《卧虎藏龍》

寫多一篇得一篇喇。。。
　
兩位人兄光天化日之下，街頭毆鬥，初頭以為只係胡亂打爛仔交，點知望望下條片，就算並非習武之徒，都會發現當中竟然甚有章法，尤其係黑衫皮褸阿叔，從套路黎講，絕非等閒之輩。赤手空拳，亦同樣精彩。
　
鏡頭一開始，間條牛仔褲友係地上纏鬥，但係皮叔當然不甘示弱，先行避開，退到的士門前，然後開始伺機反擊。皮叔身型一矮，站穩陣勢，即時猛烈出拳，虎虎生風，狂攻間條友上中路位置，間條友食左幾拳，但亦未有沮喪絕望，亦都即時轉換防守模式，以靈活身位閃避，亦睇得出腳法有進有退，甚為細膩。
　
間條友亦都唔係只守不攻，一路捱打。佢睇準時機，就會突襲回贈皮叔數拳，有幾次甚至想環抱皮叔作出牽制！無奈皮叔又點會輕易就範，一早已經睇穿來路，即時作出化解。呢個時候，戴帽花生阿叔入鏡，但竟毫無勸交既動作，即匆匆離開事發現場。當然啦，中國人教落，見人廝殺，戰意正酣，切記做和事老，亦不可以拍手叫好，否則咪隨時殃及池魚，都係咪喇，梗係作壁上觀，為上上之策。
　
皮叔見形勢漸僵，亦都唔想戀棧，意圖速戰速決，先係右手接連三下拉弓重拳，但係令人驚嘆既係，當以為勝負以分之際，果三下連環拳，都竟然俾間條友硬地接左落黎。間條友究竟係咪有練過少林既硬派武功？竟然有如此銅皮鐵骨，硬接皮叔三掌而面不改色？呢個世界即使如香港，都真係臥虎藏龍！！
　
不過你有過牆梯，我亦有張良計。皮叔殺得性起，又豈是省油的燈？又點會輕易罷休，偃旗息鼓？列位看官看清楚：原來三下重拳，只係分心既擾敵之計，佢既右腳係三拳剛落，已經係毫無預警既情況下，激射而出，從力度同速度都顯得有相當水準，尤如小志強既猛虎射球之勢！！踢到間條友，一臉痛苦之餘，接近失去平衡。呢下唔知係咪就係兩人定出勝負既關鍵，係片尾階段，皮叔既二段腿攻似乎繼續接二連三，唔俾間條友有任何既喘息機會。。。
　
雙方都無表面既傷痕，而兩位武者，亦都只係各甩一鞋，雖然皮叔拳腳較佔上風，但究竟最後結果如何，仍然難料。我諗都係要等下回分解至會真相大白喇。下回係邊？真係要問番原片攝錄人先知。話唔知到最後兩位人兄以武相鬥，惺惺相惜，到最後做埋患難之交，亦未可知。ＬＯＬ。

（ https://www.facebook.com/mandywong1022/videos/10154744243036738/?hc_ref=NEWSFEED ）