《網絡作家》

［是日題外話］有時有Ｄ巴絲好認真咁ＰＭ問我點樣日常寫作好Ｄ呀，甚至俾埋佢地既大作我睇叫我評價下，我真係會覺得超唔好意思。因為自己又唔出名，又唔係咩名家，邊敢亂咁評呀。
　
關於筆耕呀，投稿呀，玩徵文比賽呀，我係做過，所以係有少少心得既。但係網上寫作個性質根本同舊時你玩文學雜誌果種唔同，所以想有人睇你俾反應，係完全唔係果回事。以前會有堆編輯，有堆所謂評審，坐定定咁真係慢慢逐個字逐個字去睇你文筆編排佈局用字遣字，但依家唔係咁架。你寫得再好，一碌你落去，就消失於ＮＥＷＳＦＥＥＤ海或者ＴＨＲＥＡＤ海中，就此就成為滄海遺珠。
　
所以我成日都強調，係網上寫野，內容唔係最重要，甚至可以話唔重要。當然你可以去搵一班同你志同道合既人，但始終如果你單純想呃ＬＩＫＥ，想自己既野多人睇，你就要好機械化咁了解市場點樣運作囉。等於果陣係高登出故，你想有人睇呀？其實幾樣野已經決定一切：標題、行文格式同埋第一頁出既內容。其他會唔會爛尾，錯唔錯別字，有無病句之類，係唔會係受唔受歡迎既考慮之列。
　
所以係ＦＢ都係一樣。譬如再講下近日我寫既兩篇放係ＰＡＧＥ既野。一篇係三千字既短篇小說，叫做有晒鋪排有晒起承轉合，一篇係只有五百字既無病呻吟式文章。前者可能要寫接近一小時，後者只需十分鐘。其中五百字果篇，可能有接近一百字都係重覆緊「新垣結衣」四個字，刻意地累贅，而篇文接近係零個ＣＯＮＮＥＣＴＩＯＮ。但係睇統計，你會發現，ＲＥＡＣＨ數竟然係差唔多。至於俾客總登左出黎既各自反應係點，相信大家自行判斷，不難得出答案。
　
成日都有人會好努力寫左過萬字但最後變回音壁，好痛苦。我完全明白果種痛。有時一睇到成篇文，只會得出結論係：你寫得超好，但註定無觀眾。一係你就決定洗手不幹，誓死唔附和市場。但係如果你決定要想突圍而出，呢Ｄ所謂走精面既技巧，你就要知囉。至於最後味精落幾多，就隨你架唶。當然有走沉悶路線都爆紅既。但香港就相對較少喇。因為大部份香港人，都係唔識文學，絕對唔識欣賞寫作一番心血既，我敢咁講。
　
遲Ｄ如果有機會開ＬＩＶＥ，又有人聽，我可以再詳細講下呢類阿媽係女人既係人都知既道理。