《粵劇》

［冷門野］尋日見到墳總問點解龍劍笙一出聲就已經好過陳寶珠咁多，以我好少既聽曲經驗黎亂咁評，都知道真係好難比（直接講，就係無得比）。
　
自細有跟老豆老母聽曲，但係都無見過任白真人演出，即使係錄音帶以至到網上聽，都仍然驚為天人。舉例，只要搵番任白既紫釵記（我好鍾意呢首），一聽李益開口唱，「霧月夜抱泣落紅， 險些破碎了燈釵夢」春光花月夜段，你就知道任劍輝既功力，聲線，感情，世間難以再有人望其項背！難怪就算當時連黃老霑恃才傲物至此，聽見到任姐出手，即時拜服個五體投地！！
　
仙鳳鳴果陣仲有梁醒波等大老倌，唐滌生尚在，根本講成係粵劇既顛峰絕不為過。而往後亦好大可能後無來者。當初佢地為左搵接班人，好似話搵左二千人ＩＮＴＥＲＶＩＥＷ，到最後篩篩下只係剩番十幾二十個。依家比較廣為人知既，都只係剩番阿刨龍劍笙、阿嗲梅雪詩，同埋後來轉入電視好多人都熟悉既謝雪心（江雪鷺、朱劍丹可能呢度已經好多人聽都未聽過）。
　
陳寶珠個ＣＡＳＥ有少少唔同，佢雖然話就係任劍輝收既第一個入室徒弟，但係如果一路睇年份行落去，我真係會諗既係究竟佢可以花到幾多時間去學任白Ｄ戲，因為佢拍電影已經大紅大紫，而且名利雙收，成為當時所有工廠妹既偶像。陳寶珠黎喇，人人都要讓路，可以知其當時既架勢堂，就算佢真係有心機想學，個個片商都想開佢呢個大金礦，想抽身不易。
　
反而龍劍笙就真係一直係戲班到正正經經地苦練打上去，根據我既估計任白都認為雖然個個弟子水平都未去到佢地果個造詣（。。。），但起碼都四平八穩，而阿刨應該已經係佢地最睇好，最有潛質果個。但好可惜，有時世事就係咁，龍劍笙亦都最唔聽師傅話，鍾意就去左加拿大唔返黎，鍾意就托白雪仙手爭，然後轉個頭又同其他人拍檔開戲搵真銀。咁難怪仙姐唔去睇佢既戲既又（欺師滅祖仲唔大罪？係咪好ＣＯＮＴＲＯＶＥＲＳＩＡＬ呢）。。。
　
呢Ｄ背後又牽涉到正宗定唔正宗既哲學討論。但客觀事實亦係，當初阿刨推戲，仙姐我估都有少少無奈，先只能搵陳寶珠頂上。講真，如果真係又要講咩技藝，又要講玄門正宗唔能夠亂咁搵人，計埋叫座力同埋支出收入，仙姐都只能夠徒呼奈何，揀無可揀啦。花旦方面，阿嗲最聽師傅話，但亦知道自己資質有限（好似成日俾仙姐話佢好蠢之類，鬧到喊，好慘）。。。
　
粵劇已經係老餅野喇。老一代盡力承傳，但有時都難免會花果凋零，後繼無人。岔開一筆，我覺得大家更加要警醒既係，粵語都係一樣。搞搞下講廣東話都話係老餅，唔潮既人先講，你知往後會發生咩事啦。最後利申，以上資料無經翻查，完全係童年回憶同老豆老母講落，錯左唔好怪我。鎖你鎖你。