《點解成日有人抹窗跌死？》

每次睇新聞見到有人抹窗跌死，我個心都會沉一沉。點解會有人為咗一塊玻璃透多啲光去搵命搏？

係咪我嘅價值觀同其他人唔同，大家寧死都要日日抹到隻窗立立令？但係就算大家心目中，一隻窗係幾咁緊要呀，香港係一個打工仔劈砲唔撈都冇勇氣嘅社會，大家邊度嚟咁大勇氣去玩到咁大，執屋執到用生命作賭注？我知道價值觀人人唔同，但係如果事後諗返，如果面前有兩個選擇，一係「死，但係隻窗會乾淨少少」同「唔死，但係隻窗會有啲污糟」，你會點揀？我諗大部份人應該會揀後者啩。　

有一種諗法，就係每個人做嘅嘢都係自己選擇，自己要負責返。你明知亂過馬路會死，你都要衝，咁你死係你嘅責任——亦即係結果充份反映你嘅選擇傾向，與人無尤。呢種世界觀好簡單直接，但係同我哋嘅直覺相違背。因為大部份人其實唔係衡量過晒主要因素，之後先去揀佢哋想做嘅行動；而係喺唔知情之下，亂咁做決定。判斷係日日都要做嘅嘢：我而家就要喺幾十個唔同程度難食嘅飯堂入面揀一個去食。但係大部份判斷其實係唔知情，甚至係喺一大堆錯誤資訊底下去做。向來都話人類喺判斷極細機會嘅風險嗰陣，傾向會當風險係零。所以行路俾車撞死呢啲，係我哋平日唔會諗嘅事件，因為成日都諗，會黐線，會做唔到其他更加有意義嘅事。

不過就算點樣唔理啲細風險事件，有啲一出事就冇命嘅嘢，就算風險細到係萬分之一，我哋都應該去睇睇。萬分之一風險嘅嘢，日日做做足一年，你係會有 3.58%機會出事㗎，呢個 #達爾文獎 仲易中過六合彩安慰獎呀。

戇居嘢，只要死唔得人，其實做吓都無妨。但係啲風險唔算好低，出事會冇命，仲要換返嚟嘅嘢冇乜價值嘅嘢都咁多人做，似乎就係教育嘅問題。香港係一個成年人連中二已經教嘅一元二次方程式（quadratic equation）都唔識計嘅社會，要大家明白或然率嘅道理可能有啲強求；要大家學識Murphy定律（出得事嘅嘢總係會出事）更加係難上加難。前排先至有人堅持六合彩係50%中，50%唔中，喺佢哋眼中世事應該只係得「未知」同「已知」嘅嘢，樓市就100%升，後生仔100%係廢青，但係六合彩、馬仔呢啲就係五五波。咁抹窗跌落街應該係「絕對冇可能發生」嘅類別。如果係一個對統計學有深入認識嘅人，佢仲係摀個身出窗抹，或者你真係藝高人膽大，做表演嘅，呢啲真係認真思考之後嘅判斷，我都可以嘗試尊重；但係一個平均教育水平嘅中年人，佢噉樣做而大家唔阻止，其實係疏忽照顧嘅一種。成咗年都好，缺乏相關或然率知識嘅人，要佢哋喺社會自力更生，社會無資源庇護佢哋，係社會欠咗佢哋㗎。大家除咗讓關愛座之外，係有責任睇住佢哋，唔好俾佢哋嘅無知攞走性命嘅。

到出咗事嘞，呢刻真係應該喺底下講「RIP」、「真係唔好彩」？將一啲唔應該做、死得人嘅嘢，定性做「唔好彩」根本就係鼓勵大家繼續做，係謀殺行為。死者而已，唔好咁廉價，我寧願大家落力恥笑佢哋，等以後嘅人唔好再做傻事。