(beta 公測版本)
< 返回

《同居生活體驗談 001 雪夜》

作者:砂糖
日期:2017年2月11日

到埗嘅呢一日白雪紛飛亂舞,狂風颼颼,落車之後第一件事唔係拎行李,而係除帽:我唔想一頂咁靚嘅紅椿色純羊毛帽就咁俾風吹走,跌落地下整污糟晒唔知點洗,更怕吹咗唔知去邊,想搵都搵唔返。

「你真係好彩,聽人講呢度一年通常只會落一次雪,早兩個星期先落完一次,估唔到你會遇到呢度嘅雪景。」

當我等緊司機哥哥幫我拎行李嘅時候,嚟接車嘅人咁樣同我講。未來一段時間,我就要同呢個接我車嘅人同住好一段時間。就好似神待ちっ娘同神様咁樣嘅關係,佢俾地方我住,但我要完成佢嘅要求:基本上,無論佢要求啲咩都唔可以拒絕。

有人問我食飯未,我如實答佢未。九洲呢個地方據說最出名嘅食物係拉麵同モツ鍋:我都唔知中文叫咩,好似話係豬牛內臟煲之類嘅嘢。基本上個做法就好似打邊爐咁,整好一個高湯,落啲豉油或者味噌落去校好個味,再擺韭菜同埋豬牛內臟入去煮。當然上菜嘅時候通常都係煮好咗嫁啦。

可惜,其實都無咩可惜嘅,今晚我哋唔係食呢個鍋,而係簡簡單單咁樣,拖住一大件行李去咗食拉麵。講到九洲嘅拉麵,理所當然係會諗起豬骨湯,尤其煮到都幾濃厚吓嘅豚白湯。下晝想去買蛋糕買唔到,成日無點食過嘢,不如大食少少要個叉燒麵。呢間拉麵舖個湯底真係好濃厚,濃到入口嘅時候我會覺得有啲化唔開,甚至有少少太過刺激:不過呢個我諗係我問題,平日喺屋企自己煮飯,一般都食得比較清淡,調味都有啲輕手。不過講返轉頭,嗰間拉麵舖個叉燒真係幾好食,而且切得好薄好薄,但唔散之餘個味好香,香得嚟又無冚過豬肉本身嘅味道,雖然食得出調味料只係一般貨色,但煮出嚟個味真係好食。

一邊食拉麵,一邊望出面散亂嘅風雪,有少少驚會唔會返唔到屋企。後來發現,拉麵舖距離屋企大約係我平時行十至十五分鐘嘅距離:當然我一向都行得慢。呢晚食完麵喺風雪之中,呢段短短嘅路程,我哋足足行咗半個鐘頭。返到屋企四肢都僵硬晒,凍到幾乎無晒知覺,手手腳腳好似唔屬於自己咁樣。

放低行李之後,我哋竟然唔係暖返個身先,走返落街去便利店買嘢,買算係生活入面最重要嘅兩樣嘢:雪糕同埋酒。早幾日先喺網上面見到最近出咗期間限定嘅三重綽科拉味雪糕,被引誘咗咁耐終於買到其實真係好感動;同時見到一直好中意嘅,之前一排期間限定估唔到仲有嘅冧酒提子味。

「ちょっと困るんです~どっちがいいの?」我望著個雪櫃,托住腮咁樣諗得好認真,配合動作咁樣唔小心,其實係好自然咁樣講咗日文。「Why not Both?」喺雪櫃嘅對面傳嚟一把聲音,咁我一望其實都知邊個,其實都無邊個會咁樣答我,又或者更簡單啲講,應該無邊個會理一個望著個雪櫃自言自語嘅人嘅。佢當然已經揀好要買嘅酒,拎咗一枝智利嘅Rose,同埋一枝叫澪嘅有汽清酒。

再一次返到屋企,除晒啲厚重嘅保暖衣物,我哋坐喺茶几面前飲酒,同埋食一個喺福岡買嚟嘅梨撻。喺福岡雖然食唔到嗰間令人上癮嘅蛋糕舖,食唔到嗰間蛋糕舖最出名嘅蛋糕,鋪上煮過嘅洋梨同埋蜂蜜嘅一件蛋糕;見到呢個有類似組合而且可以常溫保存嘅撻,我都二話不說咁樣買咗落嚟。

到後嚟差不多瞓,開咗床先發現無多張被,而外面白雪紛飛。

「不如聽日去買被吖?」佢咁樣問我。

「好呀~話我知聽日Schedule吖♡」

全文 1111 字 (唔計英文、空格、標點)