(beta 公測版本)
< 返回

《Too rubbish doesn't read》

日期:2017年5月31日

我成日都會對於果D插高登連登之類好低質(或者愈黎愈低質)既講法,感到不明所以。
 
第一,如果討論區低質,你可以第一件事唔睇,移除個APP。但當然,一邊屌一邊睇先至叫地道,就好似無線咁渣嘛係咪?OK FINE。第二,討論區低質,最主要當然係因為發文質素,而發文質素,就係因為發帖人既高低。但你可以去發帖留言,插番個發帖人,喂你咁樣寫真係離晒大譜,插到佢潛水為止架?你走去插個討論區做乜呢?即係農夫種野種得唔好,又話個土地太硬一樣唶?
 
如果發帖人既質素係Follow某一個Distribution,出黎既文章質素自然就有高有低。但係呢個唔代表D乜,個問題係跟住既回應率,先至係重點。有人推文,置頂機會就高,就會有更多人睇,變相傳閱速度就會更快。如果無人問津既文,好快就會跌出第二頁,第三頁,當事人自推,都無補於事。咁依家要問既問題係:究竟文章既質素高低,同有幾多人去睇去推,究竟有無任何關連?
 
又唔係話完全無關係既。好文都一樣可以有出頭天,不過你都要有技巧囉。如果你無技巧地,正經八百咁掟一篇千字鴻文出黎,我真係祝你好運囉。點解依家呢個世界要講Too long doesn't read (TLDR),而唔講Too rubbish doesn't read (TRDR)?係因為你長,就係徙緊我一彈指飛Screen 既果五秒時間,係死罪。而相對而言,我睇多秒既Content Farm 垃圾,反而覺得無所謂,甚至覺得好好睇值得Share 添。明唔明?
 
依家最大問題係,娛樂性質吸引到大量讀者眼球既多,真正認真討論既文俾人排擠到冥王星咁遠。全世界都開始愈黎愈多假既資訊,無謂既資訊。等於舊時娛樂版係十張紙,正章有廿張紙;依家娛樂版係廿張紙,正章得番兩版,仲要都用埋娛記果隻寫法。我個人覺得間唔中呃下Like係無咩所謂,但你都唔好全部呀。間唔中都搵人睇下認真寫既野呀?如果唔係,所謂既再次啟蒙運動,香港文化,本土文化,只會一路俾呢種潮流,吞噬迫壓至死。
 
如果高登連登篇篇文都係低質,我地更加要諗,究竟點解一個最有代表香港既討論區會得出咁既結果。至於FB亦同理,日日攝晒廣告落去,唔好講認真Post,我連朋友個Status 有無Update 去左邊都未必知。坦白講,咁既潮流,我真係一D都唔樂觀(亦從來無樂觀過)。做野先。

全文 720 字 (唔計英文、空格、標點)