(beta 公測版本)
< 返回

《陸捌久大戰鬍鬚曾》

日期:2016年12月15日

岩岩同 Tai On 傾起,我覺得,武俠小說,以依家既玩法,起碼要咁寫啦:
 
陸捌久同埋鬍鬚曾,終於要決戰於門常開之巔。
 
今晚月黑風高,兩人就要係果度決一死戰。曾對天長嘯,然後就指住陸話:「今晚既然……既然係我地兩個人對陣,就唔好……唔好將其他人再捲入黎啦。我唔想再傷害更多既無辜,無辜。你派黎既埋伏,我勸你……速速將佢地撤走。」
 
其實都唔知究竟係鬍鬚真係漏口,定係天台大風,所以講既野總係一舊一舊永遠都唔會連貫。
 
陸捌久既然見陰謀已經敗露,就索性唔再掩飾,拎出個手提電話,禁左幾下,果然,一早惡名昭彰既黑影十人眾,就通通係天台躍下,係同事既接應底下,向住龍和道方向後退了。但就係陸捌久一邊發出令埋伏後退既命令果陣,其實佢已經暗暗地,準備好進攻既態勢。
 
眾所_知,呢個人向來都奸狡之極,毫無道義可言,佢既陰謀根本上就係:
  
埋伏只不過係第一步。當鬍鬚發現埋伏果陣,佢下命令撤走部隊,只係務求分散對方既注意力,然後佢仲要再講多一句:「好啦,咁依家我地就--」其實連後半段「正式開始」都未講完,佢就已經計劃好晒,一個閃身,火速沖到鬍鬚背後,然後即刻施以致命既偷襲!!
 
陸捌久雖然平時睇落個樣渾渾噩噩,而且平時無半點生氣,一如喪屍,但係一到取人首級,表情即刻變得異常精神亢奮,眼神透出異樣既可怕光芒。佢既武功絕學,就係六十八路龍蝦功,一共有九式並且仲有九九八十一種變化。
 
據權威消息人士透露,係佢早年娶邪門女神龍蝦夫人共修陰陽所學,每一招都係死招,每一招都可以取人性命,精華全部係手,尤如龍蝦既巨鉗,拿取獵物,一出手就快如閃電,其精準刻毒,甚至連熱血門派祖師雲塵大師,即使有皇天擊殺既神技,亦一樣對佢無可奈何,可想而知其功力,一早已經達到爐火純青之境。
 
而陸捌久亦並非會去打無把握之仗之徒!佢既可怕就係在於壞事做盡既同時,亦有一定既智商。佢一早就知道鬍鬚係黃飛鴻真傳,係洪拳高手,又習西洋劍法,中西合二為一,必然係極度難纏既對手。因此佢特別係同鬍鬚對陣前,已經苦研洪拳心法:洪拳十二橋手「十二訣」:剛、柔、逼、直、分、定、寸、提、流、運、制、訂;「十二橋手法」:穿、沉、分、架、摸、推、尋、磨、掛、撞、鎖、劈,都一併學左(詳情請見維基百科全書既洪拳條目),然後再改良自己既龍蝦奇功,以專對付洪拳為主。
 
雖則黃飛鴻其實仲有佛山無影腳一招,但其實根本就無人見過佛山無影腳,只係係電影一再誇張渲染,可能實質上一早就已經失傳。加上鬍鬚一向似乎都係練上路多於中下兩路,以咁既如意算盤黎計,應該除笨有精。加上自己係無聲無色係黑夜之中發動突襲,只要鬍鬚一時未能會意,兩大高手對陣,就會係頃刻間得出勝負。到時大患既除,佢乘勢聯合中聯門派,必然可以繼續武門特手掌門之位。
  
雖然講就講左成差唔多千幾字,但其實都係形容發生果零點零幾秒時間。陸捌久既手未到,掌風先到,黑夜裡但陸捌久猶如睇左紅外線視鏡咁,亦看得真切,似乎根據見唔到鬍鬚仍然無明顯既異動,心諗今次仲唔得手,不由得心裡面有D沾沾自喜。正要大叫一聲:「同我鬥,今次你仲唔玩完?」既時候,點知佢竟然一抓撲了個空!!
   
「點解會咁?」陸捌久雖然仆街,亦不愧為武功一等一既高手,竟然已經即刻係電光石火之間,由攻轉為守,護住自己既罩門,而且未有明顯失去分寸,雖然佢明明覺得,呢一下襲擊,鬍鬚係無可能會避得開架,點解?無可能。但係實情,佢又真係避開左,當中發生咩事……??
   
定一定神,陸終於聽到遠方突然傳來一聲長笑,轉頭一望,正正就係鬍鬚曾!!「哈哈,估唔到你真係……對我既洪拳,洪拳,了解已……已經如此透徹,實在了得。」只見佢已經企左係解放總部既天台果邊,開左一筒Pringles 薯片,好整以暇,食左一塊。薯片爽脆在佢嘴入面咬碎既聲音,令到大會堂果邊既一大雀鳥受驚而飛出。陸捌久為之一凜:好強勁既內功!但係佢始終唔知,究竟佢口齒不清,究竟係因為嘴裡中食緊著片,定係佢真係漏口。
   
「但係其實……其實呢,我仲有其他既絕學,你未見過……今晚,就等你……見識一下!」然後,鬍鬚曾手中無劍,但擺出持劍之勢,口中唸唸有詞:「仙法。PRINGLES模式!」
   
究竟咩係PRINGLES模式。欲何後事如何,且看下回分解。
#亂9咁寫

全文 1431 字 (唔計英文、空格、標點)