《外星人點睇「派利是」？》

或者係外星人眼中，人類有好多行為都不可以解釋，例如派利是。
　
我想好似痴線佬咁，認真去分析派利是呢個活動。首先，佢係一個要預先準備既玩意兒。你需要去換新錢，雖然，新錢同舊錢既面值，明明係一樣。然後，你要走去拎利是封，雖然，其實利是封到最後全部放入垃圾桶。第三，你仲要封利是，雖然其實個個都係「忙不及拆開裡面完美的世界」，然後嘖一聲，咪又係廿蚊！但係就係因為咁，你唔單止失去金錢，仲失去寶貴既時間。
　
意頭既野，我識條鐵！如果你係離開地球既外星人（簡稱離地），你一定可以咁講。但唔緊要啦。再仔細去分析，香港有大概二百幾萬個住戶，平均人數都兩至三人，當一半人仲會進行Ｄ拜年俾利是既活動，又當佢地起碼有三個親戚要拜訪，以最少兩封去計（仲未計公司拜年果Ｄ），所牽涉到單係本土既人士可能就已經成百萬上千萬個利是封，同埋以此為基本盤再乘以鈔票面值既金額，可能會以億計。但當中好多ＩＮＦＬＯＷ／ＯＵＴＦＬＯＷ互相ＯＦＦＳＥＴ。有無想像過，成件事係同賣旗一樣，係幾唔環保？
　
你又話一年又一次可以接受。ＯＫ！但從理論層面去講，其實每一家每一戶，對每一年會派幾多利是，同收幾多利是，基本上接近心裡有數，接近可以推測（當然有Ｄ好有錢既奉人就派就例外），所以的確係可以以電子支付既方式，互相係拜年前就已經過晒數俾大家先。從宏觀經濟去睇，係香港大家ＣＨＵＲ現鈔，的確對金融市場影響不大。但係強國就唔同，都可以乘機話農曆新年要釋放幾千億流動性。所以你話派實鈔利是對金融穩定係咪真係全無影響，我係有保留架！
　
然後你再諗下，如果真係有個特首候選人話要環保派利是，會即刻俾人政治化到幾甘，反傳統啦，針對印利是生產商啦，一年一度都要趕盡殺絕啦，會即刻唔俾入閘，玉皇大帝想叫二郎神押佢上天庭鍊丹啦。所以，大家封利是封得開心，收利是果陣，記住笑容滿面。因為呢個係世界和平既象徵。