《粵典社論（好似係）：特首選戰掃盲》

隨住特首選戰臨近，坊間既評論愈黎愈多，亦都變得愈黎愈另類同光怪陸離，如同武俠小說連載，無法唔教人為之嘖嘖稱奇。在下咁岩今日無返工，不如再同大家再一次重覆幾個阿媽係女人既道理。然後你就發覺果堆百分之九十五既政論，都係馬報預測，大可置之不理。
　
１。大多數香港人無票。
　　　
無票唔單止代表呢個係一個小圈子選舉，亦代表佢係現有框架底下無辦法洗脫係唔係欽點既問題。我一早都講過，咁即係同選港姐一樣，你無權話事，只可以係梳化一邊用牙籤撩牙，一邊對佳麗評頭品足，喧嘩指點，但其實並不會影響結果。
　　
誠然，係十分無謂，但係好多人香港人（或者動物本質）都會鍾意做無意義既野（而反而唔做正經野）。俗稱茶餘飯後話題。
　　　
２。＂ＢＡＤ　ＣＯＰ　ＧＯＯＤ　ＣＯＰ＂
　　　
呢種質素，同大公文匯講鬍鬚係美國大漢奸一樣，或者話林鄭係ＣＹ２。０一樣。其實一刀切入去，我既睇法係，林鄭同鬍鬚兩個都係空洞人，大家都唔知道佢地做左特首之後會做乜，除非香港人仲咁天真係度信政綱我無辦法。點樣避免ＴＹＰＥ　Ｉ　ＥＲＲＯＲ？
　　　
ＳＯＲＲＹ，無ＤＡＴＡ，驗唔到。依家都係好似睇大戲咁，奶媽身邊多奸佞小人，佢奸Ｄ。鬍鬚睇落易Ｄ話為，似好人。係咪同五年既既豬同狼，似層相識？
　　　
更何況你亦無票，就算俾你知道佢地真實為人係點，又點？
　　　
３。林鄭民望低，鬍鬚民望高。但往後會點，無人知曉。
　　
依家無政治真實討論，又係講「推測性情好唔好」，好廢。如果林鄭當選，會唔會即每日派一萬，確保人人有屋住，以狂風掃落葉姿態推埋標準工時，全民退保，然後又成為史上最偉大特首，我亦不能預料，係咪一定唔會發生。依家泛民話依照民望，隊晒俾鬍鬚，俾人批評係民主戰鬥至此一鋪清袋。就此說法，我一定唔會認同。
　　
因為泛民係更早已經變成模糊曖昧難分一派。佢黐中聯辦好，黐埋民建聯又好，其實並不出奇。仲講咩民主鬥士呀？中二病咩。做永遠反對派先係最好。佢地心底裡面想ＣＬ贏至真呀～
　　　
４。香港並無民主精神。
　　　
香港精神行到依家，最多講既係「拚搏」，「打不死」。但水能載舟亦能覆舟，最慘係大多都係行功利主義，所謂ＰＲＡＧＭＡＴＩＣ，於是最後佢地都係向錢看，賺到盡，向樓價股價看。再問一問香港人，如果民調改成：願唔願意換一個要犧牲自己財產，改善經濟結構，肯團結一心既好人好特首？梗係唔願意。
　　　
因為呢個人歷史上已經赫赫有名。就係董建華。係咪笑左？再講，胡國興點解最貼近泛民理想但都無民望？一來唔熟書，二來洗脫唔到陪跑影子，三，係因為佢話要正道。。。
　　　
但香港人大部分人係崇尚邪道，走精面，即係撈偏。生不入官門，死不入地獄。法官正氣凜然，好多人香港人邊頂得順？梗係薯片易入口好多啦。
　　　
５。加埋中央唔放心，要插手，係死結。
　　　
想從政制改起，就要從香港人改起。有無人肯為改變而奮鬥甚至犧牲自己前途？有。不過佢地依家已經坐緊監。而甚至俾主流社會認為：應有此報。原因，都係阻住香港人發達唶。點解黃傘多人ＢＵＹ，魚蛋無人ＢＵＹ？因為目的唔同。其實大部份人出黎都係想換特首。
　　　
換完，一切如常。中央其實肯換，香港人大多覺得中央回應左，好應該收貨。。。
　　　
６。係咪真係咁多人談民主、談公義、談理想？
　　　
Ｉ　ＨＩＧＨＬＹ　ＤＯＵＢＴ。係依家既局面，就算無篩選一人一票，係人都知曾俊華贏。正如五年都係梁振英，係一樣。當然曾俊華未做，佢係咪會同６８９一樣咁衰係一個問號（好多人又會講左所以林鄭好Ｄ，又係好好笑）。但如果你話民意唔係現今民主制度既一部分黎，我都唔知所謂既理想民主制度係邊處地方有實現左。民粹主義係點樣發生既呢？香港面對民粹，又有幾大力量去對抗？
　　　
７。回到基本。我成日都講。任何形式既抗爭之前，香港要有啟蒙運動。
　　　
但啟蒙運動既然無發生。有一大班人甘於受到各樣外力愚弄，又有一大班人都係承接番香港不過係個可以賺錢既地方，賺完就可以走，咁同大陸對香港既諗法一樣。香港同大陸咪可以融合囉。大家係愛香港，認自己係香港人既本質上，就有好大分別。香港搞成咁，日日有年青人跳樓，真係人人有責任哩。俾票你，你要識得承受果一票既重量。
　　　
８。香港人真係識得投票？
　　　
你不如去問問香港第一大黨主席，李慧琼子吧。香港人識得叫碰，識得雞七平八。投票既野。ＷＦＣ。
　　　　
利申：我都無票。完。我會去懺悔架啦。
用三個字寫左篇無意義既野。對唔住。