《警廉衝突40年》

１９７７年，即係岩岩好４０年前，香港曾經發生大型既警廉衝突。
　
根據記載，香港六七十年代一片烏煙瘴氣。多次反貪，但成效不彰。賄風盛行，亦禁之不絕。私相授受為常態，作奸犯科可當正牌。麥理浩接手管治後六七暴動時期既香港，面對滿途荊棘，要為英國同中國談判爭取籌碼，必先著力令香港係國際經濟局勢成為不可輕易抹殺既一枚棋。政令不通，則所謂改善民生，只會成為滿紙空談（依家都無人明呢個簡單道理）。於是，佢決心開波，清理門戶。
　
１９７４年，廉政公署成立。姬達為首任既廉政專員。佢係軍人出身，有情報工作經驗，後來轉任文職，處理英殖民地事務。姬達接手廉署既工作，既然得到總督首肯，自然對警隊內既貪邪歪風絕不姑息，採取既係強硬鐵腕手段，雷厲風行。當時報道，廉署係會叫警察做＂ＳＣＵＭ＂，應該仲差過依家香港人叫警犬既。結果，幾位大老虎被查辦，警隊上下開始人心惶惶，最終，爆發大型示威，甚至到廉署總部搗亂。
　
當時國際形勢比依家更為波譎雲詭，緊急關頭，麥理浩要即時作出研判。佢認為如果事件繼續升級，會令到警察同犯罪分子連成一線，最終會令香港進入無政府狀態，加上當時英軍無意介入平亂，麥理浩決定特赦一次，既往不究，下不為例。當時，呢個完全係政治決定，並無所謂民意基礎可言，亦到犧牲左姬達（果然最親密戰友都用黎出賣）。雖然事後前者被擢升為布政司，而且加官進爵，但亦都令到廉署幾乎一鋪清袋，完全喪失當初成立講求絕對肅貪倡廉既目標。
　
事後咁多年，警權同埋廉署既調查權，一直都維持係一個極度微妙既關係，當中只靠最高級既官員去平衡同埋維持。呢個就係所謂一直所講究既ＣＨＥＣＫ　ＡＮＤ　ＢＡＬＡＮＣＥ。邊個去查，邊個去放生，邊Ｄ鬆，邊Ｄ緊，旁人無辦法得知。你以為英政府就無所謂黑箱作業？但不論如何，經過二三十年既努力，廉署成功重建到一個「好打得」既形象，香港係回歸前成為世界數一數二既廉潔城市。香港勝在有ＩＣＡＣ成為人人皆知既口號。而與此同時，警隊既形象係回歸前，亦都相比六七十年代（所謂有牌爛仔，兵即係賊），正派番好多。
　
今日係２０１７年。１９９７年岩岩好係２０年既分水嶺。警隊依家係過去２０年，點樣進步左；而香港既廉潔程度，又進化到咩一地步。大家有目共睹。無用多說。
#認真文無人睇系列