《專題：東拉西扯，漫談香港文青現象》
Part I：談真文青與新文青
金融仔：究竟文青係從事文學／文藝工作既人，定指緊佢底盤入面既知識？
哲學仔：我哋試下講下『真。文青』：智商唔高，好感性，文學愛好者。
金融仔：主流係咁樣界定文青架咩？唔係著某堆衫，外表唔差，偏向清純，唔係撈味好媚惑好MK果隻？依家大學都好似好多人都咁著架。有一種復古既風格同味道，例如戴番帽，長衫長褲，吊帶，襯皮鞋，揹一個布袋，最好識彈埋Ukulele，但唔係電結他喎。
哲學仔：呢個可以歸類為『新。文青』。咁我哋可以由兩點出發：(1) 一個係愛好、性格文青；另一個係 (2) 外表文青。
金融仔：同意。我覺得單從外表就咁定義一個人文青，好單薄，見完某個人一面之後，就可以話佢文青？好奇怪喎。
哲學仔：即係真中環金融仔，同大家想像中嘅中環金融仔。LOL
金融仔：係架。講到中環返工，無人食大家樂，實情邊係。如果內在文青，我覺得就真係好難Define。
譬如我係讀歷史，專攻百年戰爭既。我識左個女仔係Starbucks。環境仲播緊民歌。夠晒文青Feel喇掛。咁佢同我講既就算係法國文學，但第樣野黎，夾唔埋我條Channel，咁我可能又唔覺得佢好文青架渣喎？
哲學仔：咁有啲人你係睇得出佢性格，佢可以如數家珍咁講文學嘢，不過畀人嗰種感覺，又離高智商好遠⋯⋯
金融仔：定係文青要包埋佢對世界既觸覺同知性呢？如果你搵唔到一個人同你講哲學對到嘴，佢仲算唔算文青？
哲學仔：應該係對世界有種感性嘅認知？哲學唔係文藝嘢啦。
金融仔：但你有提及過要有智慧……哲學仲唔係智慧野？
哲學仔：我嗰科分析哲學係要理科頭腦。
金融仔：智慧係咪文青其中一樣必須／需要條件？
Part II：文青係貶義？
哲學仔：就係我識得加認同係文青嘅人智商都唔高。佢哋寫咩新詩乜乜乜，好似懶係詩情畫意，但係比落，同＿擇、方＿能、塔＿呢啲差幾條街。（編注：為左保護佢地既私隱，所以遮蔽左部份字詞，敬希垂注）
金融仔：咁慘。果D擺明偽文青啦。
哲學仔：LOL
金融仔：我諗其實我地呢堆舊人，根本唔會強行文咩文青唔文青。我地呢D傾偈，係務求就算唔係好認真去到學術研究Level，吹水都可以言之有物。即係可以有一定廣度同深度，但都可以傾得大家相當愉快有得著，希望下次再傾。
哲學仔：其實我覺得去到有你講嘅智慧，我就唔會話係文青。文青始終有啲稚嫩Feel。
金融仔：我諗我甚至唔會走去輕易去定義個人文唔文青。或者呢個唔係我地時代既產物啦。我地只會講，係咪知書識禮，係咪談吐有實質內涵，等等。
哲學仔：事實上，我心底入面覺得只要係文青，就會言之無物。
金融仔：如果文青只係大眾所講既外殼，咁好易變成貶義。都係架。
哲學仔：有料嘅人，我會叫話佢有學問，而唔係文青。
金融仔：總結黎講都係，有個人打扮得好文青。但你同佢講幾句，佢一舊飯，咁就真係今天天氣哈哈哈。
Part III：談文青與文學
金融仔：我覺得我地既討論好有趣，在於文青都唔係咩年代久遠既字詞，好似近於大眾文化生成既一個標籤，多過一個真係講緊實質內在既野。
哲學仔：文青似係台灣傳入嘅一種所謂生活態度……
金融仔：我唔明點解文青可以係一種生活態度。其實只係話想慢活D，得閒飲下咖啡，聽下音樂，睇下小說咁唶？
哲學仔：似係一種打飛機、離地，以掩飾自己胸無墨水嘅一種文學包裝。
金融仔：你既說法都好尖銳獨到。我甚至懷疑，文青片面化到一個地步，已經可能同文學無關。當然，呢個又要牽涉到究竟咩係文學，咁就會沒完沒了！
哲學仔：因為文學係關乎生活，但係偽文青普遍對生活冇乜感觸，或者話對社會漠不關心。甚少文學家係會唔關心社會嘅，反而社會動盪之際，正係文學興起之時。
金融仔：依家唔興呢種文學，依家興既係麻醉下人心即係用一少少感動去呃你Like煽情文學。
哲學仔：！！！你正正道出咗文青嗰種文學，依家最興小確幸文學。
金融仔：無錯。小確幸！同文青大有關係。好似只會你講得出小確幸，你已經接近成為文青境界。
哲學仔：最慘嘅係，文青可以將有深度嘅樣變成冇深度，例如張愛玲。
金融仔：下。依家仲有人睇張愛玲架。識呢個人既，應該即刻係文青啦。
哲學仔：有呀，讀到小確幸咁。小確幸其實係指一種矯揉造作嘅態度，同以往嘅文學唔同。
金融仔：我同清＿討論受歡迎既文字作品，好多次啦。依家大賣果D，多數都唔會有你講亂世興起果種大文學。
哲學仔：傳統文學講究言之有物，並唔係單純咁一味感性。依家嘅唔單只係感性，仲要係偽感性。
金融仔：係類近竹林七賢，但更低文學成份。更多白字，更多病句，但用一張圖扭轉劣勢既呃Like式文章。咁如果你所不齒既文青，咪會熱捧囉。我地呢Ｄ被視為孤芳自賞既，咪扮晒野囉。
Part IV：談文青與學術交流
哲學仔：呢點喺大學教育普及化嘅年代係好詭異嘅一件事。因為我哋會假設人應該更聰明、品味更高。但事實相反，社會反而好似多咗班識字文盲咁。
金融仔：大學教育普及化左，但人都係對品味不屑一顧呀。因為流行文化走向一個接近AV既發展呀。追求官能既快速刺激。但無一種深度。
哲學仔：而呢點，又好似以文科人最多所謂文青。
金融仔：深度往往係好難有市場。因為需要時間，需要功力，甚至需要緣分。要作者同讀者都Click到。作者串起黎就作到超難唔係個個知佢想做乜。
哲學仔：知識縱然普及咗，仍然有種內在價值喺到，真正鍾意文學嘅人，拎起一本文學作品去睇已經係好滿足，係一種知性嘅追求，而呢樣嘢真係基因使然㗎。
金融仔：唔知對文學既興趣可唔可以後天培養，不過就算好似被歸類為文青女神既，就算佢真係睇好多書，竟然都無人想多了解。呢個先最令人氣餒，可能佢想同記者講戰爭與和平，但無人想同佢傾呀。
哲學仔：我都唔知。只係覺得一個人應該天生就容易對某啲嘢有興趣。
金融仔：咁每個人都種會對某些野有興趣，如果深入發掘，可能就會成一家之言。即係學問啦。
哲學仔：冇錯。其實生活喺香港地係慘㗎。好容易寂寞，如果你對知性有追求，就會想同人有知性上嘅交流。
金融仔：無人可以同你有咩知性上交流，或者要搵到知音，會愈黎愈難。
哲學仔：另外，文學應該要求一種歷史同埋思想上嘅訓練。所以我哋先會覺得文青好假。
金融仔：呢個已經好高層次，等於真正做學問既人，邊會care一張證書。一個博士銜頭。如果博士銜頭都已經係呢個世代cheap cheap地。何況一個文青字眼。
哲學仔：就算care，都係想攞資源繼續做學問。
金融仔：根本齋Talk 文青，就好虛無，仲衰過講個天係藍色，無咩特別既豐富指向。可能好多無被咩權威認定既世外高人，佢係某一個領域既知識範疇甚至遠高於任何人。係咪文青，定義唔到一個人係咪有學識。
哲學仔：我認同呀，只係大家搵唔到。
Part V：談文青女神有多文青
金融仔：所以講下講下，其實我都真係覺得Angela唔係好文青。
哲學仔：佢外表唔文青咩。
金融仔：我以為你已經唔講外表，轉講內在。佢只係一個形象暫時表現出同其他幕前氣質有所唔同既女仔，或者佢類似正常派別，唔似係娛樂圈打滾果種。
哲學仔：咁又係嘅，有氣質。
金融仔：再者，但對佢黎講，講外表亦存在一種矛盾。
哲學仔：係呀。
金融仔：例如Chanel揀到佢。但Chanel同文青有無交集？好似無乜。
哲學仔：咁又係⋯⋯
金融仔：而如果又真係如佢所講想做一個演員，甚至係一個出色既演員。就最怕角色被定型。佢一定會為文青呢個詞深感煩惱。
哲學仔：可以叫佢做下妖女。LOL
金融仔：就等於某些性感女神一樣。好多出色既藝人，都唔係出色既演員。甚至由出演到息演生埋仔，可能D人都係記得佢心口兩塊肉，多過佢做過邊套戲有咩突破演出。
哲學仔：LOL
金融仔：是否文青，是否性感，只係好似舊科舉想登娛樂仕途既敲門磚。
哲學仔：咁藝人嘅職責係娛樂大眾，演員做嘅係更有深度，帶人欣賞套戲。
金融仔：到上左位，敲門磚無用，佢地就一定要尋求突破架啦。呢個世界有幾多張曼玉。又有幾多可以好似周潤發咁唔係只做賭神都成功，有人認同佢既演技呢。
Part VI：談文青變成商品
金融仔：又或者退番一萬步……低層次既社會，又唔可以要求太高。可能對身邊既事有獨到既見解，已經算係文青呢。
哲學仔：文青只係一個資本主義下嘅社會現象「商品化」，班商家同你講你需要做啲咩、追求啲咩，同你講佢相信做人要點點點，但係真正有學問嘅人係唔會咁樣被人扯住走。
金融仔：咁都可能係真，有文青衣著，你地咪去買囉。
哲學仔：有cafe咪去買嘢飲同坐囉。
金融仔：係呀。大家變左不知不覺去追呢一種生活態度。反而無人知，真係做緊文青野，如去圖書館，就唔再流行咁囉好似。而係要去一D小書店，或者誠品。
哲學仔：就好似香港人覺得似酒要飲紅酒先high-class。我睇書睇得最快最多嘅時候，就係去圖書館。
金融仔：可能台灣誠品正常好多。係去到香港。先變左商品區人最多。書架無人。
哲學仔：因為趕住還，反而買書睇會慢好多。
金融仔：但香港人係興買左書返屋企唔睇架喎……我諗你講既文青，都係將一切野表面化，總之可以低成本構造既一個形象，外面著幾件衫，口講幾個Term，幾個行為同舉止。
哲學仔：其實成個社會都充斥住廉價嘅形象。
金融仔：可以成為一種得到廣泛贊同既形象，何樂而不為。
哲學仔：真正嘅觸覺同品味，除咗少數叻人，都係要浸淫嘅。
金融仔：D人就係甘於受一種口舌便給既讚賞而安於現狀！例如讚你好勁。你可能覺得，我都唔係真係勁。但好多人都會飄飄然了，即係我地都係講緊一個社會文化既低格化，一種吹彈得破既虛妄。令好多人都去追逐文青、女神呢D term，變左title Inflation。愈黎愈唔值。
哲學仔：然後當大家都唔滿足於呢啲terms事，就會有啲再勁啲嘅terms出嚟，文青、女神只係一種廉價嘅商品，冇一種內在價值。
金融仔：但內在價值D人唔睇，所以即係都係無價值，文青、女神有銷量，可以賣錢，呢堆字，可以推到人上位出名。假設，Angela出黎同你講金鎖記入面張愛玲意象三十條。有無大眾有興趣？佢下個月已經無得撈啦。
哲學仔：所以我係非主流sosad。
金融仔：有以上諗法既，都係非主流吧。
～～～～～～～～完～～～～～～～～～
睇得晒記住 like or share 呀！