《有感而發》

社會嘅黑暗在於一步步將人一生嘅激情吞食殆盡，變成行屍走肉。

人嘅靈魂本來應該係自由嘅，但係偏偏由出世開始，就有人幫你規劃未來，話畀你知要做咩，要點做。

點解要讀書呢？點解要讀大學呢？點解要打工呢？點解要畀呢啲嘢支配住自己一生呢？

被呢啲嘢支配住嘅齒輪永遠唔會明白自由嘅靈魂對社會嘅咆哮。

人一生最慘嘅唔係肉體被囚禁，而係靈魂被父母學校社會嘅價值觀所鎖住，肉體失去自由，意志自由，終有可能衝破牢籠；但係靈魂失去咗激情，人就連反抗都唔識。

點解人要讀文學、哲學呢？理科雖好，但係欠缺咗嗰種令人拷問生命、家庭、社會嘅力量，只有喺人踏出質疑一切嘅一步時，佢嘅意志先係自由嘅。

人同動物最大嘅唔同唔在於道德、律法、社會甚至理性，而係人對生命嘅激情，呢種係欲望嘅昇華，提升至對生命嘅喜愛。

但係呢種激情往往會帶嚟破壞、唔穩定，所以社會先要透過種種手段維穩。

呢種追求安穩、安逸嘅生活態度喺到慢慢蠶食我哋嘅激情，中產家庭、有錢家庭出生嘅細路之所以容易成功，有成就，唔單單在於佢哋受嘅良好教育，而係在於佢哋「覺醒」嘅機會比較大。貧困家庭嘅細路容易自卑、細個貧困潦倒，大個想盡一切辦法脫貧，追求安穩，更加冇條件畀佢追尋夢想，對生命嘅激情慢慢消磨。

Acting in accordance with your nature.

唔好受大眾之見所擺佈，呢個就係人同齒輪嘅分別。

人同齒輪嘅分別唔單單在於能力，更加關乎對生命嘅激情。

哲學、文學可以為人帶嚟嘅就係思想上嘅解放。

所以喺我睇嚟，其實大學入面教人讀文學嘅方法根本本末倒置，點解我要知個作者想講咩？更加重要嘅係我睇到啲咩。就算有作者已死，我哋要做嘅都唔係解讀個文本，而係解讀自己，self-knowledge。