(beta 公測版本)
< 返回

《如果有得揀,有邊個男人會想開 OT》

日期:2017年8月28日

[毒者文澤]男朋友永遠都唔會同你講,因為要加班,見唔到自己女朋友,心會係度痛。
 
男朋友不說,係因為佢深明,其實講左出黎,係無人會KNOW THAT FEELING’ BRO。俾佢深夜一個擁抱。
 
我首先想問,如果有得揀,有邊個想對住一檯都係野,老闆既西面,多過見自己既女朋友。(除非佢女朋友好惡頂)尤其是果D值得慶祝既日子,BOOK好左台,明知女友會著得靚靚,背心高爭迷利裙?攬下女,鋸下扒,人生一大快事。用得著對住EXCEL幾千行剪剪貼貼?
 
選擇OT,而唔係你,的確係客觀現實。但有無諗過,其實係因為男朋友願意向你投信任既一票,先至下既艱難決定。因為,老闆絕對唔會識因為你早走而體諒你;但女朋友,總希望有一絲希望,你出到黎公司樓下,一疊聲道歉,自己女朋友係未走。就算唔能夠好開心,都可以擠著一絲微笑:
 
今晚辛苦你啦。我地去食魚蛋粉一樣唶。果下SWEET爆。女朋友要TUM,男朋友唔需要?下?又話男女平等。
 
係,你有情緒,你都可以嬲,你可以話做乜唔將自己二人世界放係第一位。再加上今日你都俾人丙完自己又黎M同事又講一輪是非果D一連串加乘因素,所以依家男朋友遲到,拎正牌發掹憎。但係兩個人係埋一齊,除左浪漫,激情,開心;係咪都有互相扶持,安慰,溫情既成份?好天開心,落雨都要一齊擔遮架?而唔係永遠問:點解唔可以你係永遠開遮果個??
 
點解唔係我重要D,係永遠都解答唔到既問題。WORST CASE,我地亦都唔會要求對方體諒既。我相信幾十萬香港仔,都唔知試過幾多情況,加完班,俾女朋友屌打,仲要調番轉頭安慰哄撮。但你自己問心呀,果下畫面,其實你條仔已經當左你係佢老細啦,先會再食得落果下死貓。呢D都係聞者傷心見者流淚既畫面黎。
 
施主咁又何必。咁樣玩,再落去,終歸會無意思。人地重視未來,你就重視現在;到人地講現在,你就同人講將來。如果無時光機,係搞唔掂既。自己買本叮噹睇睇,再諗諗吧。
#唔知點解呢DTONE
#會諗起杜文澤教訓人既時候既TONE

全文 650 字 (唔計英文、空格、標點)