《瞳真》

#超短篇 我自從隻眼有事，要入醫院做手術。
　
換左個眼角膜之後，重獲光明之餘，俾我發現到一樣野。
　
我睇既野竟然開始唔同左。
　
我隻眼唔知點解，忽然多左一個新既視覺，係我可以一望，就知道究竟果樣野，係真定係假。
　
開頭，我會覺得呢種新ＦＵＮＣＴＩＯＮ，都幾方便。例如，去買野，可以知道果樣野係咪假貨。去睇人講野既口型，就知道佢講既野係咪大話。甚至，望一望個女仔既妝，就會知道佢原本既樣係點。至於只要眼光輕輕一掃佢既身，又可以知道佢有無僭建。換句話說，我隻眼，原來容下唔到任何一樣假既人與事。
　
但係到今日。我發現我原來頂唔順咁樣既生活。
　
如果話假野係一粒沙，咁我既眼，就係容唔下一粒沙，一粒都唔可以。咁你試諗下，如果沙既數目係多如天上繁星。咁我隻眼，承受既痛，你想唔想像到，會係幾多？
　
我決定上天台。企上去個圍欄邊，望向天空，只有果一住既顏色，先係同我以前做手術所望既野，完全一樣。我笑了。
　
原來呢個已經係一個咁假既世界。面對一個人，佢對你愈假，隻眼就會向我不斷提出更多警報，但殊不知，果Ｄ唔係路人甲乙，卻全部都係我所謂既兄弟同埋老友。我同我女朋友講，未有儲夠錢結婚同買樓，佢笑住同我講，佢一Ｄ都唔介意，但其實隻眼話俾我知，佢不知幾介意。跟住佢一邊去覆電話ＭＳＧ，我問邊個，佢話係普通朋友，但隻眼就自動作出提示，果個其實係佢新既男朋友。
　
如果真相係咁。我又何必要知道得咁清楚？
　
人過得迷糊一Ｄ，咪仲好？
　
好快，有人報左警，談判專家上左黎。
　
佢叫我落番黎先，有事慢慢商量。
　
我凝望住企係下面既佢。睇得出佢擠出左極度誠懇專業既微笑：
　
「聽我講，咩事都可以解決到，死係唔可以解決問題。你睇下，其實世界仲有好多美好既事物架。其實我地如果可以再慢慢傾，或者我都可以做到你既朋友架。你好快就會明白，其實呢個世界仲有好多人都好愛護你同埋好關心你。。。」
　
我再望左佢一望。然後，對佢揮一揮手。
　
我聽到佢呼喊聲仍然係上空傳落黎。但好快就慢慢變細，並且俾風聲掩蓋。
　
落地之前。我諗番起醫生手術前同我講。
　
「其實呢個眼角膜，有我最新既研究成果。我俾左個名佢。」
　
「？」
　
「叫瞳真。」
　
「童真？」
　
「你到時就會知。呢個唔係世界上最美麗既野黎？」
　
係既。我閉上眼。但呢個世界唔需要呢樣野。醫生。
　
＝完＝