《鬥慘真係要戒》

睇到新聞所講日本過勞自殺女仔單ＣＡＳＥ，一個月加班過百小時，相信好多香港既打工一族第一個感覺，可能除左係慘無人道之外，仲會有另一個諗法，相信就可能係：
　
過百小時一個月既ＯＴ，其實都唔係好多渣嘛。。。
　
單新聞一出，好多人都即刻係ＦＢ叫我保重身體。的確，如果計一個工作日超時工作五個鐘至少，單計二十二個工作天就已經超過一百小時，都仲未計譬如星期六日，或者岩岩聖誕節紅字踩足全日果堆，就算當八個鐘都好襟計。於是，你可能就會諗，車，其實我咪仲慘，我都未跳樓自殺啦，點解要咁樣浪費左自己大好既一生。。。
　
但得罪都要講句，如果你有咁既諗法，ＳＯＲＲＹ，你已經進入左鬥慘模式，一進入左鬥慘模式，你就萬劫不復。即係話就算你依家唔係好似上面管理層咁仆街無人性，到你有機會上左去，你都會好容易變成另外一隻魔鬼，因為到時你身為老海鮮，必然又會同下面講，我果陣時都係咁捱，一樣無事，點解你依家就要喊苦喊忽，要生要死？
　
我地應該反省下，由幾時開始，社會會有咁既一個意識形態，令到我地跌入左一個一定要捱到成為最慘烈既一個，先會成為英雄既一個錯覺。呢種文化，日本有，香港亦都唔會少。其實每個人可以承受既壓力都唔同。有Ｄ人可能不斷狂做都唔會病，唔會亂諗野，唔會抑鬱。有Ｄ人ＯＴ可能只係填下格仔入下ＦＯＲＭ，但係有Ｄ人ＯＴ真係錯少少，就會累左成條ＴＥＡＭ或者成間公司。佢ＯＴ十個鐘同你ＯＴ八十個鐘，邊有得就咁比？
　
只能夠講，搞成咁，呢Ｄ新聞出下又一單出下又一單，社會已經去到一個極度扭曲既地步。而好多人仲會為左生存而樂此不疲，積極地去推廣鬥慘文化，完全係害延幾代。呢種做法一日唔清除，將成個風氣扭轉過黎，往後只會有更多悲劇，湮滅係社會入面。講真，病死既，生ＣＡＮＣＥＲ既，有幾多證實到係同自己份工太ＣＨＵＲ有關？根本就證唔到。保險亦唔會賠，公司當然只會講句ＲＯＴＴＥＮ　ＬＵＣＫ。
　
鬥慘真係要戒。衷心祝願死者安息。