(beta 公測版本)
< 返回

《如果你可以做到以下嘅嘢,咁我哋就一齊住》

作者:林璃蝶
日期:2017年4月10日

自從2月頭有人嚟住咗一個星期,過咗2日後就有人住2個月,到今日終於回復返一個人嘅自由。

《三月的獅子》男主角零,細個痛失雙親後,差啲比人送去孤兒院。

當時嘅佢,唔知孤兒院係咩地方。佢只知道以前,無論學校發生咩事,開心好唔開心好,只要放學返到自己間房,就係一個人嘅時間。而如果去咗孤兒院,就代表放學後又要對住人,即係一連24小時都會無咗一個人嘅時間。

以前喺香港同屋企人住,細細個同家姐同房已經好辛苦。因為我夜訓而家姐早訓所以成日因為咁而嘈交。後來家姐嫁人,令到我終終有自己嘅房間,但係屋企人唔比訓教鎖門,亦唔鐘意我食完飯就返房做自己嘢。想裸睡或者碎下碟嘅自由都無,每分每秒都活喺壓力底下。明明已經廿幾歲女,飲野飲到兩三點都要打嚟催我返屋企。又,因為我間房比較大,我嘅嘢又唔多,所以順理成章我間房就擺咗好多唔屬於我嘅嘢,而我又唔可以移動佢哋。每朝起身,望到啲雜物,就覺得好有壓迫感好唔自在,甚至想嘔。

雖然大學都住過Hall,比起住屋企又自由多啲,至少唔會有人管住夜晚去咗邊。但大家都知,地球領先大學嘅Hall唔係一個比你尋找自由嘅地方,所以結果都係未真正試過一個人住。

同人住真係好痛苦,一日廿四小時都要迎合對方,要就住就住。沖涼唔記得拎毛巾要開條la仔叫人幫手拎,無得裸跑出去。因為喺香港實在無可能負擔自己一個住,所以萌生要離開香港嘅念頭。

嚟到日本,一開始住公司宿舍,比住喺香港更worse。一星期兩日放假嘅日子,喺宿舍仲要對住2個公司嘅rommmate,感覺好似連放假都返工咁。返工時,每日公司巴士由宿舍送去公司,放工再送返宿舍,感覺好似一車車奴隷咁比人運送,非常唔舒服同受束縛。

後來有機會搬出去住,問下網友意見,大家都覺得值得搬。當然,到而家我都覺得搬係正確決定。雖然租係貴咗,但係用多幾千蚊同埋每日搭多1個鐘車去換自由,真係好撚抵。

咁大個女終於一個人住,有自己空間,所以擺設都由自己話事。連空氣都係屬於我。變得好鐘意打掃、清潔、執嘢,每日都要吸塵,甚至將只有200呎嘅屋劃分成「溫習空間」同「休戲空間」(aka訓晏覺)。所有壞習慣都唔會影響到人,返到屋企做咩都唔會人理,可以放心食杯面食營多,去廁所唔關門無所謂,可以飲酒飲到五六點先返屋企第二日照工。

然後當一個人開始自己住,就會develop自己嘅一套生活方式。以我嚟講,出門前一定會開窗廉令陽光曬入屋、去完Toilet要cum返塊板先沖廁。有時用完啲嘢雖然未必即時放返好,但係會知道每件物品都有佢嘅位置,如果擺錯咗會好唔舒服。

所以有人嚟住兩個月,見到對方嘅生活習慣,發現真係了解多咗自己。當「一個人嘅時間」消失嘅時候,工作嘅壓力會無從宣洩。尤其份工係要不停講嘢嘅時候,返到屋企真係會唔想再講嘢。但係有人喺屋企嘅時候,無理由食完個飯就訓,至少招呼都要打句。

好快,我就知道我唔適合同人同居。

初戀時,真心以為會同對方一生一世,日日講love you forever,幻想一齊住嘅時候會點樣佈置小天地。到而家,發現同居只會令你知道同對方幾咁唔夾,加速分手嘅危機。

可能你會話,你夠愛佢就會調節你嘅生活習慣,愛就係互相遷就。的確如此。當我男人話想同我住嘅時候,我都應該比個機會對方。而且我唔應該因為另一個人嘅生活習慣而判佢死刑。

多謝呢兩個月嘅同居生活,我可以清楚地list出我嘅生活習慣。

「如果你可以做到以下嘅嘢,咁我哋就一齊住。」我打算咁樣同佢講。

【有關訓教】

訓教對我嚟講係好重要。我唔想日日戴耳塞戴到耳仔損咗(而家真係損咗)。
[1] 請調整到同我一樣嘅睡眠時間。
[2] 如果因工作時間唔一樣而無法做到,請分床訓。
[3] 如果有鼻鼾,請分房訓。
[4] 如果咁難得唔需要分床訓,咁張床一定要沖咗涼先上得。
[5] 床單至少兩個月洗一次。
[6] 床單、被笠、枕頭套一定要一set!!!
[7] 就算放假,都唔可以遲過九點起身(如果唔係會影響當晚睡眠時間)

【有關廚房】
[1] 碗碟一定要即刻洗,絕對唔可以留過夜。
[2] 洗完碗sink盤一定要無哂廚餘。
[3] 廚餘唔可以倒入廁所!!!
[4] 廚具有廚具嘅擺放方法,唔可以亂放。尤其放碗嘅地方唔可以放鹽放糖。
[5] 所有食材要封口。
[6] 煮完嘢食一‧定‧要抹爐頭同牆身。
[7] 開抽油煙機係基本啦。
[8] 雪櫃:生嘅要擺喺下面。

【有關廁所】
[1] 好似頭先所講,沖廁時要cum蓋。
[2] 去完大,esp肚痾,要蓋起廁板檢查有無彈污jo。
[3] 唔好留低頭髮陰毛喺廁板。
[4] 廁所嘅拖鞋係for廁所用,絕對唔可以踩出廁所以外範圍。
重點係:用完好似無用過咁就perfect。

【有關沖涼房】
[1] 每次沖完涼要清走頭髮、地下唔可以有水以外嘅污物。
[2] 沖完涼要即刻關門,唔可以比蒸氣漏出廳。
[3] 洗頭水護髮素等用完一定要放回原位。
[4] 不得浸浴,除非水費電費你比。

【有關Dining Room】
[1] 我每朝早都會吸塵,總之我吸塵時唔好阻到我。
[2] 放假會抹地同埋搬開啲櫃打掃積塵,所以櫃唔好放咁多雜物。
[3] 你買高達模型買幾多都ok,但要放擺一齊,唔好東一件西一件。
[4] 開完嘅包裝、用完嘅tissue,即刻丟。
[5] 唔好超越我嘅地盤。
[6] 唔可以未經我同意搞我嘅嘢。但如果你啲嘢擺得太衰而我睇唔過眼,我會移動你嘅嘢。

【其他】
[1] 所有公用嘅物品,我負責佢哋嘅擺放位置,而用完一定要放回原位。
[2] 離開屋企一定要熄燈,如犯一次,日後電費你比。
[3] 屋企要保持整潔,時刻想像會有人特擊檢查,絕對唔可以比人有「亂」嘅感覺。
以上。

唔知我男人睇完係咪會即刻放棄同我同居嘅念頭?

全文 1815 字 (唔計英文、空格、標點)
備註: 「訓教」應該係「瞓覺」吧⋯