(beta 公測版本)
< 返回

《科技似係走得好快,亦都可以好慢》

日期:2016年6月20日

#深夜追加特別篇 今日有篇文講起Microsoft,又有張相係FB 講Windows XP Wallpaper,或者應該將時間拉番去更遠,我地返番去二十年前。二十年前即係大概1995-1996年,果陣大家做緊咩?
 
我好記得係果段日子,當然仲未興宅呢個Term,但當然好多人已經有電腦,亦都極度沉迷。果陣正正就係破天荒出Windows 95既年代,係當時用緊MS-DOS仲要load 咩鬼autoexec.bat 同咩config.sys然後仲要人肉打win 去入Starting Windows 3.1...,D 滑鼠漏斗圖示都仲係黑白同未識轉,Windows 95 係桌面電腦一次翻天覆地既革命。果陣,世界各地都有人排晒長龍,就係想買Windows 95 返屋企裝。誇張程度,同依家iPhone 開售情況差唔多。
 
今日,我地去電影院睇咩魔獸爭霸。無錯,二十年前,亦都係1995年,依家已經人盡皆知既Blizzard,仲係一間好細既遊戲公司。就係呢一年,佢地推出左Warcraft II,當然唔駛講Warcraft II 都仲係要係DOS 到Run!係人都知,每一個人都打Warcraft 同C&C 打到廢寢忘餐。而果時候,香港老翻係極度猖獗,去買老翻電腦碟既人,係多不勝數。當然好多時買左返去,係隨時裝唔到都唔出奇。
 
Blizzard 當然係靠Warcraft 系列起家,而Warcraft II 已經開始有Cinematic即係過場有片睇,已經係一個劃時代既標誌,標榜故事既推演。但係大家唔好唔記得,下一年即係1996年,有一隻更加巔覆遊戲史既Game,亦都係Blizzard 問世,甚至連老翻都斷貨。而呢隻,就係Diablo I,即係暗黑破壞神第一代,亦都係正式要係Windows 95 先玩到既Game。
 
無人知果個時代D Game Designer 個腦出左咩事,竟然俾佢諗到Real time RPG一樣咁令人沉迷既野,即係唔再係日式咁set 一大堆指令搞完一大輪先打一下,然後一回合結束。佢係一見敵人,就要即刻開拖,然後死,就係即死,無時間俾你喘息。再加埋Random map + Random item 呢個煞食功能,Diablo 加埋網上對戰 Battle net,係開始有寬頻既世代,係空前既成功。無人統計過,自Diablo 出左之後,究竟壞左幾多隻滑鼠。但相信係不計其數。
 
呢一切一切,都係講緊廿年前。說短不短,說長不長。返番黎二零一六年,Windows 無力,World of Warcraft 亦開始悶,Diablo III 一出被人剷到仆街。今時今日已經係智能電話,Google,Facebook,Instagram既Live年代。再睇番Warcraft 既電影,唔知你會唔會同我有相同感慨:
 
科技似係走得好快,亦都可以好慢。。。

全文 649 字 (唔計英文、空格、標點)