(beta 公測版本)
< 返回

《我師傅係香港奧巴馬》

作者:仆擇
日期:2017年1月20日

奧巴馬一如以往喺佢圓形嘅寫字樓度處理佢啲文件。以黑人嚟講,佢嘅皮膚白中帶黃,算係罕見。圓房中間有兩排酸枝梳化,靠窗邊有一張啡色四方摺枱。摺枱上面有一棟書,通通係藍色書脊嘅線裝書,一棟用標楷體印刷嘅中文書函,仲有文房四寶。枱邊係一部崩咗角,俾人掟爛過嘅蘋果電腦。以一國之首嚟講,呢度嘅擺設顯得有啲簡約,簡約得嚟又好夠用。
佢每一日嘅生活都好單調,工作只得三樣:睇書,簽文件,寫字。聖經入面上帝用話語去創造世界。人間嘅世界,一切同樣係靠話語去推動。奧巴馬深知窮兵黷武無可能解決問題,所以佢習慣用文字去做佢想做嘅嘢。

「吖,總統上任之後,一定要發展新科技嘅。」

呢個係奧巴馬今日悟到嘅道理。不過寫實在係太慢,於是佢拎起聽筒,召喚咗Steve入去佢嘅圓桌辦公室。

「史刁拔,好耐冇見。」
「奧巴,我同你講咗幾多次我叫Steve,唔係stupid呀!」
「Oppa你叫㗎咩?囡囡叫𠺢嘛。嚟啦,師傅今次有好嘢益你。」

呢個時候奧巴馬放低一部電話,同一隻 3.5" 磁碟喺阿史面前。

「嗱,呢部嘢驚天地泣鬼神,叫攞你命三叔,外星科技嚟㗎。美國以後食粥食飯就睇你造化。」
Steve呆晒,講「喂唔好玩我啦,呢部咪 iPhone 囉。周街都用緊 smartphone 啦。」
「你拎隻手指出嚟」

跟住奧巴馬捉住Steve右手嘅手指公,將原本水平嘅右手手指公順時針掃咗90度:「由呢度去到呢度,係人類手指公可以操控嘅範圍,又叫神之領域。外星生物一早探知到地球人類嘅特性,先至生產到呢部咁完美嘅機器出嚟。攞去大量生產啦,包保你發達。隻floppy入面有晒設計圖㗎喇。」

Steve冇奧巴馬咁好氣,拎住兩樣嘢行出咗奧巴馬嘅辦公室。臨走佢放低咗幾本書:「老細叫我俾你㗎。」封面分別寫住《李居明雞年通勝》,《李天命的思考藝術》,《Make America Great Again》。

Steve 出咗房終於忍唔住「Mark哥,你唔好咁黐線啦。iPhone都出到七啦,佢仲拎部iPhone第一代以為係新科技。」
「佢食咗藥就正常返㗎喇。你咪由得佢囉。」

奧巴馬繼續喺房入面,用漢語拼音輸入法記低佢對未來嘅預測:「特朗普提出 go local ,會發佈最新科技,大家拭目以待。」冇人知道呢句有幾成真,不過佢以前估中過一次,之後佢講嘅嘢就冇人再質疑過嘞。

門外嘅亞Steve同亞Mark仲記得今日係1月20號,係老師改名嘅日子。今日佢哋拎住一塊新嘅木牌過嚟,上面係好工整嘅毛筆楷書:

   \
  香
  港
  特
  朗
  普
 \

換好門牌之後,佢哋留低咗一條蒸魚、一碗白飯,就離開控制住世界各國嘅「美國總統府」,鎖好門,返去門外嘅香港,留低房入面嘅特朗普,繼續喺房入面用話語控制自己嘅世界。
#zaak2017 #17.008

全文 829 字 (唔計英文、空格、標點)