《早係好耐之前，我就決定會有一日寫篇咁既野》

到有日我要結婚，我會寫篇文，多謝返晒每一個之前同我一齊既女仔。

每一段感情去到最後，大家都覺得骯髒不堪，無晒美好既回憶，只係得各種各樣既謾罵、詆譭，甚至係侮辱。大家諗起Ex，都只會諗起佢地一刀一刀係呢個心入面插，然後一匙一匙粗鹽係你個傷口到撒。但係亦都正因為咁，佢地令到我唔敢忘記，我要對我既下一位，更加之好，唔好再重蹈之前既覆轍。

換句話說，依家有幸短期修成正果，佢地都有份。

隨時年紀漸長，維持一段良好既關係，同種一棵植物，其實真係差唔多。當初唔識去愛，以為只需要將最好既野貢獻出去，咩都處處維護，咁就代表一定唔會散，其實真係錯晒。等於你係咁落肥料，日日淋水，棵野一樣會死得好快。我寫講故台既故事，入面有唔少錐心既情節，我自己都經歷過，如果唔係點解寫得出？就係因為曾經有個深刻既體會。慢慢一路傷，一路跌，再企番起身，再試，就好似踩單車咁，慢慢學識既，最簡單，又最複雜，只能心領神會既，只係平衡。

所以又有小說話，同你結婚既，唔會係你最愛既人。某程度上，呢句話唔會係錯，試問邊有人可以好似初戀咁刻骨銘心？但係又有邊個人可以初戀之後就白頭偕老？愛情要美麗，就要短暫而轟烈；但係婚姻就要細水長流，互補不足，最後不過係轉化昇華做親情。懂得去愛，就會收放，唔會再好似一開始咁，盲頭烏蠅咁亂咁撞。可能見過鬼，就會怕黑啦。

有時午夜夢迴，都會諗下，如果當初無分手，依家會點。依家個新娘子，會唔會就係佢。但係好快我就會明白，果陣都守唔住，若果等多十年，二十年，後果都可能係一樣，到時既Damage可能仲大鑊。係呢度同大家講一句，分手，依家雖然痛苦，但往後再睇，呢個大概就係最明智既決定。大家往後生活，可能更愉快。唔係大家唔鍾意大家，而係Timing唔岩，就係唔岩。所以點解Alan同幾位女角都唔能夠係埋一齊，呢個就係最佳解釋。

我其實，都一樣唔想好似Alan咁婚姻失敗。所以我亦會繼續好努力咁樣行每一步，希望可以同我既另一半可以開開心心過埋下半世。有時人既願望，就只係咁簡單。