《《打雀英雄傳》嘅牌局》

上一次見有朋友講過麻雀入面一炮多響，牽涉到打廣東牌既截糊問題。原來再細心睇番許冠傑既打雀英雄傳，黎彼得填廣東口語入詞，極度啜核，對於截糊亦有提及：
　
「落手三隻東，度到啱三叫二五六筒，(食呀)
截正糊，真陰功，騰騰震嬲到面呀面都紅。」
　
呢兩句可以反映到，廣東牌明顯不存在可以有另一家都同樣糊出既局面，所以被截一家先會嬲到面紅，稱之為「真陰功」。黎彼得曾經接受訪問，講到明許冠傑係番書仔唔識打麻雀乜滯，所以呢副詞幾乎完全係出於佢既手筆。點解話要打麻雀先識句歌詞？係因為「落手三隻東，度到啱三叫二五六筒」真係可以係現實世界出現：
　
例１：東東東　ＸＸＸ　３４５５５６６
只有咁樣既牌形至會叫２５６三飛。如果係混一色，雙番東，無花，自摸，即係７番牌。
　
「混一色，碰七筒，一簡白板發財做眼槓紅中，
六八筒，叫卡窿，原來咁橋佢係呀係七筒。」
　
例２：７７７中中中中　白白白發發６８　［７］
黎彼得睇黎對筒子係情有獨鍾。呢副係混一色，小三元，槓上自摸。假設小三元４番，無花１番，即是１０番，隨時爆了。
　　
「掘尾龍，起勢攻，大四喜揸曬南北西東」
　　
例３：南南南　北北北　西西西　東東東　Ｘ
如果係渣晒南北西東既話，唔單止係大四喜，隨時仲係四暗刻添。當然廣東牌係唔會計咩雙倍役滿。但係廣東牌而言，食到大四喜係極難，小四喜已經爆，何必再向高難度挑戰？ＢＴＷ，掘尾龍係廣東話典故，好似係搞風搞雨咁解。
　
以前填既詞唔單止傳神，對廣東口語傳承真係好有幫助。