《身為香港人點可以唔識賭錢？》

唔識賭錢，講真，有可能會成為家教問題。
　
黃賭毒三害，黃同毒都會搞到自己一身蟻，稍有不慎就會命都無，又或妻離子散，而且個癮係直頭（或接近）ＰＨＹＳＩＣＡＬ，好難戒。當然，同理，賭完唔識停，亦會家破人亡，我絕對無意係度話佢完全無任何殺傷力。但呢Ｄ亦係學問，唔係要你做，但都要識，先可以防避。等於生女要教識飲酒係一樣道理。而且，唔計錢，其實係一堆ＰＲＯＢＡＢＩＬＩＳＴＩＣ　ＧＡＭＥ渣嘛，點解唔學得？
　
成日以為餵手機玩咩益智遊戲，完全漠視左古代傳落黎既民間智慧，係戇居既行為。我地果代既大腦記憶力，圖像處理，係點鍛鍊出黎，絕對同通宵玩啤打牌有關。以前細個，一來屋企人日賭夜賭耳濡目染，二來佢地真係會倒晒Ｄ牌出黎同我講，應該要學番一兩門手藝黎傍下身。呢Ｄ絕對係一般社交應酬，係禮儀黎，又可以練耐性牌品，雖然唔知幾時會用到，水能載舟亦能覆舟既野，你係ＷＥＬＬ　ＩＮＦＯＲＭＥＤ，自然就會自己識ＣＯＮＴＲＯＬ　ＤＡＭＡＧＥ。懂得適可而止，豈會有傾家蕩產之理？
　
就以好簡單講番十三張為例，兩個人一莊一閒，擺頭二尾鬥大，已經有好多基礎策略係一定會從中學識，雖則唔係咩巴閉野，但當中，要計幾多注數，例如三條行頭三注，四條二島八注等等，四則運算久而久之，已經心算唔會差。另外，判斷十三隻好牌爛牌，點樣砌好，幾時要「沖頭」，幾時要「縮桃」（音滔），幾時要「行博殺」（例如放棄尾門擺孚勞，反而三條行二島），幾時要保命，防輸三注，都係好易上手，可以訓練頭腦既技巧。呢Ｄ野小學識晒，唔難。
　
至於鋤ＤＥＥ，當然睇手上渣咩牌，但亦考臨場反應同埋記牌，面部表情，出口術，聲東擊西，暗渡陳倉等等，好多陰人跣人既人性險惡，都可以係入面窺之甚詳。呢Ｄ野死攬住個手機玩ＰＯＫＥＭＯＮ都唔會學到。見有Ｄ人連渣注副牌都唔識，真心係無眼睇。更加唔好再講其他更舊已經無乜人玩既舊玩意兒。