《究竟電腦會唔會有一日連藝術都取代埋人類既地位呢？》

岩岩睇到一條片，見到外國有個藝術家，用類似圍棋盤既格仔版，痴晒係部牆度，然後每一格既交叉點，佢都用電鑽鑽窿。咁之後點呢？佢竟然用大量既螺絲，諗過度過，鑽入Ｄ窿度，有Ｄ淺Ｄ，有Ｄ深Ｄ，然後再將螺絲輕輕掃上顏色，完成之後，向好退一睇，原來竟然係一件極富立體感既彩繪掛畫黎。
　
呢種集工藝同繪畫於一身既藝術，旁人睇到無辦法唔驚歎技師既天才同埋創意，幅畫不單可以欣賞，甚至可以摸，螺絲既高高低低，正正反映出件繪仿實物既玲瓏浮凸，實在係可以用巧奪天工黎形容。之後再退一步諗，依家人工智能既技術日新月異，就算話連文藝創作，遲Ｄ都無話唔可能。究竟電腦會唔會有一日連藝術都取代埋人類既地位呢？
　
我覺得單從技術上面做唔做到黎講，呢個唔係話完全唔可能。跳番去岩岩個例子一諗，你叫電腦３Ｄ打印如果都得的話，係每一個都相同距離既格仔入面鑲一口螺絲，然後噴上墨會係變番一幅立體圖像出黎，我相信對於電腦黎講，絕對唔係問題，電腦甚至可以做得更快更好更大幅。但個問題係，以人類既認知，佢地仲會唔會當呢件係藝術品咁解。
　
有時人既思想就係咁離奇。例如用骨牌砌出一座好大座既城堡然後用幾十秒就推冧佢咁，大家都會覺得好精彩，好震撼。但係如果搵機械人黎砌，就會話：妖有咩稀奇一定砌到架啦。就等於買個高達模型返黎慢慢自己做，好多行家都會覺得係一種藝術同功夫黎。如果要完美，咁不如直接買一隻廠啤既咪仲簡單。有個人玩滑板練習拍片上網，失敗左Ｎ＋Ｍ次先成功，人人叫好話好感動好堅毅。電腦ＲＥＰＥＡＴ一千次成功左，卻只不過話，ＲＥＰＥＴＩＴＩＯＮ唶。
　
所以，似乎人對於藝術既追求同表現，唔單止只係計完成果一刻，中間所付出既血汗同時間，練習過程，一Ｄ隨機不能估計既因素，甚至係失敗，都會考慮左係入面。或者再根本Ｄ講，藝術就係人所生來追求既野，唔係機械人或者程式所定義。所以，我相信只要電腦未消滅人類一日呢，人都仲會好偏心咁話，我地自己整果Ｄ，先有欣賞價值，先有「人氣」，先有「感悟」。電腦就係電腦（雖然佢佢地可能兩幅拍埋一齊都分唔到邊幅電腦做）。等於柯潔輸棋後，都話：
　
電腦捉圍棋無情感，係無意義。我好衰咁，再引伸Ｄ講就係，永遠都贏，唔輸，係唔好玩架。好唔好玩，係人所知所想，電腦依家都唔知咩為之好玩。世界有好多痴線佬，會得到普羅大眾既敬重；但電腦痴線，就會即刻俾人話係ＢＵＧ，要走去除錯。呢Ｄ觀念會唔會以後逆轉，又係以後既事了。等於你話要電腦明白咩係傲嬌，談何容易？？