《依家係一個庶民嘅年代》

依家係一個庶民嘅年代。

呢排係咁睇動畫同書溫習日文，認認真真一字一句咁睇咁聽。睇茶道歷史嘅時候睇到一段好深刻，佢係咁樣寫的：
「利休流嘅茶道，係依家日本茶道嘅主流。利休流嘅茶道由佢嘅子孫三千家傳承。誠如大家所知，三千家就係表、裏、官休庵。但係呢，呢個主流大概係喺明治之後先至確立的。喺明治年代之前嘅江戶時代，茶道嘅主流係利休弟子所創立嘅遠州流、石州流。遠州流、石州流係將軍、大名嘅茶道，因而廣泛流傳。隨住明治維新，武士、大名、將軍嘅沒落，變成咗四民平等嘅社會。所以，本來係庶民茶道嘅三千家就咁成為咗主流。」

比起三千家茶道嘅儉樸、簡約，石州流、遠州流，甚至其他武家茶道，比如織部流，作法道具都比較華麗，茶室比較寬闊。喺一個革新嘅年代，好多舊有嘅事物不論好壞都會漸漸咁樣被淘汰。又好似早日睇<昭和元祿落語心中>咁樣，第二代助六覺得當時嘅落語離地，喺一個瞬息萬變嘅年代，再無江戶風情嘅年代，如果仲講舊故事觀眾唔會有共鳴，落語就會沒落。呢個革新嘅諗法當然受到好多人反對，質疑「如果唔再講嗰啲故事，仲係唔係落語」。

世界變，變成咗一個平民嘅世界。世界需要嘅嘢唔再一樣，人嘅前途選擇亦都多咗好多好多。舊日嘅世界可以子承父業，可以拜師學藝，一早揀定一條路，喺嗰條路上面努力，學習嗰條路需要嘅「知識」。例如你係一個貴族，你就會學識到貴族嘅責任、義務，平日需要注意嘅儀態。喺你身邊嘅人基本上都係會令你行得上嗰條路的。繼續貴族嘅例如啦，你會知道點樣用一個僕人，知道有好多嘢唔使自己做。成個長大嘅環境都係為咗你可以成為一個貴族而設計的。就算係返學都好，多數嘅同學都有類似，或至少咁上下嘅出身。由生至死都只需要活喺自己嘅世界入面，同自己嘅階級生活。

而今時今日，我會話係一個庶民嘅世界，喺同一個課室入面，咩出身咩背景嘅人都有，階級嘅差異幾近磨滅，無論你屋企幾貧寒幾有錢，多數人都係跟住同一個課程去讀，學好多相類似嘅嘢，有睇落去公平而且多好多嘅選擇揀未來嘅前路。咁樣做唔係無代價，代價係好多人要到若干年歲先中途出家揀定未來係點，比起舊日可能五歲開始已經睇住爸爸鬥木、打鐵，或者十二三歲就跟師父學煮飯、磨刀，技藝嘅基本功必然會無咁好。

喺庶民嘅年代，階級嘅分野變得唔係咁明顯。我唔知邊個係因，邊個係果，但見到嘅係從眾從俗，好多比較華奢嘅流儀或者事情呀傳統呀自然會遭到捨棄。有啲嘢係錢買唔到的，例如Class同Manner。呢啲錢買唔到嘅嘢好多時候都係出自階級，包括成長環境嘅熏陶。呢個年代好似每一個人都有上流嘅機會；但唔係每一個人都有成為上流嘅準備。本身屬於底層或中層嘅人憑藉發奮、努力同埋天賦成為咗上層，但有啲上層嘅嘢始終唔屬於佢哋，佢哋喺成長嘅時候並無機會耳濡目染。不過唔打緊，可以由量變到質變，摒棄好多舊日屬於上層嘅「習慣」(Convention)或者義務。

庶民嘅年代好唔好，我唔知道。但無論好唔好，都要生活喺呢個年代：就算想要改變，都無得唔生活喺呢個年代。