《「結婚係兩個人既事，唔駛其他人干預架，自己鍾意就得，駛咩同人分享呀！」》

忍唔住，徙少少時間回應下篇文。
　
「結婚係兩個人既事，唔駛其他人干預架，自己鍾意就得，駛咩同人分享呀！」
　
我幾乎可以過來人身份夠膽講，百分之八十既準新人，有邊一對一開始唔係咁振振有辭（我都係啦）？講真，香港今時今日，邊個可以有咁多心力同財力想大搞，唔簡簡單單分享下「小確幸」然後兩家人高高興興溫溫馨馨，然後將慳到既錢，去一個豪華Ｄ既渡蜜月，或者儲落去第時（如果仲有機會）上樓既裝修費入面？
　
但ＳＯＲＲＹ，天氣不似預期。當係廁所偷食鮑魚，都會天網恢恢，你就知道世事往往未能如願。當你係宣布你地將會踏入人生新階段既同時，有好多人已經幫你安左架過山車，然後綁架你上埋安全帶，你既婚禮，就係果一刻，遭受騎劫，走向絕對悲劇既恐怖帝國。
　
記住，不論你屋企兩老平時幾咁和藹可親，有商有量，甚至會以理性分析邏輯思考，一去到呢個關節眼，佢地就會即刻好似無線Ｄ廢劇咁，人物性格呈現一百八十度既轉變。除非你係結婚前果下，已經同另一半商量好，即刻將四老丟入山頭困佢地十年唔再俾佢地有外界接觸，否則就算佢地心入面想俾你地放手搞自己鍾意既野，好快一場「十八銅人長老最高指示會議」之後，佢地就會話：
　
「唔得架，阿仔，話晒我第一次做人奶奶，點都要昭告親朋戚友分享喜悅架。」
　
下，阿媽，依家唔係我結婚咩。但跟住老豆就會每條皺紋都笑住咁同你講：
　
「我已經同未來親家傾好晒，大家都同意要大搞架，咁開心既野，梗係要一齊分享啦！同埋阿四姨婆，三家姐，七叔都話，呢Ｄ野，最緊要體面！」
　
好喇，跟住少年你天真起黎，仲諗住以理服人，掟出一大堆方程式，甚至用自己ＣＦＡ考番黎既財務會計野，計晒ＰＶ證明其實唔擺酒對於大家都有好處，就可以安然過關。但結果會係點呢，就係長老絕技時間。爆粒珠入ＣＯＵＮＴＥＲ　ＭＯＤＥ先，之後天地為之變色，長老們既移動開始出現一堆幻影，佢地就開始用內功入密話：
　
「總之婚姻之命，媒妁之言！」
　
即刻－９９９９　ＨＩＴ，完場。ＫＯ　ＰＥＲＦＥＣＴ。
　
我曾經聽過就係呢樣野，搞到父母登報脫離關係又盛。呢招真係大絕黎。同類型既咒文仲包括：「我地唔會出席你既婚禮。」／「好呀你夠膽呀，以後有財政困難唔好搵我。」等等。讀中文系既你，會係果一刻好憎孟子，好憎香港係中西合壁，並且好同意魯迅曾經講過，禮教會吃人。但係魯迅就算墳總幫到你上到黎陽世，佢都只係拍拍你膊頭：「今鋪只能夠硬食囉，老友。」
　
所有野都仲係岩岩開始渣。婚禮搞起碼一年，仲有排你受。到你已經人格再無底線，你就發覺當眾錫，已經唔算係咩囉。遲Ｄ得閒有人睇，先再一一娓娓道來。ＬＯＬ
#港式婚禮食人系列

喜歡請多ＬＩＫＥ多ＳＨＡＲＥ，謝謝
即刻ＦＯＬＬＯＷ－＞ Ellan Ou