《仲有幾日白色情人節係咪應該有d表示？》
(Paper 0)
雖然就黎考DSE，其實應該努力讀書，作最好衝刺。
但係我偏偏感情又咁豐富，真係唔知點算好。:o)
依家香港都興興地白色情人節，我係咪應該做番D野？
好矛盾。對住D Maths Past Paper 都唔想做，好煩呀！
頂，覺得自己好Seven。如果因為咁白痴野搞到考唔到，真係會俾人恥笑一萬年。
(Paper 1)
我唔係一個好聰明既人，上堂亦都唔係好聽書。
先生講既野亦唔係好明，但係個人就都仲有D自覺。
總之今鋪如果唔掂，應該都會以後都唔掂。你知香港個教育制度係幾戇居。
但係我依家究竟係度做咩？我唔係溫緊書，反而係高登到打緊無聊野，
有無邊個可以Stop 下我？但係我一諗到Maggie，我就腦中一片空白，
究竟個b^2-4ac 大過零細過零條拋物線係向上定向下都唔知。
(有讀者按: b^2-4ac 好似用黎check 有無real root 渣喎)
我真係唔死都無用喇。
其實我真係唔可以比自己繼續再混亂落去，
清醒D啦。依家咩時勢？當初唔係已經專心一志咁諗住日日去圖書館到K書架啦咩。
咩遊戲機都鎖向左走向右走晒，連班Frd 叫間唔中唔讀書去籃球場鬥一兩個鐘波我都唔鬥，
因為我知道班傻的嗎，永遠都係一兩個鐘就變左大半日。係呢個時候，我真係要痛定思痛。
就算贏唔在起跑線，都唔好輸係終點線呀。而加上依家個教育制度係如此咁白痴，
公開試改完一輪終歸都係換湯不換藥，換藥不換人。始終致勝之道，都係刨Past paper穩陣。
老老實實，其他大改科都話唔知點唶。數呢D野，我就最弱，但係佢改完個syll，唔通會忽然變左古印度文咩？所以我相信，狂操係一定有用既。只要努力，一定得。
但係就係因為我太勤力，日日懶係搭幾程丁丁過銅鑼灣中央到打躉，我先會撞番Maggie。
天呀，點解你要俾個咁既考驗我？點解？點解唔暑假考完試先？
「Matthew，估唔到會係度撞到你！」一把動聽既聲音細細聲響起。我幾乎聽唔到，因為我插住耳機。
但係個人棟左係我面前，仲要係女仔，再聽唔到，都自動曉重組句子啦。高登仔強項之一，就算其實佢第一句開場白係「我Hi 你呀」都會自動tune 到變左咁，無辦法。
我真係覺得好surprised，竟然會忽然間撞到我個小學既同班同學Maggie。我差少少都已經唔認得佢，但係佢隻眼我真化左灰都認得。因為入面曾幾何時已經有我既靈魂係度。
「你係Maggie？我都真係估唔到。」我既聲音都令我覺得好出乎意料地驚奇同意外。
「係，係呀。讀書？唔駛問啦？」Maggie 笑左一笑。佢依然係咁瘦，只係著住運動裝，似係行完山黎多D。個頭胡亂梳左個短馬尾，神情睇黎都相當疲憊。頂，邊個考生依家唔係咁樣呀？
「唉，今鋪真係死晒。我諗我都係可以打定輸數。」係Maggie 面前，我唔打算掩飾我既任何失敗。
我地曾經都青梅竹馬過（叫做），但係咁又點，其實升左中學都N年無見。
「喂咁唔講住啦，大家俾心機加油啦。我同班frd 走先囉。」Maggie 講左一句，都自動收線。於是我就帶番個耳機，同佢揮手。我又繼續對住d 莫名既公式搏殺。
係囉，就咁機緣巧合咁撞到一次咪算囉。呢D probability 雖然細，但都唔係零，只係唔會負唶（你唔好問我點解probability 係負我唔識答你），不過跟住再重新撞到就會更加難架啦。
所以，無事發生架啦。咁個故事係咪就已完左？
完佢老味咩。個天有心玩你，同考試局有心玩你，都係一好樣架渣，無譜架！
因為Maggie 係我既初戀。初戀就係最責駛，因為通常都最刻骨銘心。
但係你地唔好誤會，我同Maggie 根本上無開始到，因為佢根本到小學畢業都唔知我其實鍾意佢。
而我都唔知果陣究竟係真係鍾意佢呀，定係只係對佢有好感呀，定還是佢生得夠清純可愛呀？
我真係唔清楚。但係當我自從果日係圖書館到撞到佢一眼之後，佢個每一個細微既動作，表情，行路既動態，都開始慢慢蠶食緊我死記緊d 各種各樣formula 既記憶體果陣，我就知道，
原來我一直仲係Hi緊野，咁多年黎，就算拍過一兩次拖，散左，再見佢，佢既位置根本無變過，
係一個就好似沈佳宜既歷史高度。情況就好似你掟左舊好正既芝士入雪櫃咁。隔左好耐，
本來根本唔記得左舊芝士既存在。但到某一日，突然間再發現，原來佢都係咁好食，
甚至係好食左－－就算佢本身只係一種腐壞左既食物。
呢樣野先最難搞。
但係正如我一開始所講，我應該係可理智戰勝感性既時候。
既然我J都可以唔打，具具一個Maggie，算得係咩？無見咁耐，唔通就真係會即刻變番兵，然後赫然放棄一切，為一段根本唔知會唔會有下場既感情要生要死？
高登仔就會係咁，但係我唔會。我明白係呢個關鍵時刻，就好似選特首一樣，一定唔可以好似唐唐咁行差踏錯，如果唔係就好似佢咁就此Hi Hi，Game over！
果晚見到佢之後，我思緒真係極凌亂。仲做到D MC 錯到Hi Hi。我真係唔係好明點解五個答案入面種有一個係岩，但係我岩既機會竟然有時仲要低過1/5。究竟係我數學太差，定係我運氣太好？
果晚，我係張床到，一邊輾轉反側，一邊都係度諗緊究竟有咩辦法，可以盡快調整番自己既心情。
最衰就係屋企成日嘈到Hi Hi。D細佬成日係又玩又盛，嘈Q住晒。屋企又細，根本唔係溫到書既地方。
但係出到去圖書館溫，撞到Maggie。證明佢都會去果度溫書。雖然中央十幾層，但係溫書既地方，熱門既，黎黎去去都係果幾度，根本上就係果幾個山頭。只要繼續係果邊蒲頭，再撞番佢有咩出奇？
撞到一次，就已經個心有如此既一絲慌亂，再撞多次，咁咪會更加大鑊。所以，我覺得行為係可以改變命運既。於是我決定即時係之後果日，改變我既溫習路線，亦都改變時間：起得更早，然後
唔再去銅鑼灣既中央圖書館，改去更加偏僻既大會堂圖書館。亦都唔再搭電車，再搭地鐵。
我相信，只有咁樣做，先可以逃出到命運對我既玩弄。而咁樣，我先可以再一次調整心情，向住勝利既目標邁進－－
但係如果真係咁，我仲駛依家仲努力打緊字咩？估唔到上天已經幫我安排更加Hi Hi既事情係後面等我。
「嘩，Matthew，你係咪跟蹤我先，點解又會撞到你既！」Maggie 今次既語氣，俾上次更為驚奇。
我真係堅覺得好無奈，但又好開心。因為今日Maggie著住既係一條短裙，佢隻腳真係好靚呀－－拿諸位，純粹從美學角度出發，唔好問我，無圖無真相。
但係Hi唔係講呢D野既時候呀。點解會咁架，點解去到炮台山佢會係我同一個車卡又岩岩係同一個車門到上黎架？點解？我只可以答：「我覺得似係你跟蹤我多D。發生咩事？」我真係好想問。
Maggie 駭笑，笑話我痴線。我真係就快痴線。呢個機會率都真係低到唔可以再低。我懷疑我應該即刻去買番張六合彩，中左仲讀咩向左走向右走野書，放學啦。
不過我又好快冷靜落黎，咪住。撞到係個車廂到唶，又唔係做人世？有咩所謂，咪當傾幾句算囉。無估錯既，佢好快就會係天后落車，到時我同佢講聲Bye bye，就咩事都無，一定咩事都無。
點知：「你仲唔落車既？你唔係去中央圖書館咩？」
「唔係呀，我唔係去圖書館呀今日？」Maggie 答。
「但係你手上渣住晒一大疊書喎。」我一邊開朗咁笑住，但其實心入面不斷自己狂抽緊自己。
「哦，係呀，我發覺中史果邊d位太難搵啦。我都係唔係咁鍾意，上次同朋友溫都係佢地搵我渣嘛，我都係習慣左自己一個人修習會好D，所以我決定我都係番返去我原來溫開果度。」
「下，即係邊度呀。」
「我去番cityhall 果邊。人少少仲efficient啦。」
[yipes] [yipes] [yipes]
「你做咩呆晒咁？唔係話你又要去cityhall片書呀wa？」Maggie 隻眼碌到好大。
「我唔想解釋，但係呢個真係我本來打算去既。」我真係無奈到喊，但係Maggie 既各種動人表情，又令到我唔能夠唔去望。
「我唔相信！」好彩，我係有一個鐵證係可以洗脫我既嫌疑既。「你睇，我係買單程飛既。如果我唔係預先就想去中環，我一陣就唔會出到閘啦，係咪。所以，我完全無呃到你。」
Maggie 半信半疑。「如果係咁，都無辦法啦，Mattheew，始終我地都係小學同學，太有緣喇！」
緣你條命。依家先黎搵D咁野搞，嫌命長咩。我真係有一剎那好想話我漏左計算機係屋企然後話要返去囉。但係咁樣真係太Seven……我唔可以係Maggie 面前表現過Seven既。於是我好整以暇咁講一聲：
「既然大家都係相識一場，又咁岩去同一步，不如一齊讀啦。咁樣可以無咁悶呢。」
但係我講出口，我就已經覺得後悔，究竟我係度講緊咩呀！！！
但係禍從口出，一切已經無可挽回：
因為Maggie 即刻好雀躍咁答：「喂好喎，不過你會唔會唔方便呀，我記得你好似住鰂魚涌果度架喎。有無搬，仲係咪果度？」好記性，估唔到咁多年黎，都仲咁上心。
「因為我果陣都有俾你寫紀念冊架嘛，唔係咩。」係女仔先會將d 紀念冊睇到咁重要架唶。其他人好似我咁，都唔知本野劈左去邊。
「我無所謂，成件事一定有我著數啦。有唔識又可以問你，你不嬲果陣都已經好叻架啦D成績。」
「依家已經唔係啦。哈哈哈，喂，咁不如add 埋whatsapp囉。」
Matthew，千祈唔好呀，一俾左就萬劫不復架啦……但係shxt，依家幾乎日日係度同佢篤機咁滯。
今鋪真係大檸樂啦！！！！！！！！！！！！！
其實同Maggie 一齊溫書都唔係完全係壞事黎既，始終佢D 數都俾我好好多，所以有時唔識又可以炸加衣問下佢（其實係真係唔識）……
況且我估都係我自己多心唶。Maggie 溫起書起黎都真係好認真，佢認真到根本唔知我係度偷望佢。而有時我講野大聲少少，佢都會殊我，搞到我都鬼死咁無癮。
Anyway，咁樣咪求仁得仁囉！我同自己講，我都要俾心機呀，唔可以到時Maggie 問我成績，我已經深潛左，咁就真係唔掂囉。
我地都會有時去樓下有間美心MX到食下飯。難得可以傾幾句偈，我都好努力講D無聊笑話引佢笑，不過佢全部都唔係好識笑，只係好似禮貌咁回應我既爛Gag因而報以微笑，然後加一句：咩你咁無聊既……究竟我係咪好失敗？
其實係咁既環境，咁既條件下，我真係應該死心架啦。真架，但係唔知點解早幾日前，無啦啦，食緊公司三文治果陣，會講起大家有無拍到拖呢個問題。仲要唔知係邊個提起先，呢個擺明係陷阱啦！
但係果陣我係咁諗：唏！快D知道佢有無拍緊拖，咪可以早D死心努力操Past paper 同補習講義囉。我果陣以一個欣賞上天藝術作品既眼神，凝望天氣回暖下，Maggie 一件頭加legging 再外面加件薄薄米色外衫既美好風景。點知！
「我考Mock 之前，同我男朋友散左啦。依家都有D後悔架，哈哈！」
我驚訝莫名，唔覺意聲音高音左八度，連隔邊睇緊爽報既阿伯都啤左我一野：「下，點解呀，點解你要同佢散左呀？」
Maggie 失笑：「嘩咦，你仲好似覺得可惜過我。」佢然後拎起自己個Samsung 捽左一陣，俾我睇佢前度facebook 同佢D 相，我一望，頂，原來真係一條Seven Head黎渣喎。不過我真係唔明點解香港好多時都係美女配野獸？？
我學校又係，妖，有幾個明明成個MK 咁既款，竟然識著同區既校花，講講下仲話拍拖幾個月又已經扑埋。咩世界呀？你地究竟有無將許冠傑果陣首學生哥放過再眼內架！我鄙視你地！！
Maggie 呢個時間見我入晒神，仲要補充多句：「你咪睇佢個樣衰衰，其實都係名校出身架。但係我覺得我地之間，似乎真係有D距離囉！」
「呀， 咩你講到咁文藝架，距離係邊呀？」我呢個時候始終唔能夠接受D 咁震驚既事實，所以連自己講緊咩已經唔係好清楚。接落黎，好似Maggie 講左一大堆野，話佢點同佢前度男朋友為左學業同將來既事嘈嘈嘈。老實講，一來我無興趣，二來，我腦海入面已經塞滿左同一個問題：
咁Maggie 依家咪即係無人要？如果我要，唔知佢肯唔肯？
呢個無疑係絕佳機會黎。好明顯上天就係要擺呢個機會係我面前。就好似林書豪個粉餅咁，一個機會，就足夠揚名立萬，其他人點葡萄，點鬧點抽水，係佢地既事。有咩好得過有眼前實利呢？
Maggie 絕對係一個上等貨色，性格唔算太差，當然可能拍拖既又會一百八十度轉變，但係無論依家點睇，都係一個可愛既女仔。佢仲要係我一直夢寐以求左咁耐既拍拖對象，我依家諗番起，之前果幾個，其實都有Maggie 既影子。
公開試唔係話唔可以再黎過，人生出路唶？政府會do the rest 架啦，但係一生中至愛，只係得一個架渣喎，上天呀，你係咪依家想點我一條生路去行渣！係咪我依家根本K書到頭來都只係浪費時間，所以你先派Maggie 呢個天使俾我？
死鳥，弊家伙，得出呢個結論，真係非同小可。
「Matthew？你好似今日狀態唔係幾好咁？」Maggie 怪擔心問。
狀應都唔知幾好呀其實，仲可以隨時上馬添。我於是好無聊咁附和番一兩句完整番成個conversation（口試技巧之一）：「我真係覺得好可惜，不過，依家專心一致，努力讀書就岩架啦。邊驚以後無伴！」係？你真係咁諗？
但係Maggie聽到呢句，就大力點頭，然後忽然掂左我一下隻手，大概幾秒：「係呀，就係咁啦！有人明白我真係好，Matthew，雖然我估唔到竟然係你，哈哈！」然後佢飲埋杯奶茶，就話：「喂，上去囉，做多一年past paper 先啦！」
我已經定晒形，望番住自己隻手，好似已經完全係觸電狀態。
佢掂掂掂掂掂……左我隻手呀────────！！！！！
(Paper 2)
【9 March / 仲有5日】
今鋪真係伏已中，我今日係圖書館果陣，我不斷係算草紙到畫圈。
係呢個時候，究竟個trigonometric function 點樣solve 番條equation，已經好似唔係好重要，反而我係度諗緊，我係唔係應該同Maggie講，不如公開試之後，我地開始呀？但係我根本唔知佢會唔會鍾意 我。可能到最後都係我自己一廂情願（睇怕都係）。
之但係，我仍然懷有一線希望，既然佢呢一兩個禮拜都願意同我一齊讀書，係咁重要既時刻，都唔介意我係佢身邊，就算唔係完全有好感，起碼都唔係反感先呀。如果必要時真係淤左，咪同佢講，本來一開始，呢個只係一個玩笑囉。唔知得唔得呢……
頂，心亂如麻，頂你的肺就是這樣的意思。最衰就係圖書館唔可以大嗌，如果唔係我真係會大叫一聲Hi。好想將所有既參考書同筆都一下子掟晒出街。
Maggie 繼續發現我既不正常，佢改我既past paper 果陣發現我比平時更加之不忍卒睹：「嘩，Matthew，你咁落去真係唔掂喎。呢輪跌watt 跌得咁勁既？」
我只好對住佢苦笑。其實係一個女仔面前咁樣，我都覺得自己好Seven。
Maggie 塊臉忽然伸到好埋，我嚇左一嚇：「咩？咩事！」
「其實，你係咪病呀？呢輪唔可以病架喎，會好大鑊架喎！」
「無……無事既。可能係呢輪個天氣short 下short 下，忽冷忽熱，可能感親下架唶，返去執劑感冒茶訓一覺，就應該會無事。」
「你唔早講！」
「下，咩呀？」
Maggie 竟然好衰咁即刻掩住個口：「你病就唔好黎啦，一陣傳染埋我你話點樣算？」聽到我更加之灰。Maggie 好彩就補充多一句：
「Matthew，唔通你忽然表現差左既原因，係因為我既出現？」
我一聽之下，心即刻大力跳彈。耳根都幾乎燒紅起上黎，望住Maggie。
佢都一眼好似望穿晒秋水咁望實我。死，唔係咁快就已經睇穿晒呀嘩？
我只好努力咁作出一個唔知算唔算係辯解，定係根本上已經係承認既宣言：「呀，下，咩呀，邊會呢，唔係你諗咁樣既……」
Maggie 皺實晒眉頭：「你仲抵賴，我其實一早已經好想講，你怪怪地！原來就係因為呢個原因。」
我慢慢咁低下頭，正想將自己儲左幾日既勇氣，一次過係五秒後爆晒出黎，講一聲：係，Maggie ，我係Lum 你！只係依家呢個時間，我決定唔搞呢D感情野住，不如都係讀好書先，其他野放左榜再算……既時候，Maggie 講出更加出乎我意料之外既說話。
「肯定你都係習慣一個人讀書，所以我一加入，就騷擾到你呢？一定係咁啦。對唔住呀，Matthew，由聽日開始，我就唔會再同你一齊架啦，可能咁會對你好D？」
Maggie，你誤會晒啦！:o) :o) :o) :o)
Maggie 反而俾我更大既反應嚇親：「不如你冷靜D仲好先啦。」
我好頹，發覺事情根本上已經完全失晒控，於是我決定要去搵下d 軍師商議下件事。「Maggie，其實你講得岩，我係唔舒服唶，或者我今日早退先，我地whatsapp再聯絡啦好嗎。」然後就一個人好似阿茲卡班既逃犯咁，走都走唔切。
唔係呢……我真係唔係好識面對Maggie依家。佢就好似一個發晒光既女神咁，教我不敢迫視呀。我要搵搵我班幕僚先。
高登眾情場高手呀，你地不如都俾d意見我啦！拜託！！[banghead] [banghead] [banghead]
【10 March / 仲有4日】
話說今日係Starbucks，我同我D死黨會面，商討下我下一步應該點辦。
佢地一聽，真係幾乎連眼鏡都跌晒落地咁：「下，Matthew，你唔係依家先搵D咁既野搞呀？」我無奈點頭。「你地兩個快D諗條橋，成功又好失敗又好，總之盡快了斷左佢啦，我唔想拖拖拉拉，呢幾日完全無心機讀書，已經好慘，又好驚，好驚炒呀。」
「驚你又中伏。」著得狀甚斯文，恤衫牛仔褲係度飲緊凍mocha既，係讀書成績係我班入面都算數一數二既狂生。佢帶住粗框眼鏡，據聞係因為方大 同：「我勸你不如索性唔好再同佢一齊讀書，如果唔係盞好似吸毒咁，愈踩愈深。你想數學好D唶，最多我花少少時間教下你囉，你象徵式俾番百零蚊一個鐘我，都 算係一場兄弟啦。」
我幾乎想即席派膠俾佢：「依家我要既係解決問題，唔係逃避問題呀。你以為我搵你呢個傻Hi 教我數學就可以令到我唔諗Maggie 單野咩？你會唔會太天真呀。」狂生攤攤手：「忠言逆耳，我都係唔想睇住你死唶。」
另外一位飲緊芒果汁既，係相對上比較Sporty既真興，佢今日就算凍番咁多都仲係著住波衫。老老實實，講實戰經驗可能佢既意見會更有用：「希， 狂生你講D野如果Matthew 做得到，佢仲會搵我地出黎吹廢水咩。好明顯佢係又想溝到Maggie ，又想可以繼續同佢一齊讀書，然後手拖手共渡難關，大團圓結局啦。」
我一拍大腿，再一指：「Good brother！都係你好，我既意見正正Exactly 就係咁囉！有幾複雜唶！」但係狂生仍然好理性：
「車，邊個唔知阿媽係女人，呢個世界邊有兩全其美。我都唔覺得條女會對我地家馬公子有幾多意思。分分鐘都係神女無心，襄王發晒綺夢渣。」我頂唔順佢D冷水，於是只好冷冷咁補一句：
「係呀，已射添啦，Thanks。有無辦法呀究竟？我唔想岩岩見番佢，又嚇番走佢囉。但係咩都唔做，我又恐怕到最後我又走左寶……點解D 時間可以咁唔夾架？」
狂生冷笑一聲，呢條草食男眼裡面只好讀書同埋其他琴棋書畫，好明顯佢唔會明白我既感受。我既希望只好放係真興之上。真興望住支芒果汁，隔左一陣，都話：
「Matthew ，講真，今次真係有難度。唔通依家呢個時勢都仲慢慢去溫女咩，博取佢既歡心咩。真係唔能夠太兵行險著，始終依家公開試二合一，真係一試定生死，有無必要為左一棵樹，燒左成個森林？你有真係諗過，係咪值得架先？」
我頹然：「散會。」
真興見到我失望之情溢於言表，就急急話：「但係，都唔係完全唔可以試下既，不過你要技巧D，同埋真係一就一，二就二，失敗同成功左都唔能再繼續搞落去。你又唔係醒，到時死左真係無得翻身，香港D女仔唔會等你，到時你一定Hi Hi。」
狂生搭嘴：「計我話，仲搞咁多野做咩呀，都諗左白色情人節係deadline，咪白色情人節求其送少少野俾個女仔，試探下，得咪得唔得咪算。」呢D都算攻 略？之但係真興都話：「其實都係，依家做愈少野愈好。最緊要唔好提早game over，無論邊一邊都要keep 住，呢個就係你要達到既目標。」
其實我真係好想講佢地講既野真係廢中之廢，但係我仍然忍住：「無啦啦14/3送野俾佢，係人都知咩事……」
真興搶答：「咁又唔一定既。14/3 香港一來無咩人慶祝，二來就算係日本，都係回禮之日，應該係女仔送完俾男仔，男仔先送番作為答謝。佢既然無送野俾你，你送野俾佢，有咩唔掂既都好易兜到。」
得唔得架。我真係覺得靠佢地兩個先係成件事最失敗既其中一點：「咁我想問我應該送咩呢？自己整定係買呢？」
真興同狂生互望左一眼：「呢個真係問題，但係我覺得你應該送──」
我聽到，心入點真係下左一聲。唔係呀嘩，係咪真係會work架？
(Paper 3)
【11 March / 仲有3日】
「不如咁啦，如果送朱古力未免太著跡；不如易易地，整細細塊既芝士餅啦。」真興竟然獻出一條咁既妙計。
我幾乎要即刻係個Starbucks到爆粗：「你唔係講笑呀？整野食？無啦啦整咩野食呀？我平時都係煮個即食麵渣，你依家擺明俾蕉皮我踩唶？」
點知狂生竟然都Buy 呢個idea：「唔係呀，做呢樣野，真係有無限可能。你就話你自己興趣整俾屋企人整剩既，多謝佢教你讀書架唶。如果佢估到，就會估到，神情會有異，到時你 就可以再評估下點樣做。如果佢咩都唔知，或者佢扮唔知，甚至想當眾拆穿你，你都可以進可攻退可守。你立於不敗之地。」狂生陰陰側咁笑：
「你唔駛咁擔心，芝士餅易整到一個地步，連小學雞都識整。你唔需要整得太好食，如果太好食，先引人懷疑。人係，就懷疑你係Gay既；二黎，你太為佢，就會容易穿崩架啦。」
我仍然好抗拒。Hi你，讀讀下書無啦啦去左整甜品，咩道理呀？俾屋企人發現我忽然間發姣仲大劑啦：「我驚到時我老母以為我讀書讀到精神失常渣。」
「死蠢，反正你都通宵片書架啦。等你屋企人訓晒先靜雞雞整咪得。」狂生說完就已經係智能電話禁出個食譜俾我睇，我拎黎一望，咦，又真係好似幾簡單喎。
我將信將疑：「有無更好既辦法？」真興縮下縮下個膊頭：「唔覺得有俾呢個更好。」
我問：「或者唔好咁複雜，你估我唱首歌得唔得？」真興同狂生對望，然後就轟笑起黎：「你？唱咩歌？陶吉吉既愛很簡單？咁唔係仲難兜咩？哈哈哈哈哈！」
真興仲嫌笑我唔夠，居然係個位下面拎左個結他出黎：「我最近讀書讀到悶悶地彈下結他，點知彈多一兩陣就臣臣地，拎左去琴行整，岩岩先拎番。拿，你既然咁想唱歌，學番一招本式，自彈自唱啦？」
真興然後同我講咩Chord 啦，咩fret 啦盛啦，聽到暈低咁滯。真興話：「試下禁實D 線，然後彈黎聽下。」點知一禁，嘩，痛到Hi Hi之餘，仲要難聽到咩。隔左一陣，隻手已經抽筋，急急還番個琴俾真興。狂生笑吟吟：
「見人擔挑不吃力。平時見其他人彈結他掃下掃下你就以為好易？其實唔難？我勸你都係專心一意，整個小形芝士蛋糕罷啦。我估Maggie 點都會有腦，識得諗下既。就算無意思，做個好朋友先夠係成功一步啦。至於你仲要發揮到一個咩Stage，就真係睇你造化啦。」
結果，就係個晚深夜，我係廚房，對住堆材料發晒矛。
頂你，雖然講到，就咁溝埋，但係原來都係有技巧架囉。D成份一做得唔岩，個蛋糕就唔能夠成形，就算雪幾耐都雪唔硬。可能最易整既，就係個餅底，只要將個消化餅打到碎晒就已經係。於是我將我既怒氣同怨屈，發洩晒係件餅到。
而就係呢個時候，竟然有人跳左入廚房。我大驚一望，發覺原來竟然係細我五年既細妹。大家唔駛J啦，發育不但未完成，而且仲戴住個大近視眼鏡。
我深深嘆一口氣：「喂俾你嚇死，你咩事。做咩仲唔訓覺。」
妹好好奇咁望住我：「我肚餓，所以入黎搵野食再訓。你係度搞咩東東？」
我臉色一紅，即刻用老牛聲大喝：「關你咩事，快D去開你既午餐肉罐頭然後食完訓覺啦。」妹完全無理我，結果俾佢睇到我用緊既器皿同材料，亦立即俾佢知道咩事：
「Tiramisu？阿哥，你無病呀？整俾邊個食呀？」
「都話唔關你事。」「你唔講，我叫阿爸阿媽入黎睇你搞邊科。到時你同佢解釋啦。」我大急：「頂，你依家係咪玩野先？」
妹撐著腰，對住我古惑咁笑。「我整俾一個朋友既，因為佢幫我補習數學！」我十分低音，驚死會驚動其他人咁。
「哼哼哼，有古怪。不過見你咁坦白，即管就唔理你住啦。」然後妹就自己開雪櫃，拎左幾個包出黎，茶幾茶D蒜容醬就掟入個爐到焗。我咕嚕左一句：「咁夜都仲食到咁重口味。」
「你叫我唔好理你，咁你唔好理我啦。我真係想知道到最後邊個咁幸運會食到你整既你個所謂蛋糕，希望唔駛入醫院啦。」隔左一陣，佢拎走晒D麵包，就走左。
真係好Seven。我覺得自己真係好Seven。頂，仲要做到幾時先成功呀？諗諗下都有D肚餓，個死女包，仲拎走晒D麵包。想我死咩？
唔知依家Maggie做緊咩。俾佢知道我咁為佢，佢可能會笑死。
(Paper 4)
【13 March / 仲有1日】
其實依家已經係晚上九點幾，離十二點凌晨都唔夠三粒鐘。
三粒鐘之後，就係三月十四，白色情人節。好明顯市面上係大致平靜。絕對係唔會好似二月十四正日咁高登好多毒男已經呼天搶地，而花檔當然係同平日無分別啦。呢個道理，就正正證明左男女既不平等，現實既不公。
但係依家，我依舊係好惶恐不安，就算依家渣住隻滑鼠，亦都不斷流緊汗。千祈唔好問呢幾日溫書進度係點，當然係零進度啦。不過我發誓，過埋聽日，一切都會雨過天晴，就算得好唔得好，就當還自己一個心願，然後努力拚搏，打出一片新天。
今日係圖書館，我用唔係好自然既語氣，細細聲問Maggie：「喂，你聽日無咩做呀嘛。」
Maggie 好奇怪咁望住我：「依家除左溫書之外，仲可以有咩做呀。」我再用試探既語氣問：「咩你唔知聽日咩日子咩？」
Maggie禁兩禁個計算機後，終於clear 左個ANS，停左手：「聽日咩日子呀？咪就係星期三囉。」然後佢頓一頓，忽然懶係認真咁微笑講：
「哦，我知喇。」我心口好似俾果D醫生劇個D用黎電垂死病人既電極電左一下咁。點知原來佢講既竟然係：
「聽日唔係你生日呀嘛？我無買禮物俾你架喎。」我倒抽一口涼氣，然後就掟走手中舊擦子膠：「唔係呀！！！算啦，無野啦。咁好啦，我地聽日繼續讀書啦。」
Maggie 好似望住神經病人既眼神望左三十零秒。我幾乎無郁過，只係個背脊到爬滿冷汗。今日Maggie 件啡色毛領連身裙背粉紅色絲襪，好嬌俏呀。「我發覺Matthew 你最近真係好唔妥！你真係有野既話，真係要話俾我聽啦！有咩壓力，大家分擔下好D。」
我唔理佢，繼續努力地做練習，但當然又係錯到離晒譜。我極低聲自言自語：「唔怪得呢個世界有人話會為女死為女亡啦……」
Maggie 好明顯聽唔到我講咩：「下？做咩自己吱吱尋尋呀？」
我嘗試分散佢既注意力：「喂喂，呢條個Quadratic equation 究竟點樣拆括號解呀？除左用萬能式之外都係唔識用factorisation……」
「咩呀，咪教左好多次囉，都話係咁羅……」聽到Maggie 又好一五一十咁畫晒算式又箭咀又盛，我真係好想聽得入耳。但係我更加想既係，Maggie 話佢都鍾意我，攬住我話：
「Matthew，我地要一齊考完個DSE，然後去旅行呀。」然後再櫻唇微啟，再咀埋黎，話，甜到呢……
「拿，所以咪就係咁囉，個root 係24 同 -13囉！」
我毫無表情咁讚嘆：「係喎，唔該晒。」
結果，我心不在焉咁做完今日既Study，然後心不在焉咁睇住個電視，等到依家，又開始有D猶豫不決：
究竟，禮物應該送，定係唔應該送？我應該講，定係唔應該講？
如果唔講出我心中所想，我應該都會毫無懸念咁炒左成個Exam。但係如果講出心中所想，但得來既係一大塊檸檬，我可能都難以振作，然後炒左個Exam。但 就算Maggie 真係鍾意我，而我地到時天天拍拖，咩都唔拎理，分分鐘都一樣係炒左成個Exam。如果咁多個可能得出既結果都係一樣，我係咪照去，然後應該死左先算？
狂生同真興都不約而同Whatsapp我：
「聽日，命運在你手！」
「其實落雨又有咩好怕wor；希望在明天呀嘛！」
「生命滿希望，前路受重創──呀唔係係由我創至岩。記住呀，就算幾唔開心都好，搵我地傾傾先。無咩既，唔會好淤架唶。我地大不了都係笑你一頭半個月！」
我咬咬牙，掟開左電話。成班都係Hi Hi黎。睇黎今晚都係唔會好訓得著…
(Paper 5 – Finale)
三月十四。
白色情人節。
係街上邊走，發現果然係一切如常。
我依舊係圖書館，同Maggie 坐埋一齊。表面睇黎，好似一切平靜。
但係我個內心，其實就已經好似湧起左千尺既海嘯咁，久久都不能平伏。
唔知讀到黎呢個Chapter 既諸位，有無共鳴或者同感。
但係你鍾意一個人果陣，你會發現，你既眼光，始終唔能夠離開果個人。
就算，有一枝槍，已經放左係你後腦入面，已經拉埋扳機，有人已經喝住你，叫你唔好再望，一望就打到你個腦開花──
但係一個鐘頭，兩個鐘頭後，你就會唔經唔覺，已經將焦點重新咁放係你既意中人身上。
呢個同一般鹹濕佬既猥瑣式“目及”野唔一樣。
因為佢地既目光，永遠都只會放係幾個位。
但係當你鍾意一個人既時候，你就會好想佢每一個地方都要睇清睇楚，幾乎要搵個高清相機拍低晒，再返屋企慢慢欣賞。絕對唔係變態，反而係人情之常。
因為望住佢，已經成為生活必需品，係動力既來源。
就好似Maggie 依家只係係我隔離做緊野，佢果種專心，心無旁驁，真係令我為之傾倒。
今日，佢著住件藍黑既碎花裙，牛仔褲，白色平底鞋，修長既身影，起伏有致既線條，好有懷春少女既味道（自己係度穿鑿附會）。
佢既頭髮係耳仔兩邊，似係零亂又有條理咁放左落黎，加上心形既粉紅色粒狀耳環，令到我覺得佢今日根本上就殺死人。
無化妝既佢，好似水一般，清純，無雜質。
有時佢會做到一條數，而相當開心咁握住拳頭；有時佢諗唔到野，又會皺晒眉頭；至於更多時候，佢都係專心一意咁樣，係個notebook 到係咁寫寫寫，似乎根本上無理會世間既一切一切，圖書館岩岩有幾多人行過，又或者邊個細路同邊個細路係度爭住個iPad玩，等等。
佢既呼吸如蘭一般細致，依家十分之平和而有規律，換句話說，佢依家就算唔係享受緊過讀書既過程，佢都唔係十分之抗拒係圖書館度日片夜片。係萬千考生之中，咁有定力既人，究竟有幾多個？
我真係唔想問呢個問題。因為我知道一定係得好少。我更加唔想諗既係，究竟如果我突然間攬住佢，再同佢講，我鍾意佢果陣，佢究竟會點。
會唔會發晒癲？然之後即刻摑我一巴，然後朋友都無得做？
定係根本會繼續若無其事咁拒絕我？
還是根本當聽唔到，等我知難而退？
係十四號晚，果陣我諗深一層，我發現就算我得出「炒左個考試都唔緊要」既偉大理論之後，我都立即覺得慚愧。
我好似有D自私，而事實上我的確係：因為我根本上無諗過Maggie。
如果我令到佢都集中唔到，之後炒埋個DSE，咁樣點算？
唔好講其他野，可能佢父母好想佢考得好好，就係因為我呢個Seven Head，就令到佢名落孫山，咁我咪亞太區有一天成為亞太區硬街？
我可能令到首位DSE 入面其中一個女狀元消失。然後高登仔又少一個女神，呢個罪名，我又是否擔當得起？
我真係唔係又想威，又想戴頭盔。而係人一去到感情路上，梗係多野諗。賭檯上，一係唔去，一去就梗係想要晒架啦。等於D口痕友講：上床既話，唔通真係上張床到，跟住各自訓咩（唔知點解覺得呢個形容好貼切）。
正當我仍然一邊欣賞緊Maggie 既美態，一邊內心作出最後既交戰既時候。Maggie 頭都唔望住我，但係佢忽然細細聲同我講：
「我終於知喇。」佢咁樣講。
「知咩？」我見佢忽然講野，反而吃左一個大驚。
「咩呀。」佢白左我一眼，然後索性係我本作業簿到寫。相當秀麗既字跡：
「你呀，尋日唔係問我究竟今日，三月十四，係咩日子咩？=D」
！！！！！！！！！！！！！！！！
@_@ [shocking] [yipes] @_@ [shocking] [yipes] @_@ [shocking] [yipes]
@_@ [shocking] [yipes] @_@ [shocking] [yipes] @_@ [shocking] [yipes]
！！！！！！！！！！！！！！！！
我即刻流晒汗。唔係呀嘛，咁無得玩架啦喎。真係學有位巴打話齋，成個檸檬已經放晒上台咁滯啦喎。
真係，真係估唔到，Maggie 竟然會自爆。究竟之後發生咩事，且看下回分解。
（待續）
果一刻，我真係發晒矛：
「今日？今日其實無咩特別，我當初都只係純粹問下架渣。」
我好似梁振英尋晚辯論咁，將唐英年既指控急急否認。
但係Maggie 笑左一下，就話：「你唔駛呃我喇。你當初問得我，就心知肚明啦。總有一日我都會知既，係咪？」
我無言。估唔到Maggie 真係咁心水清，已經知道我對佢既諗法。我合埋眼，等候佢既裁決。
「其實……」Maggie 吸一口氣，就話：
「今日係3-14，係愛恩斯坦既生日呀嘛。考我唔到既你！」
我真係目瞪口呆，估唔到Maggie 會講出一個咁反高潮既答案。
「我都返屋企諗左好耐，先記得起，今日係愛恩斯坦既生日。好彩之前香港科學館有個展覽講佢，我同我個Ex 果陣去睇先記起渣。」然後，佢又自顧自以讚嘆既語氣同我講：「估唔到你對呢位咁偉大既物理學家都咁有認識。我真係好鍾意佢既其中一句名言：月亮係咪真係你 望住佢果陣先真係存在？」
我苦笑左一下，「咩意思？」
Maggie 撥一撥頭髮，呢個動作雖然係極之動人，但係對於我依家黎講都唔算有咩值得令我高興了：「我都唔係好識架渣，不過聽聞佢同另外一D 科學家係度拗呢個Quantum physics 果陣講既。如果你真係有興趣，我諗你要了解下Copenhagen interpretation……哥本哈根的解釋先。其實我真係對數學物理好有興趣，如果第時上大學可以揀黎講Major 就好啦！」
咩哥本哈根的解釋呀？東莞的森林我就話睇過唶？Quantum？我連F=ma 都未搞得掂啦。Maggie 你依家係咪唔想我食檸檬，所以另外搵D野黎向左走向右走化我呀？
但見到Maggie 已經好似陶醉係自己既一片充分數式既天空下，我又唔覺得佢係玩，一時之間，真係唔知可以講咩好。
幾分鐘後，當Maggie 仍然係度滔滔不絕咁講愛恩斯坦既論文對後世物理學有幾大既貢獻果陣，我長嘆一聲，終於打斷佢：
「唔係呀，Maggie，我諗你搞錯左喇。我想講既，其實由此至終，都唔係呢樣。」
Maggie 一呆：「下，唔係咩？今日明明係愛恩斯坦既生日，唔通我記錯？照計唔會嫁喎？」
我搖搖頭：「唔係，你無記錯，只係我想refer 既，唔係呢樣野咁解。」唔知點解，我依家都要爆番一句半句英文出黎增加番自己既學養。
Maggie 貶一貶眼，好明顯等緊我既解釋。我深深吸一口氣，終於拎起一支鉛筆，先畫一個圓圈，然後再畫一條直線將個圓分開一半：「假設呢個圓既圓周係P，而呢個係直徑D，咁P除以D係……？」
Maggie 笑左起黎：「咁簡單既問題你都問我？唔係數學真係差到咁呀嘛，呢個咪就係pi囉。通常公開試，都會用3.14黎表示架嘛。」
我木無表情：「無錯，就係3.14，今日就係三月十四日，所以亦都叫做pi日？」
Maggie大驚：「下，pi日？真係聽都未聽過！」我豁左出去：
「無咩既，當初都係見你教我數學教得咁起勁，先問下你有無聽過pi日唶。但係你竟然唔知，老老實實，我真係有D失望。」Maggie 急急話：「咩呀，咩係pi日呀，你係咪作黎玩我架喳！」
我神情變得極認真：「當然唔係。Pi日真係有好多人慶祝，只係香港人文化水平低，先唔知道今日有幾神聖。係美國，好多數學系既學生都會係果日食批 慶祝，或者一齊討論同pi 有關既數學問題。至於著名既麻省理工大學MIT，仲會係果日將入學申請既決定書寄出去俾申請人。至於愛恩斯坦到過既普林斯頓大學鎮更加唔駛講，佢地更加會 舉行盛大既嘉年華。」
「真係估唔到。」Maggie一副被打敗左既樣：「我真係唔知呢樣野呀！睇黎我除左計數之外，其他野既知識都仲有待打強。」然後佢一臉感激：「真係多謝你呀Matthew，我地不如一陣都去Café 食個雞批慶祝下，然後再一齊讀書呀！」
我微笑，話：「當然無問題。」忽然間，電話震起上黎，我就講：「我出去聽個電話先。」
出到去，一禁個掣，就聽到阿妹把聲：「喂，阿哥。」
「點呀，依家打黎。個芝士蛋糕試食，食唔死你呀嘛。」
「食唔死呀，OK 啦。話晒你都失敗，失敗再失敗，然之後先成功既一個產物。唔係咁易架喇，我試過，應該都入得口既。」
「唔駛講咁多廢話喇。」
「咁點，你係咪一陣返黎囉？」阿妹一陣嘻笑聲。
我咬一咬下，終於有左決定：「唔駛喇，你同我食晒佢啦。如果有剩，就分俾你老豆老母啦。」
阿妹一陣驚呼聲，真係好鬼誇張：「下！！點解又唔要喇？？整得咁辛苦！！」
「你咪理啦，我改變左主意。」
「出師未捷身先死？」唔知點解佢會識佢咁深既野。但係我已經唔想理：「叫你食就食啦，唔食就Dump左佢啦，唔好煩喇。」
「你講真？」
「講真。」
「咁我唔客氣喇。」阿妹歡呼一聲，「記住呀，我唔會俾番D材料錢你架，仲有，我都未必會俾阿爸阿媽食，費事佢地問長問短啦。你話係咪。」
「係係係。你鍾意點就點。仲有，今晚溫書，唔會返屋企食飯。」然後我就率先熄左個電話。
返到埋位，我發現Maggie 已經俾以前更加努力咁溫緊書。佢話：「知識呢D野真係無窮無盡，Matthew 你依家真係激發左我。我決定要快D考好個試，面前仲有好長既路要走架！」我點點頭，亦都裝模作樣咁拎起筆，拎番正個計算機，又開始拆括號，將D 數字丟黎丟去……
White day，白色情人節？其實唔係，我終於明。係日本韓國呢個先係解釋，係香港，或者中國大陸地區，呢個可以譯為「白果日」。有咩拎值得特別？
幾日後，我同真興，同狂生又約左係同一間starbucks 飲野。
「你無野呀嘩。」佢地知道左我既真相之後，不約而同地。
我眼神望去遠方：「留低一個美好既讀書回憶，咪更加好。我依家只係知道，我同佢應該一齊發奮，有咩到時先再講，都未遲，依家真係唔應該分心喇。」拎住一杯凍Mocha，我一副世事已經看透了幾分既模樣。
真興向我遞上一個粗口手勢，表示強烈不滿：「我地幫你出謀獻策，點知你到最後居然戴頭盔，真係唔係一個男人。你呢D咁既反應，就算寫上高登，咩你覺得有人會放過你，唔派膠俾你咩。」
狂生托一托個眼鏡，亦都搭嘴講：「你又係既。早知係咁，一開始徙咁多時間做咩？又講到無左女神就唔得咁，依家又扮勤力，轉軑仲快過振英哥，咁樣真係唔係好掂。恐怕我地唔能夠就此收貨。」
我語氣十分平淡，「凡事總有遺憾既。再過三四十年，我娶左老婆生埋仔，就會知道，Maggie 係我生命條timeline 之中，只係一點小event，無咩值得再著重去講，權且只係一個紀念。所以依家點都係前途緊要D。或者，其實我都唔係好Lum佢唶。」
但係班死仔好明顯唔肯放過我，仲要搵依家最HIT既特首大便論式做句黎口誅筆伐我：「張健元，你唔好呃人喇。」
「你。講。大。話。你知唔知對住死黨都講大話，係好得人驚既。」
「Starbucks 唔同圖書館，依家呢度唔係你既主場，係我地既主場。唔該你快D講出事情既真相。呢個係重要既誠信問題……」
我真係頂佢地唔順，於是重重唔將杯野飲放係檯上面，搞到D倒汗水珠都周圍飛：「可唔可以Seven少陣？」
佢地仲係一邊擠眉弄眼。
「你地根本唔明！我並唔係想咁輕率改變主意既。只係──」
「只係咩野！？」
我輕輕嘆一聲。「你地唔真正理解Maggie 係一個咩女仔。佢唔同一般既女仔，俾人傾慕對佢黎講並唔係最大既成就，係佢眼中，數學同知識既追求先至係。我想講呢D女仔係好少有，但係就係咁先難得，就 係咁先有佢咁千金不換既氣質。所以我係果一剎那明白，我向佢表白，都唔會有結果既。只係會令到佢帶來煩惱。」
我繼續講：「何必令到我鍾意既人帶來不應該有既煩惱，仲要係呢個時間？係我地食完雞批，慶祝左pi日之後，我明白左，睇開左。個心都集中左，呢件 事，可以暫時收埋，就好似放左係保險箱到咁，可能某個時間再加開，但樣野已經唔見左，或者變左第樣野，甚至係，以以後都唔再打開，又得。」
真興同狂生都聽到有D目瞪口呆：「依家叫你念詩咩。」
「妖，講到最尾，咪又係任務失敗。早知我唔顧兄弟之情義，我去溝佢仲好，分分鐘已經掂左。行緊街啦。」真興一臉陶醉，吹晒水咁款。
狂生最後作出結案陳詞：「不過，Anyway，如果你真係疊埋心水，都未嘗唔係好事。反正我件事一開始就已經想投反對票。」聽到呢度，你就知道其實成班都係Hi Hi黎，呢樣野真係無疑問。
「既然係咁，我諗我返去先。以為有咩好消息先出黎，點知原來無疾而終，衰過爛尾古。我返去睇下高登再刨下書唔好？拜，遲D再約啦。」真興拍拍下我既膊頭，就出左間咖啡店。而狂生亦都對我講：
「放心啦。如果你真係睇得咁開，天涯何處無芳草呢？我都返去睇旋風管家先。係咁。」我揮揮手，都唔想再講野，只係心諗狂生你條毒拎讀書咁好好心就唔好搞到自己仲係咁宅啦Seven Head。不過費事傷佢自尊心，都係費事講多錯多。
真係有苦說不出。頂你地班友，搵佢好D既說話安慰下都無，剩係識抽水，我記住你地。遲D你地有咁既問題，我一定唔會赦你！不過始終都係，我都知我都係講就兇狠，做就ＸＸ架喇。算，性格問題。
於是得番我一個，拎番本past paper 出黎，自己做下溫下功課好過。於是我一臉寂寥咁唱「學生哥，好溫功課，咪剩係掛住拍拖」安慰下自己。都唔好話唔淒涼架。
不過好快，我又已經stuck 住係一氣short question到。頂，明明之前Maggie 先教完我，又唔記得左。我真係唔死都無用。
就係咬到個筆頭都幾乎爛開果陣，忽然間有人問我：
「Hello，唔好意思，請問呢度有無人坐？其他位都full晒。」
我一呆，咦喂係個女仔黎喎。「當然無……我既意思係無。」
「唔該。」個女仔就坐低左。好後生，甜笑，就好似大學生咁既樣。著住白色既麻質連身裙，無袖，梳馬尾。唔知係咪受左太大既打擊，我竟然好似用盡一整個人生既勇氣，問呢個完全唔相識既女仔：「你都係飲凍Mocha？」
個女仔一笑，舉起杯野，話：「唔係，我呢位係凍朱古力。依家唔係好飲咖啡啦。」
把聲好好聽。我勉力減低自己既口窒窒，講：「你，你唔係都黎溫書呀嘛？A-level？」
女仔聽左之後，欣喜地笑左：「嘩，你呢。好有趣喎。咁睇得起我，唔係，我岩岩經過所以入黎買杯野飲渣。你就真係似乎要努力讀書喇，亂咁搭訕好似唔係好集中喎。」
我漲紅塊臉，真係，一句打埋黎，就已經一蹶不振。被秒殺喇。
但係女仔反而唔介意，佢仲側個身埋黎望下我做緊既題目：「喂，Maths喎？CE？呀唔係，依家叫DSE喇，駛唔駛幫下你呀，我Maths都唔差架。」
我急急講：「當然唔駛！」已經夠喇，唔駛再搵多幾個靚女黎教有得睇無得食喇唔該。
女仔好似挑通眼眉：「但係你好似好煩惱咁。」
我既煩惱連一個陌生人都睇得出！我灰到爆之餘，亦都更加無避忌咁講：「其實係，我鍾意左個人，但係佢唔會知道。我都唔打算講。所以有D煩囉。」
女仔一震，佢一下子收斂左佢陽光式笑容。「哦，咩咁呀。咁又真係幾慘既。」
雖然女仔好年輕，但可能佢經驗俾我豐富？於是，我追問，「如果換著係你，你會點做？」
女仔停左起黎，低下頭，望住杯野飲良久。過左好耐先答：「我，都唔知點答你！」
SHXT。可能我又真係太奇怪既，無啦啦問人地咁既問題，梗係衝到人，人地都唔知你做咩啦？於是我轉個話題：「你，岩岩去邊黎？」
但係女仔既臉上更加添上一層陰影：「岩岩去醫院探病黎渣。我朋友入左醫院。」
「原來係咁。」我心諗，可能係佢好重要既人訓係醫院，所以佢唔係咁開心嘛？
我唔敢再出聲，恐怕講多錯多。不過女仔隔左一陣，總算回復左生氣：「哈哈，唔好意思，自己一個人入晒神添！我杯野都飲得差唔多啦，我都係走啦。小朋友，考試要加油啦喎。」
我抖擻起精神，「係，我會加油既。仲有，我唔係，我唔係小朋友！」我嚴正抗議。女仔笑一笑，「咁好，好高興識到你啦？你叫咩名呀？」
「我叫Matthew。」「好，Matthew，有機會再見啦喎。」佢起身要走，我用盡最後既氣力，係佢身後講句：
「祝你位朋友早D康復啦！」女仔另轉身，有一剎那感激既神色係佢隻眼流露出黎。佢回答：
「多謝你，我會遲D同佢講番既。一定。」女仔於是推開門，就走左鳥。
我心如鹿撞。望番自己寫既算式，不堪入目。但係我得到進一步既結論係：
車，就算真係無左Maggie，算咩唶？呢個世界，靚女多的是啦！岩岩個位，雖然大我小小，但係一樣樣靚，身材又正。我真係無野輸囉。
但係，我連佢叫咩名都唔記得問。我真係死蠢，頂！！
唉，條數搞左成日，結果都係未識做。又唔想咁快又搵Maggie 求救，天呀，又話高登仔無所不能，點解我好似咁無向左走向右走用咁既？唔通我仲未夠資格？？有無人答到我？
忽然之間，我同情唐唐。想同佢一齊大聲叫：
蠢唔係罪黎架！
（白色情人節係咪應該有d表示？ 完）