問嘅人，將向來所有困難，一一加以整理，為後生學者，開條輕便嘅路途，豈唔系極安慰嘅事咩，所以為中國發揚國光計，呢一科更不能不辦。
　
（第三）就係令中國道德學問，普及世界呀，中國通商以來，華人學習語言文字，成通材嘅，雖然項背相望，但係外國人精通漢學，同埋中國人精通外國科學，能夠用中國言語文字翻譯介紹各國高深學術嘅，仍然係好少，呢的豈系因外國人，同中國外洋留學生，唔願學華國文章，不過因中國文字語言，未曾用科學方法整理完備，令到呢兩班人，抱一類「可望而不可即」之嘆，如果港大「華文學系」得到成立健全，就從前所有困難，都可以由呢處逐漸解免，個時中外求學之士，一定多列門墻，爭自濯磨，中外感情，自然更加濃浹，唔會有乜野隔膜咯，所以為中國學問及世界打算，呢一科亦不能不辦。
　　
列位先生，我記得十幾年前有一班中國外洋留學生，因為想研精中國學問，也曾出過一份「漢風雜誌」，個份雜誌，書面題辭，有四句集文選句，十分動人嘅，我願借嚟貢獻過列位，而且望列位實行個四句題辭嘅意思，對於「香港大學文科，華文系」贊襄盡力，務底於成，個四句題辭話，「懷舊之蓄念，發思古之幽情，光祖宗之玄靈，大漢之發天聲」。