《海枯石爛，唯有真情》

我地成日都覺得有Ｄ野好有紀念價值。
　
例如：小學日記，功課，有用堂既筆記，孩時玩具，以至到係情信，收到既各種各樣禮物，紀念冊，各種無無謂謂既野等等。但係時間對呢Ｄ野，其實都好涼薄，只要時間夠長，紀念價值就會不知不覺咁樣降至去零。又或者唔好將Ｄ責任推晒落時間度。其實個大腦既細胞，亦都對過往種種既芝麻綠豆既小事，一日又一日咁樣愈黎愈唔上心。於是紀念價值既野，到最後只係變成：雜物。
　
而雜物到最後當然就係會變成垃圾。
　
如果要真係搵番某樣野，先至記得番某年某月發生既事然後要觸動果一下，咁或者可唔可以咁講：其實都唔係真係咁刻骨銘心唶。更何況儲埋儲埋又唔會用既，每次搬屋都係從一個屋企既黑箱搬去另外一個，直頭係確確切切既黑箱作業，依家香港又已經寸金尺土，又唔係好似郁Ｄ西方國家咁有個ＢＡＬＣＯＮＹ或者屋頂將狗屎垃圾野任裝。既然係咁，又何必呢？
　
我個人經驗係舊有電腦既文或者相都會做晒ＢＡＣＫＵＰ。但搞搞下發覺原來唔ＢＡＣＫ－ＵＰ，咩都無得ＣＨＥＣＫ番轉頭，個人係唔會有任何損失。只有咁樣做，先會真正做到ＢＹＧＯＮＥＳ　ＡＲＥ　ＢＹＧＯＮＥＳ。做人真係唔需要成日去回望住過去。就好似清明重陽咁，間唔中做下咪算囉。做人都係最緊要過到自己果關唶。你自己ＰＵＳＨ自己，就會發現其實空間仲有好多。
　
或者你睇到呢度，都仍然會覺得唔係呢有Ｄ野真係點樣都唔會捨得丟走哩。或者轉下另一個場景，可能易Ｄ：譬如你係活係世界大戰既年代，你一係就要走難，一係就要因為飛機轟炸而走入防空洞，所有既身外物都隨時因為幾個炸彈而消失。就算唔係戰亂時代，如果你依家係佛羅里達，一個暴風就足以將你所有既珍藏毀於一旦。
　
紀念品都係相對的。打得仗，就唔會有人欣賞花瓶古玩。而鬧饑荒，再名貴既珍寶首飾，隨時都係換到一兩斗米。而有時更諷刺既係，想懷緬又唔真係約番舊親朋，何必以死物黎假托自己既虛偽。我依家屋企入面真係無咩唔要得（。。。除左塔嫂之外，除左塔嫂之外，除左塔嫂之外）。
　
所有物質最後都會腐朽破滅，就只有情誼不死。當然你係咪用心去守，呢個又係下一個課題鳥。