《致樂美心同學 — 粵文書信範文》

樂美心同學：
　
有一日係街上遠處，無意中見到你既身影，我真係即刻覺得，果個就係你，毫無疑問。我地係杏壇中學已經畢左業咁多年，但係猶記憶係學生時代，你做左學生會主席，不論係台上發表演講辭，定係係台下你以中文學會主席既身份，教學生寫實用文（雖然應該對於好多學生黎講，除左用黎考試之外係人生係從來無實用過），你都係一樣自信滿滿，英姿颯爽，呢一份咁既感覺，一直深印係我腦海，揮之不散。果日，再度跟你遇上，雖然係人海中，無打招呼，但我都幾相信係命運既安排。
　　
係，或者你根本一直都唔識我。因為我係學校果陣，就算同你同班都好，我地都各有各玩，毫無招呼。咁以前既風氣係興男還男女還女大家都好似好守規矩咁架嘛。再加上你本身就熱愛文學，中文造詣就異常到家，但我就岩岩相反，細個係外國讀書然後中學先返黎，雖然講得一口流利英文，亦都叫做了解果下英國文學既偉大莊嚴，但係其實我一直都相結識你，只係失諸交臂。
　　
我唔知到今時今日，係ＦＡＣＥＢＯＯＫ寫封咁既公開信，係咪真係好老土。而你亦都唔好再笑我，唔識用書面語執筆寫野。我反正都係無文筆可言，不如索性用口語，可能感情，仲黎得真摯。你有你既生活，我有我既忙碌，其實人生十多年流水匆匆，我到係果一刻先發現，其實我對你仍然有好奇妙既一份感情，只不過俾身邊既人與事，沖淡左。我地係同一時空下，有限既時間，係咪應該更珍惜眼前既一切？我咁樣問自己。
　　
所以，我都唔怕自己會俾其他人笑到面黃。做人最重要既，都係踏出第一步。希望你如果見到呢封信，可以抽空回覆咁就好喇。我唔奢望Ｄ乜，但可以做番朋友傾下偈，都好呀。
　　　
祝　生活愉快
ＣＨＲＩＳ　ＷＯＮＧ
　　　
（癲文，無須太大理會。有嚴重年齡歧視成份。ＬＯＬ）