《今晚應該食好Ｄ》

舊時未結婚，同塔嫂拍拖，好多時候都係，佢黎中環果頭搵我食飯。
　
當然大家唔需要過度幻想啦。唔係食Ｄ咩奢華野，好可能只係去麵家食個雲吞麵或者河粉之類既物體。然後我地食完，我繼續返去做野，佢就自己一個返屋企。下，唔係應該送女朋友返屋企至岩架咩。但係塔嫂就會微笑住拒絕，「你都快Ｄ做完Ｄ野快趣Ｄ返屋企我地再ＩＣＱ（ＯＲ之類）啦。」ＷＥＬＬ，以前就得，換轉依家，我應該俾人係網上公審小到翻艇好耐。
　
呢Ｄ邊係叫拍拖呀？充其量都只係個鬆Ｄ鐘撐下檯腳渣。但係塔嫂係唔會（ＯＲ好少）有怨言既（除非佢都燥底，但佢係好好脾氣的），有時，好似今日天氣咁上下凍，佢甚至會提議：「不如我地去美心ＭＸ打邊爐呀！我想食果度Ｄ唔知咩魚滑呀！」又或者係，「劣食咖哩！食下辣野好！」等等。我有時都唔好意思，會弱弱地問：
　
「會唔會食得太過ＣＨＥＡＰ呀，不如我地可以去蘇豪果邊。。。」
　
「唔係呀，我真係堅ＯＫ　ＷＩＴＨ咖哩飯。」佢仲要一臉認真地指，上網ＯＰＥＮＲＩＣＥ（果陣仲好細小規模無咁多假稿既年代）話好好評價。
　
佢見我一臉狐疑，之後就拖一拖我隻手，俾個有趣既鬼臉我，再講：「咩呀，我記得架，你話依家慳Ｄ，到第時大家搵到多Ｄ錢，再食好Ｄ不遲架嘛！遲Ｄ我要食大餐！我要食大餐！呵呵。」雖然對眼前呢個人，其實可能到最後都唔會發大達，然後可能Ｘ年後，大家都只能夠繼繼日日牛衣對泣，食幾草野既雙丸米粉，甚至飢寒交迫。但係過下又一年，過下又一個冬天，結果佢就咁跟左我鳥。
　
所以，我成日得閒就會諗。今晚應該食好Ｄ。如果係同塔嫂一齊食的話。自己一個就咩垃圾都放得入口啦。嘩，再打落去，分分鐘會眼濕濕添呀！