《英國超市品牌等於百佳、特惠牌？學識乜係超市value brand先再講啦》

話說最近惠康 (嚴格嚟講係Marketplace，是但啦) 引進Sainsbury’s，價錢同英國本地比高咗一截，粗略估計香港價錢係英國價錢嘅2.5倍， 小弟就覺得以超市品牌嚟講太貴；之但係對於見到有人話Sainsbury’s只係百佳、特惠牌，比咁嘅價錢買係傻仔，又實在不敢恭維。

雖則話英國係劣食國，但超市啲正常自家品牌嘢其實都唔算劣。當然，一分錢一分貨，平貨劣啲好正常。各大超市為滿足唔同消費層嘅需要，就連自家品牌都會分幾級，基本上有高中低三級，Sainsbury’s就多埋啲乜鬼嘢Organic brand，惠康都有引入，但就唔係重點所以唔多講。

超市自家品牌最平最劣嗰級叫value brand，都真係平到你唔信，例如 (以下全部換算做港紙計) 4蚊一公斤白米、3蚊一罐罐頭雞湯、1蚊兩公升可樂咁。質素就唔係人人接受到架嘞，但都係嗰句，一分錢一分貨。

講到呢度，其實先係呢篇文重點嘅開始。喺引入咗嚟香港嘅英國超市品牌入面，其實全部都有value brand，之但係就唔係個個品牌嘅value brand都可以喺香港買得到。接下嚟就以小弟所知有邊幾個品牌引入咗香港，逐個講講：

1. Marks and Spencer

唔洗多介紹，自家牌子自己賣。由於事實證明M&S喺香港賣食品好賺過賣衫褲鞋襪，所以而家基本上間間舖都有食品賣。

唔好以為M&S好高檔，其實一樣有value brand，叫Simply M&S，以小弟所知香港起碼有茶包同罐頭湯，牌子設計係白底黑字，唔難認。至於質素呢，如果講M&S正常brand係好嘢，咁Simply M&S就係正常嘢咁囉，同一般牌子比都唔會話輸蝕。之但係Simply M&S嘅貨品種類就算喺英國都係相對較少，所以好難討論太多。

2. Waitrose

誠哥的百佳其實都已經引入左Waitrose好多年。Waitrose呢個牌子喺英國比人半講笑咁煲到話係好離地中產嘅牌子，仲有個叫”Overheard in Waitrose”嘅Facebook page收集各類喺Waitrose聽到嘅極級離地對話[1]，真假當然就無從判斷啦。事實上Waitrose啲價錢又唔算特別中產，啲基本嘢其實窮苦學生都比得起，而且質素係超市入面公認好嘅。

Waitrose個value brand叫Essential Waitrose，百佳大部份引入嘅其實都只係呢條value brand線。係呀，最平最劣嘅value brand咋，喺英國本地對上仲有正常brand同高檔brand呀，慘得過Waitrose啲嘢就係質素好到淨係value brand都夠喺香港當優質品牌咁砌呀。當然，又唔係完全關香港或者誠哥事，事關Essential Waitrose就算係英國本土，個競爭對手都係其他超市嘅正常brand (而唔係value brand)，即係話Waitrose係用自己value brand砌你其他超市個正常brand，夠晒霸氣。

不過講到霸氣，其實Essential Waitrose一早喺網上比人恥笑到霸氣盡失──英國網民最鍾意cap圖研究嘅就係到底Essential Waitrose嘅貨品有幾essential[2]。不過從另一方面睇，亦反映咗呢個value brand同其他超市嘅value brand有幾唔同。

其實上述M&S同Waitrose嘅value brand，之所以喺香港搵得到，小弟覺得原因好簡單，就係連個value brand都有足夠嘅質素保證，可以用嚟做出口貨，而事實上質素亦唔見得比香港見到嘅牌子差，呢個亦係點解啲貨嚟到香港可以賣貴幾倍，同其他牌子睇齊，甚至更貴。

3. Tesco

英國最大超市，總之就係平。小弟覺得佢個自家品牌定位係同時喺平同質素之間攞個平衡，簡單嚟講就係差唔多係各超市中最平，平得過佢嘅超市唔係冇，但通常都劣到啲人接受唔到[3]。香港由華潤引入Tesco品牌，但中資盡量唔幫襯是常識吧；近排仲有間叫「U購」嘅舖賣得好平，接近英國Tesco原價，小弟就未有機會詳細研究。

Tesco個value brand叫Tesco Everyday Value，質素係真係劣架，前面講1蚊兩公升可樂就係Tesco Everyday Value出品，有人話呢枝嘢係用嚟洗廁所而唔係飲。

因為劣到咁，所以香港未必買得到 (小弟冇親身求證，如果有人見到有得賣，歡迎告知，小弟好懷念)。換言之，以小弟理解，香港主要引入嘅Tesco品牌貨品，主要都係普通brand (就咁叫Tesco) 同高檔brand (叫Tesco Finest)。Tesco嘅普通brand基本上可以當係同M&S、Waitrose嘅value brand同級，嚟到香港就係可以同一般牌子一戰嘅級數。

4. Sainsbury’s

喺香港就係近日炒起嘅話題新品牌，但其實英國基本上冇人唔識，因為係繼Tesco後第二大超市。主要競爭對手可以話係Tesco，自家品牌個定位基本上就係盡量比Tesco質素好些少，價錢就同Tesco差唔多咁樣。真係要比較嘅話，自家品牌質素可以當係喺Tesco同Waitrose/M&S中間，但比較近Tesco。

Sainsbury’s個value brand叫Sainsbury’s Basics，劣嘅程度唔會好得過Tesco Everyday Value好多。話雖如此，根據小弟親身經驗，Sainsbury’s Basics係有一啲嘢唔算太劣，可以接受[4]，例如黑朱古力bar[5]。

由於Sainsbury’s Basics如Tesco Everyday Value差唔多質素，所以惠康都係冇引入。香港買到嘅Sainsbury’s基本上只係普通brand (Sainsbury’s) 同高檔brand (Sainsbury’s Taste the Difference)，外加個Organic brand (叫SO Organic)。普通brand質素都係同Essential Waitrose咁上下[6]。

講咗咁多，可以簡單咁總結一下香港買到嘅英國超市品牌貨品質素：

M&S / Waitrose value brand = Tesco / Sainsbury’s 普通brand = 香港一般牌子

衰啲都係咁講，百佳、特惠牌真係唔係人食/用，即使劣如Tesco Everyday Value同Sainsbury’s Basics，個人覺得最少都有佳之選 / First Choice嘅級數。而家香港賣緊嘅係Tesco、Sainsbury’s 嘅普通brand，拎嚟同百佳、特惠牌呢啲香港value brand比，簡直係一種侮辱。

[1] Page入面嘅其中一個例子：https://www.facebook.com/overheardinwaitrose/photos/a.381735128634532.1073741828.375139409294104/712029372271771/?type=3&theater

[2] 例子直接睇link: http://thedailyquicky.com/9-waitrose-essential-items-that-are-not-remotely-essential/

[3] 係呀，講緊ASDA同ALDI呀：https://youknowyourebritishwhen.tumblr.com/post/104064766114/greenycrimson-ponced-from-overheard-in-waitrose

[4] 但聽聞小弟係出晒名劣食，所以我話可以接受，就信不信由你。

[5] http://www.sainsburys.co.uk/shop/gb/groceries/sainsburys-dark-chocolate--basics-100g

[6] 英國本地價錢反映質素，拎士多啤梨jam做例子你就明：
Waitrose: http://www.waitrose.com/shop/DisplayProductFlyout?productId=1827
Tesco: https://www.tesco.com/groceries/product/details/?id=254849603
Sainsbury’s: http://www.sainsburys.co.uk/shop/gb/groceries/jams---conserves/sainsburys-strawberry-jam-454g